Kontribusen Sabskripsen Totona

Ita ura magasin idia ura momokani taudia ibounai ese Gima Kohorona bona Awake! magasin idia abia hanaihanai. Pablisa taudia ese magasin ia ura tauna ta idia davaria neganai, ena magasin idia henia hanaihanai be namo bona unai dala amo ena ura idia habadaia. Eiava, bema pablisa ia diba unai tauna be ia ura momokani, sabskripsen ia henia be namo. To namona be nega ginigunana sabskripsen ia abia tauna dekenai hua 6 ena sabskripsen idia karaia guna, bona bema ia ura do idia karaia lou diba. Nega momo, idia ura momokani taudia be iseda tanobada ibounai gaukarana durua monina be mai edia ura ida idia henia karana amo unai idia hahedinaraia. Kamonai tauna ta be durua monina ia henia lasi to sabskripsen idia karaia neganai, sabskripsen ia karaia pablisa ena maduna bona hahenamo be ena dava bada gaudia amo Iehova do ia hanamoa.​—Aon. 3:9.

Pablisa ibounai ai hagoadaia Kingdom Hall dekenai, haroro gaukara totona idia abia magasin amo sibodia edia magasin idia abia be namo.

Bema pablisa ta be pos opesi amo ia ura ia sibona totona sabskripsen ia abia, seketere ese ena davana ia hadibaia bona ena davana be seketere dekenai do ia henia be namo, bona ia ese unai moni be kontribusen mauana dekenai do ia udaia, ena ladana be “Society Ena Tanobada Ibounai Gaukarana Durua Monina​​—Mataio 24:14.” Hua ta ta ai magasin rua idia abia totona, hua 6 ena sabskripsen ena davana inai nega ai be K3.00 bona lagani ta ena davana be K6.00. Namona be ita laloatao, unai be sabskripsen idia siaia ena davana sibona. Reana ita ese magasin dainai kontribusen ita henia danu.

Ita ese Gima Kohorona bona Awake! sabskripsen ita henia neganai, ita diba nega korikori ai idia halasia herevadia idia hahedinaraia magasin be hanaihanai idia abia taudia dekenai heduru bada do idia henia.

This article is unique to PNG.