Mai Moale ida Iehova Bona Ena Natuna ida Ita Lalo-Tamona
Inai Lagani Ena mai Anina Bada Hebouna be March 28 ai Do Ita Karaia
1 March 28, 2002, dina ia diho murinai Lohiabada ena Anibou hebouna do ita karaia neganai, ita hahedinaraia mai eda moale ida Iehova Dirava bona Iesu Keriso ida ita lalo-tamona. Unai mai anina bada negana ai, horoa Keristani taudia oredia be Basileia ahuna idia abia taudia ma haida ida, Tamana ida, bona iena Natuna ida dala badana ta ai do idia moale hebou. (1 Ioa. 1:3; Efe. 1:11, 12) “Mamoe idaudia” milioni momo ese idia abia hahenamo do idia lalohadailaia, edia kudouna ai bona edia lalona ai Dirava ena gaukara hagugurua totona Iehova bona iena Natuna ida idia lalo-tamona!—Ioa. 10:16.
2 Tura Karana Namona ai Idia Gaukara Hebou: Iehova bona Iesu be hanaihanai mai moale ida idia lalo-tamona. Taunimanima idia do havaraia lasi neganai, lagani daudau herea lalonai hebamo karana namona idia moalelaia. (Mika 5:2) Unai dainai idia ruaosi huanai lalokau bona hetura heheni karana be bada. Unai vara guna Natuna, aonega bamona idia gwauraia tauna, be tanobada dekenai ia do mai lasi neganai, ia gwau: “Dina ibounai Dirava be lau dekenai ia moale, bona lau be iena vairana dekenai, lau moale noho nega ibounai.” (Aon. 8:30) Momokani, ita duahia diba lasi laganidia lalonai Dirava ena Natuna be lalokau ena Badina ida ia noho dainai unai ese ia durua bada!—1 Ioa. 4:8.
3 Iehova ese taunimanima ruhaia karana ia laloa noho dainai, ia havaraia Natuna tamona, taunimanima ia lalokau henidia bada tauna unai, ia abia hidi mauri davalaia boubouna ia henia totona, unai ese iseda mauri dalana tamona ia kehoa. (Aon. 8:31) Iehova bona iena Natuna be ura tamona hagugurua totona idia lalo-tamona, unai hegeregerena lalokau goadana dainai ita be idia ida bona ta ta ida ita lalo-tamona, bona mai moale ida Dirava ena ura ita karaia.
4 Iseda Laloa Bada Karana Hahedinaraia: Memorial dekenai ita lao bona mai eda hemataurai ida ita kamonai namonamo neganai, ita hahedinaraia ita ese Iehova ena lalokau bona iena Natuna ena boubou gauna ita ibounai totona ita laloa bada. Unai hebou ai Iesu ena haheitalai, mauri davalaia boubouna henia totona ia abidadama ela bona mase karana, Dirava ese ia haginia vadaeni Basileiana lalonai ia abia lohia siahuna, bona unai Basileia ese taunimanima totona do ia mailaia hahenamo idauidau do idia hahedinaraia. Danu, ita do idia hadibaia iseda abidadama ita hahedinaraia noho, bona ita be ‘hereva momokani totona ita gaukara hebou’ taudia dainai mai goada ida Iehova ena ura ita badinaia noho.—3 Ioa. 8; Iam. 2:17.
5 Ma Haida Durua Ita Danu Idia Hebou: Namona be elda oreana idia hekwarahi edia gabu dekenai idia haroro lasi Witnes taudia ibounai idia hagoadaia, Keriso ena mase laloatao Memorial dekenai idia mai totona. (Mat. 18:12, 13) Do oi vadivadi henia taudia edia lista ta karaia, unai amo idia ta oi laloaboio lasi bona iboudiai oi boiria mai diba.
6 Memorial dekenai idia mai taudia haida oi diba, a? Namona be kara ta oi karaia unai hebou idia laloa bada karana oi habadaia totona. Mai lalokau ida idia oi boiria, bona oi welkam henidia. Namona be ita gaukara goada inai lagani ena mai anina bada hebouna dekenai, iseda Baibel stiuden taudia ibounai, kamonai taudia ma haida, ruma bese taudia, bona turadia ita boiridia mai totona. Idia diba ‘mai anina bada gauna be Keriso Iesu do idia diba momokani’ taudia ibounai ese mauri davalaia boubouna ena namo idauidau do idia abia. (Fili. 3:8) Keriso ena boubou gauna idia abidadama henia taudia ese mauri hanaihanai ena helaro idia abia diba.—Ioa. 3:16.
7 Memorial ese kudou-maoro taudia edia lalona ia veria diba. Lagani rua gunanai, Papua New Guinea ai, kamonai taudia 11 be unai hebou dekenai idia lao totona, davara mai ena hurehure bada lalonai hora 17 bouti amo idia lao. Dahaka dainai? Idia gwau: “Ai ura Iehova idia tomadiho henia taudia ida Keriso ena Memorial ai abia hebou; unai dainai emai laolao be mai anina.” Mani unai kamonai taudia edia ura goadana bona Iehova, iena Natuna, bona Keristani tadikaka oreana ida mai moale ida idia hebou tamona karana idia laloa bada be mani oi laloa!
8 Kamonai taudia ibounai dekenai, Baibel stadi oi herevalaia. Idia oi hagoadaia hanaihanai kongregesen heboudia dekenai idia mai bona idia dibaia noho hereva momokani be ma haida ida idia herevalaia. Idia oi durua ‘diari lalonai idia raka’ bona ‘hereva momokani idia badinaia’ totona, Baibel ena hakaua herevadia be edia mauri lalonai idia badinaia. (1 Ioa. 1:6, 7) Idia oi durua Iehova idia tura henia bona mai lalo-tamona ida ena ura karaia ena dala namona dainai edia laloa bada karana idia hahedinaraia noho.
9 ‘Mai iseda laloa tamona bona ura tamona, Sivarai Namona abidadama henia totona ita tuari hebou noho’ be hahenamo badana! (Fili. 1:27, 28) March 28 ai, do ita karaia Memorial hebouna ena nega namona ita naria mai moale ida, Iehova bona iena Natuna ita tanikiu henia totona!—Luka 22:19.