Hakaua Oreana Amo Ia Mai Revareva

Tadikaka Bona Taihu E:

AI MOALE bada umui dekenai inai revareva ai torea dainai! Umui ai hanamoa badina lalokau bona sibona emui ura dadaraia karana umui hahedinaraia noho. Inai lagani ena Yearbook dekenai do umui itaia, hesiai lagani gunana lalonai umui be gaukara namodia momo umui karaia vadaeni. Danu, unai lagani lalonai, ita ese hora bilioni momo mai kahana lalonai haroro bona hadibaia gaukarana ita karaia, taunimanima ita hagoadaia Iehova kahirakahira dekenai idia lao totona. Iseda Dirava mai hairaina bona guba Tamana ida ita gaukara hebou be hahenamo ta, ani?​—1 Kor. 3:9.

Nega vaira ena gaukara ita laloa neganai, ai diba momokani umui ese Dirava ena hesiai taudia edia ura bada bona abidadama, Baibel lalonai idia torea hegeregerena, do umui tohotohoa noho. Hegeregere, aposetolo Paulo ia ura bada Basileia gaukarana ia karaia namonamo. Toana be lagani ginigabena ai Efeso dekenai ia noho lalonai, ia ese Korinto kongregesen ai idia noho Keristani taudia dekenai ena revareva ginigunana ia torea. Maoromaoro do ia karaia palanina ia herevalaia, ia gwau: “Efeso dekenai do lau noho ela bona Pentekoste ena nega. Badina be unai gabu dekenai iduara badana ia kehoa vadaeni, bona hari be gaukara badana bona mai anina ena nega namona. To lauegu dala idia koua gwauraia taudia be momo.”​—1 Kor. 16:​8, 9.

Paulo be palani ia karaia Makedonia bona Korinto dekenai do ia lao totona. To, ia lalo-parara nega sisina lalonai Efeso dekenai ia noho be namo, gaukara namona ia karaia totona. Paulo ese ena haroro daladia ia haidaua; unai gabu dekenai ia ese Basileia do ia harorolaia dala namona ta ia itaia, bena unai hegeregerena ena sediual ia haidaua. Paulo dekenai gaukara badana ena iduara badana ia kehoa vadaeni, bona ia ura dikadika unai gaukara lalonai ia vareai.

Unai ia karaia totona be mai ena hekwarahi​—Efeso kongregesen taudia dekenai sivarai namona ia harorolaia bona ia hagoadadia danu. Gabeai, unai hanua badana ai idia noho kongregesen tatau badadia dekenai, Paulo ia gwau: “Umui diba vadaeni umui dekenai lau haroro bona hadibaia neganai, emui ruma dekenai, bona taunimanima edia vairana dekenai durua hereva ta lau hunia lasi umui dekenai. Iuda taudia bona Helene taudia danu dekenai lau sisiba henia goada edia lalona do idia giroa Dirava dekenai, bona Lohiabada Iesu do idia abidadama henia.”​—Kara 20:​20, 21.

Unai hegeregerena, umui tadikaka bona taihu momo dekenai haroro daladia namodia idia kehoa neganai, umui haroro. Hesiai laganina gunanai, taunimanima 798,938 bamona ese edia noho dalana idia hegaegaelaia, unai amo painia hesiai gaukarana ta idia durua totona. Umui haida be tanobada ena kahana ibounai dekenai umui lao misinari gaukara umui karaia totona. Umui ese sivarai namona umui harorolaia goadagoada bona kongregesen umui hagoadadia. Umui haida ese gado ma ta umui dibaia, unai amo umui badinai idia noho gado idauna idia herevalaia taudia umui durua diba totona. To ma haida ese edia gau haida idia haidaua, daudau teritori eiava haroro taudia be momo lasi gabuna dekenai idia lao totona. Ma haida idia davaria gaukara badana ena iduara be ia kehoa sikuli ai, gaukara gabuna ai, eiava haroro namona idia henia daladia ma haida, hegeregere telefon amo. Tanobada hegegemadai Dirava ena taunimanima, matamata bona buruka, edia ekspiriens ese idia hahedinaraia idia be mai edia ura ida dala idia tahua, bona dala idia davaria neganai gabu ibounai ai taunimanima dekenai hereva momokani ena diba idia hadibaia.

Namona be umui diba momokani, Iehova ese emui hekwarahi ia itaia bona ia laloa bada. Baibel ia gwau: “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi. Umui ese Dirava umui lalokau henia.” (Heb. 6:10) Namona be haroro daladia oi tahua, unai amo tomadiho goevana do oi abia isi. Reana umui haida ese emui hesiai gaukara umui habadaia. Ita ibounai ita hekwarahi diba, iseda hesiai gaukara ita karaia namonamo totona.

Iseda haroro gaukara ita karaia lalonai, ita ese dagedage ita davaria danu. Mani oi laloa, Paulo ese ia dekenai gaukara badana ena iduara badana ia kehoa herevana ia gwauraia murinai, ia gwau: “Dala idia koua gwauraia taudia be momo.” Paulo dekenai, unai dala idia koua gwauraia taudia be Iuda bona Idau Bese taudia, idia haida ese ia idia dagedage henia bona ma haida ese koikoi dalanai ia idia hereva dika henia.​—Kara 19:​24-28; 20:​18, 19.

Hari inai negai, ita ese unai bamona dagedage ita davaria danu. Inai tanobada dikana do ia hadikaia ore negana ita lao henia lalonai, ita diba dagedage karadia do idia bada. Satani ia “badu dikadika,” bona unai badu ena hisihisi be Dirava idia hesiai henia taudia dekenai ia havaraia. (Apok. 12:12) Laloaboio lasi, Satani be inai “tanobada ena lohia.” Iesu ese ena hahediba taudia ia hamaorodia: “Bema umui be tanobada ena taudia momokani neganai, tanobada taudia ese umui do idia lalokau henia. To umui be tanobada ena lasi, lau ese tanobada dekena amo lau abia hidi umui, unai dainai tanobada ese umui do ia badu henia.”​—Ioa. 14:30; 15:19.

Iseda lalona ita hadaia, tau ta ese iseda abidadama Dirava dekenai ia hamaragia lasi eiava iseda haroro gaukara dekenai ita manoka ita lao lasi. Ita diba, taunimanima ese ita do idia dagedage henia bona ita hadikaia palani do idia karaia noho. To, Basileia ena sivarai namona ita harorolaia noho, ita diba momokani Iehova ena nega korikori ai, Iesu ese Satani bona ena tuari taudia ibounai do ia moidia. Dagedage taudia ese Paulo idia koua diba lasi; hari inai negai Iehova ena hesiai taudia danu do idia koua lasi. Ena be Satani ena badu bona tanobada taudia edia inai henia karadia idia vara, to Iehova ena lauma be mai siahu ida Iena taunimanima huanai ia gaukara noho. Ita moale bada, badina ita diba sivarai namona idia harorolaia taudia edia namba ia bada daekau 6,304,645!

Aiemai guriguri be, Iehova ena Basileia namona ena gaukara do umui habadaia daladia umui tahua noho. Ai ura umui ai hadibaia, umui ta ta ai lalokau henia, bona umui ida Ataiai Momokani Diravana, Iehova, ena ‘hesiai gaukara be mai eda lalo-tamona ida do ita karaia hebou.’​—Sep. 3:​9, NW.

Emui tadikaka,

Iehova Ena Witnes Taudia Edia Hakaua Oreana