Henanadai Mauana

◼ Edena dala ai kongrigeisen ena gaukara idauidau ita karaia namonamo diba?

Iehova ena taunimanima edia kongrigeisen ia heau namonamo, badina idia ibounai be idia gaukara hebou. (1 Kor. 14:​33, 40) Kongrigeisen ena hebou tamona ai idia karaia gaudia oi laloa. Hebou ena program lalonai sibona lasi, to hebou vairanai bona murinai tadikaka bona taihu be gaukara idauidau idia karaia. Gaukara haida be taunimanima edia vairanai idia karaia lasi, to idia danu be mai anina bada. Edena bamona ita ta ta ese unai dala ita durua diba?

Sibona oi henia. Mai edia ura bada ida idia gaukara taudia be gau momo do idia karaia. (Sal. 110:3) Buruka bona gorere taudia idia lalodia bada. Kingdom Hall hagoevaia gaukarana idia durua. Herevana haida ese ita idia noia eiava lasi, to kara namodia momo ita karaia diba. Namona be heduru henia urana ita abia.

Mai manau ida hesiai gaukara karaia. Manau taudia be mai edia moale ida ma haida idia hesiai henia. (Luka 9:48) Manau ese ita do ia gimaia, ita karaia diba lasi gaukaradia ita dadaraia totona. Danu, manau ese ita do ia durua eda siahu ita gaukaralaia kerere lasi totona.​—Aon. 11:2.

Mai momokani ida hesiai gaukara karaia. Idaunegai Israela dekenai, Dirava ese Mose ia hagoadaia “mai momokani ida idia gaukara taudia” do ia abia hidi, maduna idia huaia namonamo totona. (Eso. 18:​21, NW ) Hari, unai kara tamona be mai anina bada. Namona be oi abia gaukara ta ta oi karaia namonamo. (Luka 16:10) Gabu ta oi lao gwauraia neganai, namona be dala oi karaia oi hagugurua lasi gaukarana be ma ta ese ia karaia totona.

Gau namodia oi henia. Baibel ese Keristani taudia ia hagoadaia mai edia kudouna ibounai ida gaukara idia karaia totona. (Kol. 3:​22-24) Tomadiho momokani habadaia totona oi gaukara neganai, unai bamona oi karaia be mai ena badina namo hereana. Herevana oi be gaukara maragina oi karaia, to oi karaia namonamo neganai kongrigeisen be namo bada do ia abia.

Gaukara ta ta ita karaia neganai, unai be nega namona Iehova bona eda tadikaka dekenai eda lalokau ita hahedinaraia totona. (Mat. 22:​37-39) Namona be mai eda momokani ida ita abia gaukaradia ita karaia namonamo.