Kahana 5—Baibel Stadi Namodia Karaia
Paragraf Hida Do Umui Stadilaia Abia Hidi
1 Iesu ese ena hahediba taudia ia hadibaia neganai, edia diba ena hetoana ia laloa, unai dainai ‘idia kamonai diba hegeregerena’ ia hereva henidia. (Mar. 4:33; Ioa. 16:12) Unai hegeregerena, hari Dirava ena Hereva idia hadibaia taudia ese Baibel stadi lalonai paragraf hida do idia stadilaia idia laloa be namo. Do idia stadilaia paragraf be hadibaia tauna bona stiuden edia goada bona noho dalana hegeregerena idia abia hidi be namo.
2 Abidadama Hagoadaia: Stiuden haida ese nega tamona lalonai idia lalo-pararalaia karoana, be stiuden haida ida nega rua eiava toi ita stadilaia diba idia lalo-pararalaia totona. Namo lasi ita ura stadi ita karaia haragaharaga, to stiuden tauna be ia stadilaia gaudia ia lalo-pararalaia namonamo lasi. Namona be stiuden taudia iboudiai edia abidadama matamatana Dirava ena Hereva dekenai, be badina aukana latanai idia haginia.—Aon. 4:7; Roma 12:2.
3 Pura ta ta lalonai stadi oi karaia neganai, nega oi atoa stiuden tauna oi durua, Dirava ena Hereva lalonai ia dibaia gaudia ia lalo-pararalaia bona ia abia dae totona. Stadi oi karaia haragaharaga lasi, badina unai ese ita hadibaia hereva momokani ena namo ia hadikaia diba. Nega oi atoa hereva badadia bona unai hahediba herevadia idia hamomokania siridia umui herevalaia totona.—2 Tim. 3:16, 17.
4 Gau Momo Herevalaia Lasi: Ita ura lasi stadi ita karaia haragaharaga bona anina bada lasi gaudia ita herevalaia momo. Bema stiuden ta be ena ura gaudia ia herevalaia momo, dala ita karaia diba stadi murinai unai gaudia ita herevalaia totona.—Had. 3:1.
5 Hereva momokani ita laloa bada, to stadi lalonai do ita herevahereva momo lasi. (Sal. 145:6, 7) Stadi ia durua herevana eiava ekspiriens ta ese stadi ia durua diba, to namo lasi unai ita herevalaia momo dainai stiuden tauna be Baibel ena hahediba herevadia amo diba maoromaoro ia abia lasi.
6 Baibel stiuden taudia edia diba hegeregerena stadi ita karaia neganai, idia ita durua Iehova ena ‘diari lalonai idia raka’ totona.—Isa. 2:5.