Hegaegae Karana amo Oi Hahedinaraia Ma Haida Oi Laloa Bada
1 Haroro gaukara totona ita hegaegae namonamo neganai, unai ese ita do ia durua ma haida ita laloa bada totona. Edena dala ai? Bema ita hegaegae namonamo, do ita diba edena hamatamaia herevana do ita gaukaralaia bona ruma tauna ia laloa bada gauna ita herevalaia diba. Danu, unai ese ita ia durua ita gari lasi totona bona mai kudouna ibounai ida ita hereva diba. To, hamatamaia hereva namona be edena bamona ita hegaegaelaia diba?
2 Ia Hegeregere Hamatamaia Herevana Gaukaralaia: Rau 5-8 amo, emu gabu dekenai ia hegeregere hamatamaia herevana ta oi abia hidi, bona oi laloa edena bamona sibona emu hereva dalanai oi gwauraia diba. Namona be emu hamatamaia hereva be emu teritori dekenai idia noho taudia edia noho dalana bona lalohadai ida ia hegeregere. Hegeregere, bema tomadiho tauna ta eiava iduhu idau tauna ta oi davaria, namona be oi laloa edena dala ai emu hamatamaia herevana ese edia lalona oi veria diba. Namona be oi hereva henia taudia edia noho dalana hegeregerena oiemu hereva oi haidaua, unai ese do ia hahedinaraia idia oi laloa bada.—1 Kor. 9:22.
3 Unai hamatamaia herevana oi gaukaralaia bona oi hanamoa noho. Hamatamaia herevana be mai anina bada dainai, oi itaia taunimanima be edena bamona do idia kara. Oi herevalaia gauna idia ura kamonai, eiava lasi? Henanadai oi henia neganai, idia haere, a? Bema lasi, oiemu hamatamaia hereva oi haidaua.
4 Laloatao Daladia: Momo be ruma ta dekenai idia lao neganai, edia hamatamaia herevana idia laloaboio. Bema oi dekenai unai bamona ia vara, namona be unai hamatamaia herevana be ruma dekenai ma ta ida oi tohoa. Unai ese oi ia durua unai hamatamaia herevana oi laloatao totona bona ia auka lasi dalanai oi herevalaia diba. Bona do oi hegeregere ruma tauna ena lalohadai hegeregerena oi haroro henia totona.
5 Hamatamaia herevana laloatao dalana ta be pepa ta dekenai emu hamatamaia herevana oi torea bona ruma ta dekenai oi do ginidae lasi neganai, oi itaia. Haida idia gwau unai bamona idia karaia neganai, unai ese idia ia durua idia gari lasi bona taunimanima ida idia herevahereva namonamo totona. Unai dainai, hegaegae namonamo karana ese ita do ia durua ma haida ita laloa bada bona sivarai namona harorolaia daladia ita hanamoa totona.