Memorial Totona Oi Hegaegae Namonamo

Keriso badinaia taudia be Iesu Keriso ena mase laloatao hanuaboina totona idia hegaegae neganai, unai be hahenamo bona moale bada negana! (Luka 22:19) Dahaka ita karaia be namo, unai amo Memorial totona ita hegaegae namonamo diba?

◼ Nega Bona Gabu: Namona be ibounai ese Memorial hebou ena nega bona gabu idia diba. Bema kongrigeisen rua o toi ese Kingdom Hall tamona idia gaukaralaia, namona be nega korikori ai hebou umui hamatamaia bona hebou ia ore neganai, namona be dala umui karaia, unai amo gabeai idia mai taudia ese edia hebou be nega korikori ai idia hamatamaia diba. Namona be Kingdom Hall ena vareai gabuna bona motuka atoa gabudia umui koua lasi.

◼ Invateisen Pepapepadia: Pablisa ibounai be edia invateisen pepapepadia idia abia vadaeni bona unai pepapepa lalonai idia torea gaudia idia diba namonamo, a? Oi be unai invateisen pepapepa hariharilaia dalana oi tohoa vadaeni, a? Daika dekenai invateisen pepapepa oi henia diba? Namona be dala umui karaia, unai amo invateisen pepapepa ibounai umui hariharilaia diba.

◼ Motuka: Reana kamonai taudia haida bona tadikaka taihu momo be do idia ura motuka amo idia oi abia lao Memorial gabuna dekenai, eiava ma dala haida amo idia oi durua. Dahaka umui karaia diba idia umui durua totona?

◼ Paraoa Bona Uaina: Namona be umui laloatao, paraoa bona uaina do umui henia lasi ela bona dina ia diho. Paraoa bona uaina maorona umui hegaegaelaia guna be namo.​​—March 1, 2003, Gima Kohorona, rau 5-6 itaia.

◼ Kingdom Hall: Kingdom Hall eiava hebou gabuna ma ta umui hagoevaia namonamo guna. Hebou ia do hamatamaia lasi neganai, mereki, uaina galasi, teibolo bona teibolo koua dabua namona umui atoa hegaegae. Bema gabu ma ta umui gaukaralaia, namona be saun gaudia namodia umui gaukaralaia, unai amo helai taudia ibounai be hereva henia tauna ena hereva do idia kamonai namonamo. Atendan bona paraoa bona uaina henia loaloa taudia umui abia hidi, bona edia gaukara bona do idia karaia dala maorona umui hadibaia guna. Bona namona be hemataurai dabua idia karaia bona toana namona idia hahedinaraia.

Inai hebou badana, Iesu Keriso ena Memorial hebouna dekenai ita ura ita ta ta bona kongrigeisen taudia ibounai idia hegaegae namonamo. Oibe, Iehova ese ena Natuna lalokauna, Iesu Keriso ena boubou gauna amo taunimanima dekenai gau momo ia henia. Unai gaudia idia laloa bada taudia be Iehova ese do ia hanamoa bada.