Ita Hegaegae Namonamo ta Ita Hadibaia Totona
1. Dahaka dainai stadi tauna ita durua Baibel ena hereva momokani ia laloa bada totona?
1 Ta ita stadi henia neganai, namona be ita hegaegae namonamo. Unai bamona ita karaia neganai, stadi tauna ena lalona do ita veria Iehova ia hesiai henia totona. Namona be ita hekwarahi stadi tauna ita durua Baibel ena hereva momokani ia laloa bada totona. Unai ese stadi tauna do ia durua ia goada ia lao totona. (Deu. 6:5; Aon. 4:23; 1 Kor. 9:26) Edena bamona unai ita karaia diba?
2. Dahaka dainai hegaegae namonamo karana lalonai guriguri be mai anina bada?
2 Guriguri Bona Hegaegae: Iehova sibona be stadi tauna ena kudouna ai hereva momokani ena uhe ia hatubua noho. Unai dainai, ita hegaegae gwauraia neganai, namona be Dirava ita noia stadi tauna ia durua, bona stadi tauna ese do ia karaia gaudia ita gwauraia hedinarai danu. (1 Kor. 3:6; Iam. 1:5) Unai bamona guriguri karana ese ita do ia durua, unai amo stadi tauna do ita durua Iehova ena “diba” ma haida ia lalopararalaia totona.—Kol. 1:9, 10.
3. Edena dala ai ita hegaegae neganai stadi tauna ita laloa bada?
3 Stadi Tauna Laloa Bada: Iesu ia diba, hadibaia tauna namona ese kamonai taudia ia laloa bada be namo. Nega ta ai, tau ta ia henanadai: “Lau be edena bamona do lau karaia mauri hanaihanai abia totona?” Ma nega ta ai, tau ma ta ia henanadai: “Lau be mauri hanaihanai abia totona edena bamona do lau karaia?” Iesu be dala idaudia rua amo unai henanadai ia haerelaia. (Luka 10:25-28; 18:18-20) Ita hegaegae neganai, stadi tauna ita laloa bada be namo. Edena siri be ia ida do ita duahia? Paragraf hida do ita karaia? Edena point be stadi tauna ese do ia lalopararalaia lasi eiava do ia abia dae lasi? Bema stadi tauna ese reana do ia henia henanadai haida edia haere ita lalohadailaia guna, vadaeni do ita hegaegae namonamo bona haere maorona do ita henia.
4. Hegaegae namonamo karana be dahaka?
4 Riviu: Herevana stadi bukana ita manadalaia, to stadi tauna dekenai unai be buka matamata ta bamona. Unai dainai bema ita ura stadi tauna ena kudouna ita hamarerea, vadaeni stadi negadia ta ta totona ita hegaegae namonamo be gau badana. Anina be, iseda hegaegae karana amo stadi tauna ita hagoadaia ia hegaegae totona. Stadi ena hereva bona idia gwauraia siridia ita riviulaia neganai stadi tauna ita laloa, bona point badadia ita makaia.—Roma 2:21, 22.
5. Edena dala ai Iehova ita tohotohoa?
5 Iehova ia ura bada stadi taudia ta ta idia goada. (2 Pet. 3:9) Bema nega ita atoa stadi negadia ta ta totona ita hegaegae, ita be Iehova ena kara ita tohotohoa unai.