Hakaua Oreana Amo Ia Mai Revarevana
Iehova Ena Witnes Taudia E:
Ai moale bada badina umui abidadama hesiai taudia 7 milioni mai kahana ai tore henia. Idau tano amo ia mai pablisa ta ida umui hedavari neganai, maoromaoro do umui mamia umui huanai lalokau ia noho. (Ioa. 13:34, 35) Inai lagani ena Yearbook ai tadikaka taihu edia abidadama sivaraina oi duahia neganai, unai lalokau mamina do ia habadaia.
Tanobada hegegemadai, ripoti ese idia hahedinaraia, umui momo be Ruma Bese Ena Tomadiho umui karaia hanaihanai. Umui tama sina be dala namodia momo umui gaukaralaia emui natudia umui durua stadi idia moalelaia totona. (Efe. 6:4) Headava taudia be Baibel stadilaia hebou karana amo edia headava idia hagoadaia. (Efe. 5:28-33) Oibe, ta ta bona famili ibounai ese Baibel stadilaia karana amo namo idia davaria.—Ios. 1:8, 9.
Vanegai, disasta idauidau ai, umui haida be gau momo umui haboioa dainai ai hebogahisi. Unai negadiai, momo be heduru umui henia, bona ai ura umui ai tanikiu henia. (Kara 11:28-30; Gal. 6:9, 10) Danu, kongrigeisen ai umui haida be tadikaka taihu edia dabu gaudia umui itaia bena heduru umui henia. Doreka bamona, ‘kara namodia momo umui karaia bona hebogahisi dainai ogogami taudia umui durua.’ (Kara 9:36) Namona be umui diba Iehova ese emui kara namodia ia laloa bona ahuna do ia henia.—Mat. 6:3, 4.
Tano haida ai, ena be kara maorodia umui karaia to taravatu hagagevaia taudia ese “taravatu idia atoa,” taunimanima ese umui idia dagedage henia totona. (Sal. 94:20-22) Umui diba Iesu ese unai bamona kara ia perovetalaia—unai diba ese umui ia durua dainai umui haheauka bona Iehova be emui roho mauri gabunai umui halaoa. (Ioa. 15:19, 20) Namona be umui diba ai be hanaihanai emai guriguri lalonai umui ai laloa, “emui helaro dainai idia henanadai taudia ibounai umui haere henia totona.”—1 Pet. 3:13-15.
Umui pablisa milioni ai hanamoa badina lagani ta ta ai kara goeva umui badinaia noho, herevana Satani be matabodaga karadia ia habadaia. Hari, taunimanima edia kara dika ia bada ia lao lalonai, umui be ‘Lohiabada amo bona ena goada badana amo siahu umui abia noho.’ (Efe. 6:10) Umui be ‘Dirava ese ia henia tuari dabua ibounai umui hahedokilaia,’ bona “Diabolo ena koikoi karadia ibounai dekenai umui gini goada.” (Efe. 6:11, 12) Namona be umui diba, emui haheitalai namona dainai Iehova ese Satani ia haere henia!—Aon. 27:11, BHğ.
Ai moale badina lagani 2011 ai, taunimanima 19,374,737 be Lohiabada Ena Anibou dekenai idia mai. Unai namba ia bada badina April ai umui momo be heduru painia umui karaia. Taunimanima milioni momo idia itaia Witnes taudia be mai lalotamona ida Iehova idia hanamoa! (Roma 10:18) Herevana unai April ai heduru painia idia karaia taudia 2,657,377 huanai oi noho, o dala ma haida amo emu hesiai gaukara oi habadaia, to umui ibounai be mai ura bada ida unai gaukara umui karaia dainai ai Hakaua Oreana ai moale.—Sal. 110:3; Kol. 3:23.
Lagani 2011 ai, pablisa matamatadia 263,131 be Iehova dekenai edia mauri idia gwauhamatalaia. Unai dainai, Iehova ai tanikiu henia. Danu, umui ai tanikiu henia badina inai boiboi herevana be ma haida dekenai ita gwauraia: “‘Mai!’ Bona namona be inai hereva idia kamonai taudia idia gwau: ‘Mai!’ Bona namona be idia ranu mase taudia do idia mai, bona mauri ranuna idia ura taudia ibounai ese mauri ranu idia inua be namo, ia be davana lasi.” (Apok. 22:17) Vanegai distrik hebouhebou ai Dirava ena Basileia ese do ia karaia gaudia idauidau ita herevalaia, bona mai moale ida ita gwau, ‘Dirava ena Basileia do ia mai!’ Iesu ia gwau: “Lau be do lau mai haraga”—unai ese ita ia hagoadaia dainai, mai eda kudouna ibounai ida Ioane bamona ita gwau: “Amen! Lohiabada Iesu e, oi mai.”—Apok. 22:20.
Unai nega umui naria noho lalonai, namona be umui diba ai be umui ta ta ai lalokau henia, badina umui be ‘mai momokani ida emui kara amo umui hahedinaraia’ Iehova umui lalokau henia!—1 Ioa. 3:18.
Emui tadikaka,
Iehova ena Witnes taudia edia Hakaua Oreana