Emu Hekwarahi Ena Anina Namona Oi Moalelaia
1. Haroro gaukara amo anina namona ita havaraia lasi neganai, dahaka ia vara diba?
1 Dirava ese ita ia karaia, eda ‘hekwarahi dekena amo ita abia gaudia ita moalelaia’ totona. (Had. 2:24) To, eda haroro gaukara amo anina namona ita havaraia lasi neganai, ita lalomanoka bona haroro gaukara ita moalelaia lasi. Dahaka ese ita ia durua diba lalohadai maorona ita abia totona?
2. Ena be momo idia kamonai lasi, to dahaka dainai lalohadai maorona ita abia be namo?
2 Lalohadai Maorona Abia: Laloatao, ena be haida sibona ese Iesu ena haroro herevana idia kamonai, to ena haroro gaukara ia moalelaia. (Ioa. 17:4) Uhe hadoa tauna ena parabole lalonai, Iesu ese ia perovetalaia gauna be, taunimanima momo ese Basileia sivaraina do idia abia dae lasi. (Mat. 13:3-8, 18-22) Herevana unai ia vara, to eda hekwarahi ese anina namona ia havaraia diba.
3. Ena be haroro gaukara ai momo idia kamonai lasi, to edena dala ai huahua ita atoa diba?
3 Huahua Momo Havaraia: Iesu ena parabole ai, sivarai namona idia kamonai taudia ese huahua do idia atoa. (Mat. 13:23) Witi ia tubu bona ia bada murinai, ia havaraia huahua be, witi au maragina lasi to uhe matamatadia. Unai hegeregerena, Keristani taudia ese idia havaraia huahua be, hahediba taudia matamatadia lasi to Basileia sivaraina idia gwauraia hedinarai loulou karana. Unai ese anina namona ia havaraia bona ita moale, ena be taunimanima idia kamonai o lasi. Ita ese unai gaukara ita durua karana amo Iehova ena ladana ita hahelagaia. (Isa. 43:10-12; Mat. 6:9) Danu, ita moale badina ita be Dirava ida ita gaukara hebou. (1 Kor. 3:9) Bona “iseda uduna” amo Iehova ita gwauraia hedinarai karana ese Ia ia hamoalea.—Heb. 13:15, 16.
4. Eda haroro gaukara ai dahaka anina namona ia vara, to ita itaia lasi?
4 Ma danu, reana eda haroro gaukara ai anina namodia idia vara, to ita itaia lasi. Iesu ena hereva idia kamonai taudia haida be maoromaoro iena hahediba taudia ai idia lao lasi, to tanobada ai ena haroro gaukara ia hagugurua murinai, idia be hahediba taudia ai idia lao. Unai hegeregerena, Basileia ena uhe be ta ena kudouna ai ita hadoa neganai, maoromaoro ia tubu lasi to gabeai do ia tubu, bona ita diba lasi negana ai hereva momokani do ia abia dae. Momokani, iseda haroro gaukara ese anina namona ia havaraia diba. Unai dainai, namona be ita gaukara goada ‘huahua momo ita havaraia’ totona, bona ita hahedinaraia ita be Iesu ena hahediba taudia.—Ioa. 15:8.