Iehova Ena Gwauhamata Oi Abidadama Henia Momokani, A?

Iosua bona Solomona idia hamomokania Iehova ena gwauhamata ibounai idia vara momokani. (Ios 23:14; 1Ki 8:56) Unai taudia rua edia hereva ese ita idia durua iseda abidadama be badina goadana latanai ita haginia totona. ​—⁠2Ko 13:1; Tit 1:2.

Iosua ena negai, Iehova ese ena gwauhamata be edena bamona ia hamomokania? Emu famili ida vidio ladana‘Hereva Ibounai Idia Vara Momokani’ umui itaia. Bena inai henanadai haerelaia: (1) Edena bamona Rahaba ena abidadama karana oi tohotohoa diba? (He 11:31; Ia 2:24-26) (2) Akana ena haheitalai ese edena dala ai kamonai lasi karana ena dika ia hahedinaraia? (3) Ena be Gibeona taudia be tuari taudia, to dahaka dainai Iosua idia koia bona Israela taudia ida maino idia karaia? (4) Amoro ena king taudia faiv ese Israela taudia idia hagaria neganai, Iehova ena hereva be edena dala ai ia guguru? (Ios 10:5-14) (5) Dirava ena Basileia bona iena kara maoromaoro be emu mauri lalonai oi atoa guna dainai, Iehova be oi totona dahaka ia karaia?​—Mt 6:33.

Iehova ia karaia vadaeni gaudia, hari ia karaia gaudia, bona gabeai do ia karaia gaudia ita lalohadailaia neganai, unai ese iseda abidadama iena gwauhamata herevadia dekenai ia hagoadaia.​—⁠Ro 8:31, 32.