Bible ena Haere
Bema Keristen Taudia Idia Hadikaia Dahaka Do Idia Karaia?
“Dahaka dainai mai gari danu oi noho? Namona be heatu daladia idauidau oi tahua bona oi dibaia, sibona oi naria totona. Heatu daladia idauidau namodia idia hahedibalaia noho bona idia be auka lasi. Inai hereva ena video ese ita ia durua ita mauri totona.”—Heatu daladia idauidau video ena advetismen.
UNAI video idia hoihoilaia bada herea. Philadelphia siti, Pennsylvania, U.S.A. dekenai, matamata taudia momo be siti ena dala dekenai idia raka loaloa bona idia be mai ane danu idia boiboi badabada idia gwau, “Botaia, botaia, botaia,” bona taunimanima edia kohu idia dadia bona idia hadikaia gwauraia. Time magasin ia gwau, Rio de Janeiro dekenai, “siti taudia iboudiai be kara dika garina idia gari.” Hong Kong dekenai, raskol taudia be ipidi amo gabu haida idia hadikaia, bona unai gabu be guna kara dika idia vara momo lasi gabuna bona raskol lasi gabuna—to hari unai kara dikadia idia vara.
Unai bamona sivaraidia be tanobada hegegemadai lalonai ita kamonai. Bona dahaka ia vara? Newsweek ta ia gwau: “Unai gabu dekenai idia noho taudia idia laloa, haida be ipidi amo idia pidia neganai, idia ese edia ipidi amo unai taudia idia pidia danu be namo eiava lasi.” Keristen taudia be “nega dokonai metau dikadia momo” amo idia hehuni lasi, to bema ipidi amo ita idia pidia taudia ita pidia danu neganai, unai ese “ita ia durua ita mauri totona, a?”—2 Timoteo 3:1.
Ita Idia Badu Henia Neganai Mai Badu Danu Ita Kara Henidia, A?
Haida idia gwau, ‘Bema ipidi lau abia loaloa neganai, namo do lau davaria. Ia do lau hadikaia guna. Do lau hagaria diba danu! ’ To, ia be unai bamona lasi.
George Napper, Atlanta, Georgia, U.S.A. ena polisi biaguna ta, ia gwau: “Ipidi ta oi abia oi sibona emu, ena anina be, bema tau ta oi alaia mase, murinai do oi hegaegae emu lalohadai ia hadikaia lasi totona.” Keristen taudia be unai bamona kara do idia karaia, a? Bona rara ena davana be idia dekenai do ia noho, a?—Numera 35:11, 12 danu itaia.
Danu, Dirava ena taravatu be, ‘Emui tuari kaia be tano geia auridia ai umui halaoa’ bona, “Maino [umui] tahua, bona maino do [umui] badinaia noho.” (Mika 4:3; 1 Petero 3:11) Keristen taudia be ipidi amo sibona idia naria karana do idia tahua lalonai, edena bamona Dirava ena taravatu Bible dekenai do idia badinaia diba? Danu, oi ia hadikaia gwauraia tauna be do ia haraga momokani oi ia hadikaia totona.
Iesu ese tuari gaudia ia dadaraidia. Momokani, ia ese ena aposetolo taudia ia hamaorodia tuari kaia rua do idia abia lao Getesemane uma dekenai, unai gabu dekenai haida ese ia do idia dogoatao. To dahaka dainai ia be unai bamona ia karaia? Tuari kohudia idia abidia to idia gaukaralaia lasi karana ese ia hahedinaraia, Iesu ena murina dekenai idia raka taudia be tanobada ena tuari kohu idia gaukaralaia lasi be namo. Tuari kaia be Petro dekenai ia noho dainai, ia gaukaralaia. Iesu ese ia gwau henia, ia gwau: “Tuari kaia idia abia taudia ibounai be tuari kaia dekenai do idia mase.”—Mataio 26:36, 47-56; Luka 22:36-38, 49-51.
Reana ta do ia gwau, ‘Vadaeni, ipidi ita abia be kerere. To heatu idauidau hegeregere judo, karate, bona kendo ita tahua ita sibona ita naria namonamo totona, be edena bamona? ’ Sibona oi nanadaia oi gwau, inai heatu idauidau ita dibaia be haida ita heatu henia bona ita hahisihisidia totona, ani? Bona unai bamona hegaegae karana be hegeregere ita hegaegae ala-ala karana karaia totona, ani? (1 Timoteo 3:3) Bona nega haida unai heatu idia dibaia toho neganai, bero momo idia davaria bona haida idia mase danu.
Roma 12:17-19 ese sisiba namona ia henia unai kara dekenai, ia gwau: “Bema tau ta ese umui dekenai ia kara dika henia neganai, iena kara dika davana do umui karaia lasi. . . . Maino karaia daladia umui tahua dala idauidau ibounai dekenai, taunimanima danu mai maino danu do umui noho totona. Lauegu lalokau taudia e, dika ena davana do umui karaia lasi, davana be, Dirava sibona. Badina be Buka Helaga ma ia gwau, ‘Lohiabada ia gwau, “Dika ena davana be lau sibona ese do lau karaia.” ’ ” Paulo ese Greek herevana “kara dika” (ka·kosʹ) ia gwauraia neganai, ena anina be “hadikaia ore, hadikaia.” To, Keristen taudia be tau ta idia hadikaia eiava idia haberoa, davana karaia lou totona lalohadaina idia abia be namo lasi.
Keristen tauna be heatu dalanai ena badu ia hahedinaraia be namo lasi, to namona be Dirava dekenai ia abidadama momokani, Dirava be ena taunimanima dekenai inai bamona ia gwau: “Umui ia dauatoho tauna ese lauegu matana nadinadina ia dauatoho.” Unai hereva habadaia totona, Dirava ena gwauhamata be ‘kara dika taudia ibounai do ia hadikadia ore.’—Sekaria 2:8; Salamo 145:20.
Heatu be Mai Ena Nega, A?
Haida idia gwau, ‘Lauegu moni do lau dogoatao bona do lau heatu lau dogoatao totona!’ Edukeisini ena gaukara biaguna, Dick Mellard, be National Crime Prevention Institute orea tauna ta, ia gwau: “Taunimanima edia kara be idia ura idia heatu, to taunimanima ese [oi] idia hamasea diba dala idauidau amo.” Dadidadi taudia momo be tuari kohudia idauidau danu idia loaloa, bona mai edia gari bada danu idia loaloa danu. Idia boio moni be do ita davaria lou, to mauri ita haboioa neganai be edena bamona? Mauri ita haboioa be namo, a?
George Napper ese inai sisiba ia henia, ia gwau: “Reana oi sibona oi naria dala namona be, emu kohu oi haboioa, to oiemu mauri oi haboioa lasi. Dadidadi taudia momo bona henaohenao taudia momo be kohu sibona idia ura henaoa, idia be ala-ala totona idia mai lasi.” Nega haida bema raskol taudia ese oi idia dogoatao bona oiemu moni idia ura abia neganai, sisiba namona be inai: “Lohiabada ena hesiai tauna be do ia heai lasi.”—2 Timoteo 2:24.a
Hari ita gwauraia dalana be tuari ibounai dadaraia karana lasi. Esodo 22:2, 3 ese ia hahedinaraia, henaohenao tauna ta be dina ia diari noho lalonai ta ena ruma ia makohia, ruma tauna ese ia botaia bona kahirakahira ia mase. Unai bamona ia sibona ia naria karana be kerere, badina unai be hegeregere ala-ala karana, badina henaohenao tauna be ia itaia diba bona kota taudia edia imana dekenai do ia atoa diba. To hanuaboi dekenai, ruma tauna ese henaohenao tauna be do ia itaia namonamo diba lasi. Bema dibura lalonai ruma tauna ese henaohenao tauna ia alaia mase, ia be kerere lasi.
Bema haida ese ita idia hadikaia gwauraia neganai, Bible ia gwau lasi ita sibona ita naria totona ita heatu. Bona ia gwau lasi, ta ese ita idia hadikaia toho neganai ita koua lasi, to, Bible ese ia hahedinaraia ita sibona ita naria namonamo karana be mai ena nega. Keristen taudia be edia tauanina amo kara haida idia karaia mai edia badu toana danu, idia sibona naria totona, bona edia ruma bese bona ma taunimanima haida durudia totona.b To haida do idia hadikadia lasi, eiava edia kohu dainai do idia heatu lasi. Idia ese tuari kohudia haida do idia abia loaloa lasi haida idia hadikaia totona; to, idia be “maino dekenai” idia noho.—2 Korinto 13:11.
[Footnotes]
a Unai siri dekenai Paulo ese heai herevana ia hahedinaraia, to gado gunanai “heai” (maʹkhe·sthai) ena anina be tuari kohu amo idia heatu, eiava imana amo idia heatu.
b Bema hahine ta be tau ta ese ia dogoatao bona ia hadikaia gwauraia neganai, namona be ia boiboi badabada bona kara haida ia karaia unai tau ese do ia hadikaia lasi totona.—Deuteronomi 22:23-27.
[Picture on page 18]
Betrayal of Christ, by Albrecht Dürer, 1508