Matamata Taudia Idia Henanadai . . .

Kuku Ania Urana be Edena Bamona Lau Koua Diba?

“Lauegu lalo-hekwarahi ia haorea, egu lalona ia hamoalea bona ia hamainoa.”

“Lauegu lalona ia hagoadaia.”

‘Ia be egu imana amo lau karaia diba karana ta.’

MEMERO kekeni haida be unai bamona idia haere, kuku ania karana idia nanadailaidia neganai. (Teens Speak Out) Oibe, ena be doketa idia gwau kuku ese kensa, laga-tuna, bona kudou gorerena ia havaradia, to memero kekeni momo idia ura kuku idia ania. Reana nega ta ai oi laloa do oi ania toho.

Magasin haida oi duahidia neganai kuku ania taudia edia laulau oi itadia; edia toana be namo herea, kensa gorere taudia edia toana hegeregerena lasi. Eiava reana emu bamodia ese oi idia doria toho kuku oi ania totona. Sikuli ai reana oi idia hahekwarahia, idia gwau: ‘Oi be gari kava merona, a? ’ ‘Sitailo taudia iboudiai ese kuku idia ania.’ Bema kuku ania taudia bogaragidiai oi noho to emu imana ai kuku be lasi, reana oi laloa oi sibona be idau.

Reana unai lalo-ani ena mamina be emu ruma ai oi abia. Bema emu tamana ese kuku ia ania to emu sinana ese ia ania lasi, reana oi daradara bada. Bema idia ruaosi ese kuku idia ania, reana unai ese emu lalona ia veria goada. Kekeni ta ladana Rebecca ia gwau: ‘Dina ta ta iboudiai egu tamana sinana ese kuku paketi rua idia ania, unai dainai nega ibounai kuku be ruma ai idia noho.’ Bema emu tamana sinana be unai bamona to idia gwau kuku do oi ania lasi be namo, reana oi laloa idia be koikoi taudia, ani? Kekeni ma ta ladana Allison ia gwau: ‘Bema aiemai tamana sinana ai hamaorodia edia mauri ai laloa momo, idia kamonai lasi. Unai dainai edia hereva ai kamonai henia be auka.’​—⁠The Private Life of the American Teenager.

Badina idauidau dainai, memero kekeni momo ese kuku idia ania toho, bena gabeai idia momo ese idia negea diba lasi.a Oi diba vadaeni kuku ese dika ia havaraia, bona oi ura lasi unai dika do oi davaria, ani? To, reana oi henanadai, kuku ania urana be edena bamona do oi dadaraia diba.

Haida Vairadiai Idia Hemarai

Memero kekeni ese kuku idia ania ena badina haida do ita tahua guna. Memero kekeni momo idia gwau, bema kuku idia dogoatao, edia toana be “taunimanima badadia” edia toana hegeregerena. Mero ta ladana Oren, ia gwau: “Pati dekediai lau lao negadiai lau hemarai. Edena bamona do lau kara eiava dahaka do lau hereva be lau daradaralaia. Kuku ese egu lalo-hekwarahi ia kokia.”

To, ta ese kuku ia ania bona ena kwalahu dikana ia hohoa lasi neganai, ia hahedinaraia haida edia namo ia tahua lasi, bona ena toana be namo lasi, ia kava bamona. Hahine ta ladana Jane Rinzler ese memero kekeni momo edia lalohadai ia tahua neganai, ia davaria kekeni 100 100 amo 63 63 idia gwau kuku ania karana be dika bona memero 100 100 amo 73 73 be unai bamona idia hereva. Kekeni ta ia gwau: ‘Taunimanima idia laloa kuku idia ania neganai idia sitailo karaia, to edia toana be namo lasi.’ Ena be kuku idia ania neganai idia sitailo karaia reana, to unai dainai edia tauanina hadikaia karana ta idia karaia be namo, a?

Maurice Falk, memero kekeni edia doketa ta, ia gwau: ‘Taunimanima idia kara heheni dalana maorona idia diba memerodia bona kekenidia be idia hemarai bada lasi. . . . Unai bamona taudia momo ese kuku idia ania lasi.’ Iehova ena Witness memerodia bona kekenidia momo ese unai idia hamomokania. Edia haroro gaukarana lalonai taunimanima matamatadia bona burukadia idia hereva henidia dainai idia hemarai lasi bona edia lalona idia goada. Ma danu, Kingdom Hall ai, edia Keristen heboudia ai, taunimanima vairadiai mai edia manau ida idia herevahereva dalana maorona idia dibaia. Taunimanima bogaragidiai idia noho neganai, kuku be heduru gauna ta bamona idia tahua be anina lasi.

Taunimanima bogaragidiai oi noho neganai, bema sibomu emu kara oi moalelaia lasi eiava oi hemarai, namona be Keristen korikori taudia oi bamodia, edia kongregesen lalonai. Unai ese oi do ia durua emu hemarai koua totona. Danu, emu lalo-hekwarahi be emu tamana sinana oi hamaorolaidia be namo. To, mani inai oi laloa: Taunimanima ese oi do idia matauraia, kuku oi ania dainai lasi, to badina be, Baibel ena sisiba hegeregerena, “oi ese abidadama taudia edia toana namona bamona do oi lao . . . oiemu hereva namona, kara namona, lalokau, abidadama bona laloa goevagoeva” dainai.​—⁠1 Timoteo 4:12.

“Egu Lalo-Hekwarahi Ia Haorea”

Haida idia gwau, kuku idia ania neganai edia mamina be namo herea. Buka torea tauna ta ladana Alvin Rosenbaum be ia gwau: “Kuku ania taudia haida idia gwau, bema kuku idia ania lasi idia laga-ani namonamo diba lasi. . . . Kuku ese edia lalo-hekwarahi, edia gari, bona edia badu ia hamaragia.” To, Rosenbaum ia gwau kuku ese edia lalona ia hamainoa lasi, to ena anina ta ladana “nikotin ese edia lalona ia hanogaia.”

Dahaka dainai taunimanima ese mamina idia abia, kuku idia ania neganai idia laga-ani namonamo diba? Badina be kuku idia manadalaia bona idia negea diba lasi dainai, idia abia neganai idia lalo-hekwarahi lasi! Oibe, kuku ena anina ta, nikotin, idia manadalaia, haida ese heroin bona kokein idia manadalaia bamona, to haida idia gwau unai drag idia negea be auka, to nikotin idia negea be auka herea.

Nikotin ena siahu be kuku ania tauna ena tauanina ai ia ore neganai, ia ura dikadika do ia abia lou. Unai neganai ia laloa namonamo lasi, ena tauanina ena varovaro idia auka idia lao, bona ia badubadu ela bona kuku amo nikotin ia abia lou. Unai dainai kuku ania karana be laga-ani dalana kavakavana. Laga-ani dalana namona be inai: Miusik namona oi kamonai, buka oi duahia, eiava oi loaloa sisina.

Emu Bamodia Edia Lalo-Ani Oi Dadaraia

Mero ta ladana George ia gwau: “Memero momo ese kuku lau idia henia toho, unai dainai lau dadaraidia.” Edia bamodia edia lalo-ani dainai, memero kekeni momo ese kuku idia ania matamaia. Memero kekeni haida edia kara idia tahua neganai, inai idia davaria: ‘Bema edia turadia ese kuku idia ania lasi, idia 100 100 amo tamona tamona ese kuku idia ania, to bema edia turadia iboudiai ese kuku idia ania, idia 100 100 amo 73 73 ese kuku idia ania.’ Bema emu turadia ese oi idia doria toho kuku do oi ania totona, reana oi henanadai, oi gwau: ‘Edia hereva koua totona bema kuku lau ania sisina, unai ena dika be dahaka?’

Keristen taudia edia natudia haida idia laloa unai be dika momokani lasi, unai dainai dala maorona idia rakatania.b Haida idia gwau, kuku be edia imana ai idia dogoatao eiava edia uduna ai idia atoa, edia toana be taunimanima oredia edia toana ida idia hahegeregerea totona. To Baibel ia gwau: “Egu natuna e, kara dika taudia ese emu lalona idia ania neganai, edia ura oi abia dae lasi.” (Hereva Lada-isidia 1:10) Memero kekeni momo, Keristen famili lalodiai idia tubu taudia, ai hanamodia badina be unai sisiba idia badinaia. Idia ta, kekeni ta ladana Maribel, ena bamodia ese kuku idia henia toho neganai ia dadaraia. Gabeai ia gwau: “Unai neganai lau idia rakatania bona lau idia kirikirilaia.” To, ia laloa ‘Dirava ena lalo-namo ia abia be namo, taunimanima edia lalo-namo ia abia be dika,’ unai dainai edia lalo-ani ia abia dae lasi!

Edena bamona turadia ese oi do idia ha-uraia, mase muramurana do oi hohoa dae totona? Hereva Lada-isidia 13:20 ia gwau: “Kavakava taudia ia bamodia tauna ese dika do ia davaria.” Bema emu turadia be unai bamona taudia, namona be tura matamatadia oi tahudia. Kuku ania taudia bogaragidiai oi noho neganai, edia kuku ena kwalahu ese oi ia hagorerea diba! Kekeni ta ladana Brenda ia gwau: ‘Lauegu turadia iboudiai be kuku ania lasi taudia. Unai dainai egu lalona idia ania lasi kuku do lau ania totona.’

Reana dala be lasi Keristen lasi memerodia bona kekenidia do oi rakatanidia vaitani. Bema unai bamona, namona be oi abia dae dalana maorona do oi badinaia noho bona kuku be oi do idia henia toho neganai do oi dadaraia vaitani! Unai neganai kuku ena dika do oi herevalaia lasi reana. Buka torea hahinena ladana Sharon Scott ia gwau, bema unai neganai oi gwau “Lasi,” reana unai sibona be hegeregere, to bema lasi, oi hereva goada, oi gwau, “Lau gwau LASI!”

Aonega daladia ma haida be inai: Oi raka oho, edia hereva oi hakala henia lasi, eiava hereva idauna ta oi herevalaia. Eiava oi laloa guna, kuku be oi do idia henia toho neganai, edena bamona do oi dadaraia. Namona be oi hegaegae, emu kara ena badina bema idia henanadailaia neganai do oi gwauraia hedinarai totona. Baibel ia gwau: ‘Nega ibounai do oi naria hegaegae idia do oi haere henia totona.’​—⁠1 Petero 3:15.c

Taunimanima momo ese kuku ania karana idia rakatania, badina be Iehova ena Witness taudia edia Kingdom Hall ai Baibel ena hahediba herevadia idia kamonai dainai. Oren ia gwau: “Lau ura taunimanima do lau hadibadia, tanobada paradaisona goevana lalonai do idia mauri hanaihanai diba bona unai neganai do idia gorere lasi; unai dainai kuku lau negea unai do lau karaia totona.” Aonega dalana be kuku oi ania matamaia lasi!​—⁠Kolose 4:⁠5.

[Footnotes]

[Picture on page 21]

Kuku ania karana ese ta na lo tauna ai ia halaoa lasi, to reana ia hahedinaraia ena lalona ia goada lasi