“Kahana Maragimaragi Ta Do Ia Boio Lasi”

Noga! toretore tauna ta Ghana ai

IENA ladana be Adams Akuetteh. Ena mauri lagani be 70 bona hanaia lagani 50 ai ia ese kamuta gaukara ia karaia. Laganina be 36 neganai ia bapatiso bona Iehova ena Witness tauna ta ai ia lao. Hanaia lagani 4 lalodiai ia ese ena nega ibounai ia henia Dirava ena Basileia hesiai gaukara karaia totona. Lau hedavari henia negana ginigunana be Accra ena gabu ta ladana Labadi, iena gaukara gabu, gabu badana lasi, dekenai. Mai ena goada bada danu au ia utua bona ia hamanadaia.

Bena lau nanadaia iena kamuta gaukara lalonai ia laloa bada gaukara be edena bena haraga momokani ia gwau Watch Tower Society Nungua, Ghana dekenai lagani 4, 1984 ia lao 1988 lalodiai branch matamata idia haginia.

“Unai gabu dekenai oi be dahaka gaukara oi karaia?” Lau nanadaia.

“Lau be semensi lau karaia bona guhi atoa taudia lau durua danu.”

“To tadikaka be ikoko dainai oi idia laloatao,” lau hamaoroa.

“Ah, oibe, ikoko. Ghana dekenai ikoko ena davana be bada. Unai neganai kilogram ta ena davana be 4 eiava 6 dola bamona. Unai dainai lau sibona lau hereva, ‘Namona be ikoko gunadia lau gogoa bona lau hanamodia bena do idia gaukaralaia lou.’

“Vadaeni dina ibounai gaukara ia ore murinai lau ese unai lalohadai lau badinaia. Gaukara ia gunalaia tadikaka ese unai kara ia itaia neganai ia moale bada herea. Lau ia hamaoroa unai gaukara be do lau karaia nega ibounai. Vadaeni, unai lagani hani lalodia, lau ese daba ibounai construction gabu ibounai lau gegea ikoko lau gogoa totona.”

“Idia makohia o gageva gaudia oi negedia eiava?”

“Lasi. Idia makohia gaudia be au manokadia dekenai idia gaukaralaia. Idia gageva gaudia be hama amo lau hamaoromaorodia.”

“Unai bamona gaukara ese oi ia hahesikua lasi, a?”

“Sedira matamata tauna be do ia hesiku to lau be lasi. Gaukara ia haheaua tadikakana ese lau ia hamaoroa lau karaia gaukara dainai Society bona Iehova, ena moni idia negea kava lasi. Unai hereva ese lau ia hamoalea dikadika. Unai lau hanamodia ikoko dikadia momo lau itaia neganai egu gaukara ena moale ia habadaia. Lalogu dekenai lau hereva, ‘Aha! Guhi kokoa taudia lau hanaidia vadaeni!’ To haraga herea ikoko ma idia abia. Guhi amo ikoko totona idia boiboi. Bona lau ese hama lau davea bona egu gaukara lau haharagaia.”

“Hari construction gaukara be ia ore vadaeni bona oi be dahaka oi karaia noho?”

“Lau ese egu nega ibounai lau henia hesiai gaukara dekenai, to lau naria noho ela bona Ghana branch ma idia habadaia neganai. Bona do lau giroa lao mai moale danu​—⁠ikoko gunadia do lau hanamoa bena unai amo moni do ita negea kava lasi​—⁠bona unai ese egu moale ia habadaia.”

Io, lagani hani lalodiai ia karaia gaukarana be momo ese idia ura henia lasi gaukarana. To Adams Akuetteh, “Ghana branch ena ikoko hamaoromaoroa tauna” be unai bamona ia laloa lasi. Mai moale danu ikoko gunadia ia hanamodia bona unai dainai Iehova ena moni idia negea kava lasi!

Iesu ena lalohadai danu be unai bamona. Ena be ena siahu be bada badina ia ese paraoa ta amo paraoa daha daha ia havaraia to aniani murinai inai bamona ia hereva: “Aniani orena do umui haboua, kahana maragimaragi ta do ia boio lasi.”​—⁠Ioane 6:⁠12.

[Picture on page 31]

Adams Akuetteh, “Ghana branch ena ikoko hamaoromaoroa tauna”