Helaro Momokanina Natudia Dekenai

“Dina haida sibona ia mauri beibi . . . be unai neganai do ia vara lasi . . . Do idia hekwarahi kava lasi, bona edia natudia do idia havaradia lasi dika totona; badina idia be Iehova ese ia hanamoa taudia.”​—Isaia 65:​20, 23.

ENA BE taunimanima ese natudia edia noho hanamoa karadia idia karaia, to idia vara matamata natudia milion momo be ‘dika idia davaria totona idia vara.’ To unai bamona do ia vara hanaihanai lasi. Isaia ena peroveta hereva ese ita ia hamaoroa nega namona ta do ia mai natudia iboudiai edia noho do ia namo, bona ita ia hadibaia edena dala ai unai do ia vara.

Isaia 65:17 dekenai, Dirava ia gwau: “Lau ese guba matamatana bona tanobada matamatana lau karaia inai; gau gunadia do idia lalodia lou lasi, do idia lalodia tao lasi.” Tanobada ena natudia naridia namonamo totona, unai “guba matamatana” bona “tanobada matamatana” do idia vara be namo.

Unai “tanobada matamatana” be orea matamatana taudia, Iesu Keriso ese ia hahedibalaidia hahegani idia badinadia taudia. Iesu ia gwau unai hahegani ta be inai: “Daika ese natuna maragi inai bamona ia abia dae lauegu ladana dainai, be lau danu ia abia dae.” (Mareko 9:37) Bema orea ta be natudia iboudiai ia kara henidia Keriso ia kara henidia hegeregerena, momokani, unai orea be “tanobada matamatana”! Hari, taunimanima milion momo be unai idia karaia toho, bona idia ese tanobada ena natudia haida dekenai helaro idia henidia vadaeni.

Helaro be Hari Idia Abia Natudia

Tshepo bona iena kakadia bona taihudia hani be South Africa ena ruma dikadia gabuna ta ai idia noho. Iena lagani be tamona neganai, ena bogana ia gudu ese ia hahedinaraia ia aniani namonamo lasi. Edia lalohisihisi idia laloaboio totona iena tamana sinana be edia moni ena kahana bada idia negea kava bia dekenai. Nega momo Tshepo be nadua anianina ia ania lasi, bona ruma ai ia idia rakatania bena momoru bona bia tini gabuna dekenai ia gadara.

Tshepo ena vaira negana ena toana be ia dika, to gau ta ia vara bena iena tamana sinana edia laloa dalana ia haidaua. Edia dekena tauna ta ladana George ese Baibel ia hadibalaidia, davana lasi. Unai dainai idia vara gaudia be namo momokani​—inuinu kekero hekwakwanai ia ore, ruma idia hagoevaia, dina ta ta iboudiai ruma bese be nadua aniani idia ania, bona Tshepo bona iena kakadia bona taihudia be dabua goevadia idia hahedokilaidia, bona idia moale.

George ese Tshepo ena ruma bese taudia ia durudia badina ia be Iehova ena Witness tauna ta dainai, ia laloa ia be mai ena maduna taunimanima iboudiai dekenai, unai be ogogami momokani bona sikuli lasi taudia dekenai danu. Momokani, edia mauri dalana idia haidaua totona, Dirava ena Hereva amo taravatu namodia be hora momo lalodiai ia hadibadia mai ena haheauka bada ida. To George ia laloa unai hekwarahi be mai anina namona, unai be momokani, unai natudia edia mauri dalana ia idau be ia itaia neganai.

Mexico taoni ladana San Salvador Atenco dekenai hanua tauna ta ladana José ia noho, ia be mai ena natudia 9. Ia be inuinu momo tauna, bona iena natudia be ia dekenai idia gari badina ia inuinu kekero neganai ia dagedage bada. Edia ruma be hanaihanai ia miro, bona edia doniki bona boroma be ruma ena magu lalonai idia noho bona edia ura hegeregerena ruma lalonai danu idia vareai. Unai dainai, natudia be bogana gorerena idia abia, bona nega haida toto dikadia ese edia tauanina ibounai idia koua.

José be Iehova ena Witness taudia ida Baibel ia stadilaia hamatamaia neganai, edia mauri dalana ia idau. Inuinu kekero momo karana ia rakatania bona ena natudia dekenai tamana momokani bamona ia kara henidia. Natuna maragina ta be ia heagi, ia gwau, “Hari, tamagu ida ai gadara diba!” Hari, unai taoni dekenai edia ruma be ruma goevana ta​—guna ia be taoni ena ruma mirona ta. Boroma bona doniki be magu idauna amo idia koudia, bona hanaihanai unai ruma bese be inuinu ranuna idia nadua. Edia gabu ia goeva ia lao dainai, natudia edia tauanina idia goada bona idia moale bada.

Inai haheitalai rua ese idia hahedinaraia hegeregerena, nega momo natudia durudia dalana be tama sina durudia. World Summit for Children dekenai idia gwauraia herevana dekenai idia gwau “natudia ubudia bona naridia maduna badana be ruma bese ena.” Ruma bese taudia be edia natudia idia ubudia bona idia naridia eiava lasi be edia moni ena bada hegeregerena sibona lasi, to edia diba hegeregerena danu.

Dala ai Ia Noho Natuna Ena Kara Idia Haidaua

Brazil dekenai, ena tamana ia mase neganai Domingos ena lagani be 9 sibona. Iena sinana ia headava lou neganai, idia siaia lao haraga tama sina lasi natudia edia ruma ta dekenai. Unuseniai idia hahisia dainai, unai gabu idia heautania gwauraia memero edia orea lalonai ia vareai. Ena be iena sinana be iena palani ia kamonai neganai ruma bese ai ia abia dae lou, to sinana ena adavana matamatana ese ia botaia momo dainai, ia laloa ruma do ia rakatania be namo. São Paulo ena dala ai idia noho natudia tausen momo bamona ia noho; tamaka idia hagoevadia, loli idia hoihoilaidia, bona drag idia laohaidia, idia mauri noho totona.

Nega ginigunana Domingos be Iehova ena Witness taudia edia Kingdom Hall dekenai ia ginidae neganai, ia abidadama henidia diba lasi bona ia hemataurai lasi​—guna iena noho dainai ita hoa lasi. To herevana, Witness taudia badadia dekenai ia tabekau henia matamaia, bona iena Baibel stadi amo idia durua mauri ena taravatu namodia ia badinadia totona. Gabeai ia davaria ia be Dirava bona ma haida ia abidadama henidia diba. Witness taudia ese idia durua gaukara ia abia totona, guna ia be biriki gaukaralaia gaukarana ia karaia bena gabeai opesi gaukarana ia karaia. Hari, lagani haida murinai, ia be ful-taim Keristen hesiai tauna ena gaukara ia karaia.

Inai haheitalai ese idia hahedinaraia orea ta be hebogahisi idia hahedinaraia neganai, tanobada ena natudia edia hisihisi haida idia kokidia diba. To, momokani, Iehova ena Witness taudia idia diba taunimanima be edia gaukara amo dika iboudiai do idia haoredia lasi. Tanobada ena natudia edia hekwakwanai haoredia momokani totona, namona be ta ese taunimanima edia goada ia hereaia siahuna, bona kohu momo herea, bona tanobada ibounai lohiaia siahuna do ia gaukaralaidia.

“Guba Matamatana” ese Tanobada Do Ia Hanamoa

Dirava sibona be hekwakwanai iboudiai hanaidia dalana ia henia diba. Unai dainai, Isaia ena peroveta hereva ia gwau, “tanobada matamatana” do ia vara neganai “guba matamatana” danu do ia vara. Nega momo Baibel ia gwauhamata “guba matamatana” do ia vara. (Isaia 65:17; 2 Petero 3:13; Apokalupo 21:1) Ia hahedinaraia lou lou Dirava ese unai “guba matamatana” do ia haginia be mai anina bada, hisihisi ibounai kokia bona tanobada dekenai kara maoromaoro havaraia totona. Unai “guba matamatana” be dahaka?

Baibel lalonai nega momo inai hereva “guba” anina be lohia dalana, Dirava ena eiava taunimanima edia. (Daniel 4:​25, 26 itaia.) Hari, unai gavamani matamatana be guba Basileiana, Dirava ena Basileia​—Iesu ese iena hahediba taudia ia hadibadia unai totona do idia guriguri. (Mataio 6:10) Dirava ena Basileia be siahu do ia abia tanobada ena natudia ia hadikadia gwauraia dikadia iboudiai ia kokidia totona, bona momokani do ia karaia.

Edena bamona ita diba do ia vara momokani? Badina gavamani be ia lalonai idia lohia taudia edia kara ia hahedinaraia. Unai dainai, Dirava ena Basileia be Dirava ena taravatu bona iena Natuna, Iesu Keriso, Dirava ese King ai ia halaoa tauna, ena taravatu hegeregeredia do ia lohia. Idia ruaosi idia hahedinaraia natudia edia namo idia laloa bada.​—Salamo 10:14; 68:5; Mareko 10:14.

Unai gwauhamata Basileiana, “guba matamatana” unai, be mai ura bada ida ita naria noho lalonai, ita gaukara noho diba iseda gabu ai natudia edia noho ita hanamoa totona. World Summit for Children be mai maoro danu edia hereva dokona ai idia gwau hegeregerena: “Natudia iboudiai vaira negana namona henidia karana ia hereaia gaukarana ta be lasi.”

[Box on page 11]

Natudia Durudia Dala Namona Ta

Iehova ena Witness edia hadibaia gaukaradia amo natudia idia durudia diba ela bona hanaihanai. Unai gaukara haida be inai:

Taunimanima badadia idia hadibaia. Tama sina, idia duahiduahi diba lasi bona idia toretore diba lasi taudia, idia durudia duahiduahi bona toretore idia dibaia totona, bona Baibel herevadia idia hadibadia momo, edia natudia do idia naridia namonamo totona.

Ruma bese idia sisiba henidia. Baibel ese tama sina ia hadibadia​—idia ogogami momokani taudia danu​—edia natudia iboudiai do idia naridia, namo lasi haida idia siaidia lao varavara dekenai idia noho totona. Emu Ruma Bese Hamoalea Dalana bukana be hekwakwanai badadia idia abia ruma besedia ia durudia bada.a

Natudia ida idia gaukara hebou bona idia hakaudia. Natudia be sibodia edia edukeisini, gorere koua karana, bona gabu hagoevaia karadia idia karaia neganai, unai ese anina bada ia havaraia. Nega momo Witness taudia be natudia ida Baibel idia stadilaia, buka haida, Lau Egu Baibel Sivarai Buka bona Memero Kekeni Edia Henanadai​—Haere Maorodia hegeregeredia idia gaukaralaidia; unai amo idia durudia, edia ruma bese lalonai hekwakwanai do idia hanaia bona do idia goeva totona.b

Noho goeva bona gorere koua daladia idia hadibalaidia. Iehova ena Witness taudia be gado 75 dekenai Noga! magasin idia printaia, bona ia lalonai nega momo noho goeva daladia herevadia idia toredia.

Nega dikadia ai idia durua. Nega dikadia ai, Iehova ena Witness taudia be dala idia karaia haraga bena dika idia vara gabudia ai heduru idia henia diba.

[Footnotes]

[Pictures on page 10]

Tanobada ena natudia edia hekwakwanai hanaidia totona, namona be taunimanima edia goada ia hereaia siahuna ia noho. Dirava sibona be unai dala ia karaia diba