Edukeisini Atoa Ena Gabu Korikorina Dekenai

LAULAU ia penia tauna ia diba edena dala amo iena laulau lalonai vairanai idia noho gaudia do ia hahedinaraidia goevagoeva. Edia toana ia torea goevagoeva to huanai bona murinai idia noho gaudia dekenai unai ia karaia lasi. Iseda mauri lalonai ita karaia gaudia be unai bamona danu. Haida ita atoa guna bona haida be murinai ita atoa.

Iesu Keriso ia gwau: “Hekokoroku lasi momokani taudia be idia namo, badina Guba Basileia be idia edia.” (Mataio 5:3) Unai dainai, lauma gaudia ita atodia guna be gau badana. To, tauanina gaudia be murinai ita atodia be namo.

Edukeisini be edeseniai oi atoa? Keristani tauna dekenai ia be anina maragi gauna lasi. Edukeisini ia abia be namo Paulo ese ia gwauraia Baibel maduna huaia totona: “Bema tau ta ese iena varavara ia naria lasi, o iena ruma taudia ia ubua lasi neganai, ia ese iena abidadama Keriso dekenai ia negea vadaeni. Iena dika ese abidadama lasi murimuri tauna ena dika ia hanaia vadaeni.” (1 Timoteo 5:8) Bona danu Iesu ese ena hahediba taudia ia oda henidia, diba tahua taudia do idia karaia, ‘idia dekenai do idia hadibaia, idia dekenai ia henia hereva ibounai be do idia badinaia.’ Unai karaia totona ta ese ‘diba do ia abia’ bena haida do ia hadibadia namonamo.​—Mataio 28:​19, 20; Ioane 17:3; Kara 17:11; 1 Timoteo 4:13.

To, edukeisini be ena gabu korikori dekenai ita atoa be namo. Namo lasi ita sikuli badina ita ura diba bada ita abia sibona dainai, eiava kwalimu pepadia idauidau ita abia sibona dainai. Edukeisini ita atoa guna neganai, lalo-hekwarahi ia havaraia diba. Momokani, hahenamo haida ia havaraia diba to idia noho daudau lasi. Aonega Pavapava Solomon be inai bamona ia hereva: “Badina be tau ta ese sedira mai aonega, bona lalona kehoa, bona mai ena diba bada do ia karaia gaudia ibounai do ia rakatania, bona ia hekwarahi lasi tauna ese unai gaudia do ia abia.”​—Hadibaia Tauna 2:21.

Iehova ena Witness taudia be edukeisini idia ura henia, diba sibona idia abia totona lasi, to Dirava ena hesiai gaukara idia karaia namonamo bona sibodia idia naridia totona danu. Momo ese moni gaukara idia karaia sibodia naria totona, badina edia haroro gaukara be davana lasi gaukarana. Iehova ena Witness taudia edia ful-taim hesiai painia taudia dekenai, unai be maduna badana. Idia sibodia naria totona eiava bema idia headava, edia ruma bese taudia naridia totona, moni gaukara idia karaia bona edia haroro gaukara sediual idia badinaia namonamo danu.a​—Aonega Herevadia 10:4.

Iehova ena Witness taudia haida be gau ibounai idia laloa namonamo guna murinai, sikuli ma ta idia abia hidi. Oibe, idia naria namonamo, edukeisini be ena gabu korikorina ai do idia atoa totona. Dahaka ese ia durudia, unai idia karaia diba totona? Brazil merona ladana John ia gwau: ‘Gau haida ese lau idia durua. Ena be hanuaboi ai lau stadi to egu Keristani hebou lau readia lasi. Bona nega ginigunana amo egu klas taudia lau hadibadia lau be Iehova ena Witness tauna ta.’

Brazil merona ma ta, ladana Eric, be sikuli ma ta dekenai ia lao noho lalonai, ia ese nega namodia ia davaria neganai, ia abidadama henia gaudia be taunimanima dekenai ia gwauraia hedinaraia. Ia gwau: ‘Lau laloa sikuli gabuna be egu spesel teritori bamona. Lau ese tisa bona stiuden haida ida Baibel stadi lau karaia, hari ima be idia bapatiso bona rua be elda gaukara idia karaia.’

Richard be pat-taim sikuli dekenai ia giroa lou drafting gaukara ena kwalimu pepana ia abia totona. Ia gwau: ‘Egu sikuli ese lau ia durua gaukara lau abia, lau bona egu adavana naria totona, bona iduara ia kehoa danu ma dala idauidau dekenai. Kingdom Hall haginia haraga gaukara idauidau dekenai lau lao, bona gaukara gunalaia taudia danu lau herevahereva neganai, lau davaria idia ura bada drafting gaukara karaia taudia.b Sikuli dekenai lau dibaia gaudia be hari unai gaukara dekenai lau gaukaralaidia namonamo. Bona danu, lau bona egu adavana ai ura Iehova ena Witness taudia edia hedikwota dekenai do ai gaukara, eiava intenesenel konstraksen gaukara do ai karaia.’

To ma danu, ena be Iehova ena Witness taudia momo be sikuli ma haida dekenai idia lao lasi, idia sibodia bona edia ruma bese idia naridia diba. Mary ia gwau: ‘Dina rua wiki ta lalonai lau ese ruma hagoevaia gaukara lau karaia sibogu lau naria totona. Egu davana hora ta ta ai be idia totona lau gaukara taudia edia davana ia hanaia. To lau laloa lauegu gaukara be heduru gauna sibona. Lau ia durua painia gaukara lau karaia noho totona bona lau lalohisihisilaia lasi.’

Steve be unai bamona ia laloa danu. Ia gwau: “Painia gaukara lau hamatamaia neganai, haida idia gwau, ‘Bema oi headava bona bese oi havaraia, dahaka do oi karaia? Emu moni do ia hegeregere, a?’ To lau be gaukara idauidau lau karaia vadaeni dainai, lau be mai egu diba gaukara idauidau karaia totona. Hari lau be mai egu adavana, bona lau davaria egu gaukara gabuna dekenai lauegu davana be bada, koledi amo idia doko taudia edia ia hanaia, bona ia hegeregere lau bona egu adavana naria totona.”

Hereva momokani lalonai idia noho lasi tama haida idia ura edia natudia be sikuli ma haida dekenai idia lao. Baibel ena hereva hegeregerena, unai idia karaia be maoro. Bema unai bamona ia vara, Mataio 6:33 ena hereva hegeregerena, matamata taudia ese kosi namona ta idia abia hidi diba. Unai kosi ese ia durudia Iehova ena hesiai gaukara idia karaia namonamo totona, eiava idia sikuli noho lalonai ful-taim hesiai gaukara idia karaia diba totona.

Mai Anina Bada Edukeisini

Herevana edia diba be bada eiava maragi, Iehova ena Witness taudia iboudiai be gau ta dainai idia hegeregere. Idia diba mai anina bada edukeisini ena badina be Dirava ena Hereva, Baibel sibona lalonai. Ioane 17:3 ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” Herevana Keristani tauna ese edena bamona edukeisini ia abia, to Iehova bona ena Natuna, Iesu dibaia karana ia atoa guna be gau badana.

Keristani taudia ginigunadia ese unai kara idia hahedinaraia. Manaena “be king Heroda ena [sikuli] turana gunana ta” to ia be Antioka ena kongregesen edia peroveta bona tisa taudia danu ia noho bona ia gaukara. (Kara 13:1) Paulo danu be unai bamona, ena diba be hari inai nega ena iunivesiti edukeisini ena diba ida ia hegeregere. To, Keristani tauna ai ia lao neganai, ena diba be gabu korikorina ai ia atoa. Ia gaukaralaia lasi haida hahoadia totona, to ena diba taunimanima edia kara, taravatu bona sivarai dekenai ia gaukaralaia, taunimanima idauidau dekenai ia haroro totona.​—Kara 16:​37-40; 22:3; 25:​11, 12; 1 Korinto 9:​19-23; Filipi 1:7.

Taunimanima ese Keristani ginigunadia, be edia diba bada dainai idia lalodia tao lasi. Idia momo be “sikuli bada lasi bona aonega bada lasi taudia,” rabi edia sikuli dekenai idia lao lasi. Unai anina be idia be diba lasi taudia, a? Lasi, to unai tatau bona hahine be mai edia diba edia abidadama harorolaia namonamo totona​—unai ese ia hahedinaraia idia be mai goada ida diba idia tahua.​—Kara 4:13.

Unai dainai, Keristani taudia ibounai be edukeisini idia ura bada. Bona ma danu, idia hekwarahi bada, ‘gau namodia edia toana do idia diba’ totona, bona edukeisini​—bona edia ura gaudia haida​—be edia gabu korikori dekenai idia atodia totona.​—Filipi 1:​9, 10.

[Footnotes]

[Box on page 7]

Ena Kara Namo Dainai Ia Hanamoa

Lagani ta ia do noho ela bona ena haisikuli kwalimu pepana do abia neganai, Matthew ese Iehova ena Witness taudia edia ful-taim hesiai gaukarana do ia karaia bona sibona do ia naria dalana ia lalohadailaia namonamo. Matthew bona ena tama sina ese unai idia gurigurilaia murinai, idia laloa sikuli ma ta dekenai ia lao be namo, unai ese do ia durua ena ura ia hagugurua totona. Vadaeni, skolasip totona aplikeisen ia atoa. Matthew ena sikuli sisiba henia tauna ese hanamoa revarevana ta ia torea bona ena aplikeisen dekenai ia hakapua. Ia gwau:

“Lau moale bada, badina idia hanaia lagani rua mai kahana lalonai, lau be Matt ena sisiba henia tauna bona ena turana. Matt be mero namo hereana . . . Ena hetura karana ai bona ena kara haida amo, ia hahedinaraia ena abidadama ia goadalaia momokani.

“Idia hanaia lagani lalodiai, Matthew be haroro gaukara karaia dalana ia dibaia noho. Iena tomadiho orea edia hesiai taudia be davana idia abia lasi. Edia gaukara be lalokau dainai idia karaia. Matt be sibona ena namo ia tahua lasi, to haida durudia dalana ia tahua mai ena ura ida. Inai sikolasip ese inai Dirava ena hesiai tauna ia durua diba, sibona do ia naria, haroro gaukara ia dibaia bona volantia gaukara ia karaia noho totona.

“Matt ese volantia gaukarana bona taunimanima durua gaukarana ia karaia dalana be inai: Saturday bona Sunday, sikuli murinai bona holidei ai, hora momo lalonai ruma-ta-ruma-ta haroro gaukara ia karaia. Ia ese taunimanima idauidau ida ia gaukara hebou. Matt ese matamata taudia bona buruka taudia ida Baibel stadi ia karaia, bona unai amo iena diba gunalaia gaukara dekenai ia hahedinaraia. . . . Ia ese taunimanima ia hagoadadia diba, sibodia edia kara namodia idia hahedinaraia totona. Tisa taudia idia gwau klasrum lalonai iena kara ese nega ibounai haida ia hagoadaia. Ena klas lalonai ia ese herevahereva ia gunalaia bona mai aonega ida ia hereva. . . .

“Matt be mai moale ida lau sisiba henidia memero namona ta. Iena sikuli turadia bona tisa taudia ese idia ura henia bona idia matauraia. Iena laloa maoromaoro karana be herea.”

[Pictures on page 9]

Iehova ena Witness taudia be edukeisini idia ura bada badina idia ura Dirava ena hesiai gaukara idia karaia namonamo