Moni Bada Lasi Gabudia ai, Gaukara Havaraia

NOGA! TORETORE TAUNA SENEGAL AI ESE IA TOREA

LAGANI 16 kekenina ia maragi neganai, iena tamana ese iena sinana bona edia natudia 8 ia masetania. Hari iena sinana ia buruka ia lao dainai ruma bese durua totona gaukara ia davaria be mai anina. Iena sikuli haorea urana ia ore vadaeni. Ena be iena edukeisini be bada lasi bona iena diba be maragi, to namona be moni gaukara do ia karaia.

Moni bada lasi tanodia ai, unai bamona maurina be nega momo idia vara. Ena be haida be iunivesiti haorea pepa idia abia, to moni gaukara davaria be auka. To herevana, momo be mai lalo-goada bona mai edia gaukara havaraia urana dainai sibodia ese edia gaukara idia havaraia. Reana idia havaraia gaukaradia amo do idia taga lasi, to Baibel be 1 Timoteo 6:​8 ai ia gwauraia hegeregerena, ia gwau: “Bema ita be mai iseda aniani bona dabua neganai, moni dekenai ita laloa momo lasi be namo.”

Unai sisiba ita laloa noho lalonai, namona be moni bada lasi tanodia ai idia noho Keristani taudia ese mai aonega ida idia havaraia bisinesi namodia mani ita itaia.

Aniani Hoia​—Africa Dalana Ai

Hanaihanai taunimanima be aniani idia ura abia. West Africa ai, diba momo hahinedia ese unai ura idia hagugurua bona unai amo moni idia abia. Haida ese kalaga maragina ta idia karaia, ruma haginia gaukara gabuna ta badinaia ai bona unuseniai idia gaukara taudia edia dina tubua aniani idia nadua. Ma haida be daba aniani idia karaia gaukara dekenai idia lao taudia totona. Teibolo maragina ta idia haginia, ranu idia hasiahua, bena aniani sisina idia hegaegaelaia​—kofi bona sikoni mai ena bata. Adorahi ai edia bisinesi maragina idia hamatamaia lou bona aniani maragina idia hoihoilaia gaukara idia rakatania taudia dekenai. Unai bamona gaukara ena anina be sediual aukana oi badinaia, to idia gaukara goada taudia ese edia mauri durua gaudia idia abia diba.

Dala ia noho aniani maragidia hoihoilaia totona. Hegeregere, taunimanima momo gabuna maketi kahirakahira ai, hahine haida be pinati idia nadua. Fatayas​—miti pai maragidia mai edia urehegini vasiahu—​idia hoia haraga. Mai ena mamina namona vamu, paraoa lalonai, idia hoihoilaia haraga danu. Africa tanodia, hegeregere The Gambia bona Mali lalonai unai bamona aniani idia haorea haraga.

Guinea-Bissau bona Senegal lalonai, ful-taim hesiai gaukara idia karaia Iehova ena Witness matamata taudia momo ese inai gau, taunimanima momo idia ura gauna idia hoihoilaia: keike maragidia. Moses, Senegal ena siti badana, ladana Dakar, dekenai, ia noho tauna ta, ia gwau: “Lau bona egu adavana be spesel painia gaukara [ful-taim hesiai gaukara] ai karaia hebou neganai, bena natudia ai havaraia matamaia. Idia lau ubua namonamo totona, keike hoihoilaia lalohadaina lau abia.

“Matamanai egu moni be sisina sibona, unai dainai egu moni bona bisinesi ena moni, paraoa bona gatoi abia totona, lau hapararaia namonamo. Hari lau hoihoilaia keike amo lau abia monina be hegeregere egu famili maragina naria totona.

“Heduru monina abia totona, egu adavana Esther, be ruma ai dabua ia turia. Bena aiemai memero rua ia naria diba ruma dekenai. Ena be nega aukana lalonai ai mauri noho, to ai ruaosi ese aiemai famili ai ubua diba.”

Bisinesi haginia lalohadaina ma ta be inai: Gaukara taudia idia bisi bada bona nega be lasi maketi dekenai idia lao totona, unai dainai au huahua eiava uma aniani hoihoilaia gabudia maragidia amo do idia hoia. Unai hoihoi taudia haida ese edia uma aniani idia abia lao taunimanima edia ruma dekenai. Bema emu bisinesi lalonai oi kara mai ena momokani bona dava bona toana idia namo gaudia oi hoihoilaia, idia hoia taudia ese edia turadia do idia hamaoroa. Naria namonamo ena davana oi habadaia momokani lasi, taunimanima idia giroa lao maketi badana dekenai garina.

Haida Totona Oi Gaukara

Bema hoihoilaia gaukarana oi ura lasi, reana taunimanima idia ura lasi karaia gaukaradia oi karaia diba. Hegeregere, ruma hagoevaia, nadunadu, dabua huria bona aeania gaukara idia karaia taudia idia tahua hanaihanai. Gaukara davaria daladia ma haida idia noho danu.

Davara, eiava gwarume idia hoihoilaia maketi kahirakahira ai oi noho, a? Reana gwarume oi hagoevaia haraga diba bona dava maragi oi noia. Unai gaukara karaia totona, au ena kahana namona ta bona gwarume utua namonamo kaiana ta oi abia be hegeregere. Bisinesi namona ta be motuka hagoevaia. Dahaka do oi gaukaralaia? Baketi ta, ranu haida, sopu sisina, bona dabua namona ta. Dakar lalonai, bisinesi idia diba momo matamata taudia idia lao motuka idia atoa gabudia dekenai bona idia siahu bada lasi daladia momo dekenai unai gaukara idia karaia.

Emu gabu dekenai ranu lasi hekwakwanai be nega momo ia vara, a? Nega haida hahine be laini idia karaia ranu abia totona bona hora momo lalonai idia naria. Bena ranu dogoatao gaudia mai edia metau idia huaia ela bona ruma dekenai idia ginidae. Momo idia moale ranu idia udaia taudia edia davana henia totona. Bema oi ura unai gaukara dekenai oi kwalimu, gau badana be dabai momokani oi ginidae bona emu ranu huaia gaudia oi hahonua haraga bona atoa emu uilibaro lalonai, eiava doniki ia veria gauna dekenai. Harihari ranu oi abia lao diba taunimanima edia ruma eiava gaukara gabudia dekenai.

Sikuli oi haorea, a? Reana sikuli memero kekeni maragidia, Saturday bona Sunday ai, oi durua diba moni abia totona. Moni bada lasi tanodia ai klasrum momo be natudia amo idia honudae dainai, reana tama sina momo idia ura edia natudia be edukeisini namona idia abia, bona do idia moale moni idia henia unai heduru abia totona.

Oi gaukaralaia diba ma ta be huina pania. Africa lalonai taunimanima momo be unai sitailo idia ura abia dainai, idia karaia diba taudia be moni abia totona idia karaia.

Emu Diba Gaukaralaia

Baibel negadia ai, aonega hahine ese moni abia daladia namodia ia davaria diba. Aonega Herevadia 31:24 ai ia gwau: “Hahine namona ese, dabua namo herea idaudia ia karaia, do ia hoia totona. Gaba gaudia danu ia karaia noho, hoihoi taudia dekenai ia hoidia lao.” Unai hegeregerena, moni bada lasi tanodia taudia momo ese bisinesi maragidia o famili bisinesi idia karaia. Haheitalai ta be kapenta gaukara; sitoa maragina dekenai helai gaudia, pata, eiava ruma dekenai idia gaukaralaia gaudia idia karaia. Kapenta tulu momo do ia hoia lasi. Reana animal naria gaukara oi diba vadaeni dainai, kokoroku oi ubudia bena hoihoilaia diba bona edia gatoi oi hoihoilaia diba danu.

Bema oi ura bisinesi oi hamatamaia, bisinesi havaraia dibana be gau badana. Haida be taunimanima ese idia negea vadaeni tini idia haboua bona idia amo sutkeisi o maua badadia idia karaia. Ma haida be motuka ena taea amo tamaka idia karaia. Ma haida be motuka edia taea gunadia edia tiubi amo baketi idia karaia. Oi karaia diba gaudia edia hetoana be oiemu lalohadai ese do ia havaraia.

Moni bada lasi tanodia lalonai, diba bona hekwakwanai hanaia urana be gau badana bema oi ura oi mauri noho. Haheauka karana rakatania haraga lasi. Namona be oi gini hegaegae emu moni gaukara oi haidaua totona. Bema oi ura bisinesi eiava gaukara ta oi hamatamaia, gau badana be emu gabu dekenai idia noho taravatudia oi diba guna. Dirava ena ura be Keristani taudia ese edia gavamani ena taravatu idia matauraia.​—Roma 13:​1-7.

Gau ta oi do hoihoilaia toho eiava karaia lasi neganai, sibona oi nanadaia: ‘Inai gabu dekenai taunimanima ese dahaka gaudia idia ura abia bona edia kastom be dahaka? Bisinesi momo idia heau namonamo, eiava moni be lasi? Idia ura abia taudia ese lau hoia gauna ena davana idia henia diba, a? Taunimanima momo ese unai gau idia hoia danu o unai gaukara idia karaia vadaeni, a? Lauegu diba, goada, ura, egu nega biagua karana, bona gau iboudiai karaia namonamo karana do ia hegeregere unai bamona gaukara totona, a? Bisinesi hamatamaia moni be bada o maragi? Abitorehai do lau abia, a? Unai abitorehai do lau henia lou diba, eiava?’

Iesu be Luka 14:28 ai henanadai namona ia henia: “Bema tau ta ia ura kohoro ruma do ia haginia, ia be guna do ia helai diho, bona haginia ena davana do ia laloa, bema ia be ruma do ia karaia haorea diba, o lasi?”

Momokani, haida edia diba eiava edia goada be hegeregere lasi idia sibodia be bisinesi idia haginia totona. To Iehova Dirava ese oiemu hekwarahi bona gaukara, bema badina namona dainai oi karaia, do ia hanamoa diba. (2 Petero 1:5 itaia.) Namona be oi hekwarahi gaukara davaria totona​—reana unai ena anina be oi sibona ese do oi havaraia!

[Pictures on page 18, 19]

Dabua turia, motuka huria, ranu utua, bona gwarume hagoevaia be taunimanima edia moni abia daladia haida