Aniani be Hegeregere Ibounai Totona!

NOGA! TORETORE TAUNA BRAZIL AI ESE IA TOREA

ANIANI momo dainai ita moale diba, aniani namodia momokani dainai, to ita do lalohisihisi noho. Moale momokanina be hanaihanai ita abia totona, ma gau ta danu ita abia be namo​—lauma aniani unai. Iesu ia gwau: “Aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri ia henia.”​—Mataio 4:4.

Danu, Dirava ena Hereva dadaraia karana ese lauma hitolona ia havaraia, Amosa 8:11 ese ia perovetalaia bamona: “Lau ese emui tano dekenai hitolo do lau havaraia. Taunimanima be do idia hitolo, to paraoa totona lasi. Idia be do idia ranu mase, to ranu totona lasi. Do idia hitolo bona ranu mase gauna be Lohiabada ena hereva totona.” To, lauma dalana ai hitolo karana ita koua diba. Iesu ia gwau: “Idia diba lauma gaudia idia tahua be namo taudia idia moale, . . . kara maoromaoro hitolona idia hitolo bona ranu masena idia ranu mase taudia be idia moale, badina be edia bogana do ia kunu.” (Mataio 5:3,6, NW) Bema aniani namona iseda sikele hegeregerena ita abia, iseda tauanina ia hagoadaia; unai hegeregerena, lauma dalanai ita idia hagoadaia aniani ese iseda abidadama bona iseda helaro vaira negana totona idia hagoadaia. Edena bamona tanobadana ita helarolaia diba?

Aniani be Momo Iboudiai Totona

Tanobada ta mani oi laloa, ia dekenai tauanina durua aniani momo mai ena mamina namodia idia noho. Unai tanobadana dekenai tuari bona hisihisi do idia vara lasi; unai gaudia dainai hitolo bona gorere idia vara bena taunimanima idia hamanokaia bona edia lalona idia hametaua. Unai neganai ruma lasi taudia be lasi, bona moni gaukara lasi dainai haida ese idia henia vasiahu sibona idia ania taudia be lasi, eiava aniani ena davana bada dainai taunimanima ese aniani dikana do idia ania lasi idia boga kunu totona. “Koni momo herea, be tano dekenai do ia vara namonamo . . . ororo gabudia danu dekenai, uiti bona aniani avadia do idia tubu namonamo.” (Salamo 72:16) To edena bamona unai do ia vara? Hitolo ena hekwakwanai be daika ese do ia kokia diba?

Iseda Havaraia Tauna be lalokau dalana ai taunimanima edia ura aniani namodia do ia henia. Tanobada ena siahu bona paraka do ia naria dainai, uma edia aniani do idia dika lasi. “Lohiabada ese gau namodia ai dekenai do ia henia . . . bona aiemai tano ese ena anina do ia havaraia bada herea.” (Salamo 85:12) Inai danu, ena be tanobada be hegeregere aniani momo do ia havaraia, to Dirava ena Basileia sibona ese mataganigani bona dagedage karadia be do ia hadokoa; unai kara dainai aniani idia haridia kerere, bena haida edia aniani be hegeregere lasi dainai, edia tauanina idia manoka, bona idia lalohisihisi.

Oibe, Iehova ena guba gavamani ese biru daladia bona aniani namodia laohaia daladia do ia naria namonamo. Basileia ena naria gaukarana lalonai, haida sibona do idia taga lasi, bona momo be edia mauri durua gaudia abia totona do idia hekwarahi bada lasi. Daradoko bona lalo-metau edia gabu ai, Basileia do ia abia mai hahenamodia do idia noho, Isaia 25:6 ai ia perovetalaia ariana badana ena moale do idia havaraia: “Iniseni, Siona Ororo ena latanai, Siahu Ibounai Lohiabada ese tanobada ena bese idauidau ibounai totona aria do ia karaia. Inai aria dekenai be aniani namodia momokani, bona uaina danu namo herea.”

Hari inai nega ena gaukara helulu dalana, ena lalo-metau, bona ena hebogahisi lasi karadia be do idia ore momokani negana mani oi laloa. Ta be ena aniani ia hegeregere lasi dainai ena tauanina do ia manoka lasi, eiava do ia gorere lasi. Unai dainai, bema oi ura unai tanobada matamatana lalonai emu mauri oi moalelaia, Iesu ena hereva oi badinaia: “Umui gaukara lasi aniani ia ore gauna abia totona, to do ia noho, ia lao bona mauri hanaihanai, ena aniani abia totona do umui gaukara.”​—Ioane 6:27.