Beibi Abia Loaloa Daladia Idauidau—Africa Bona North America Edia Dala

NOGA! TORETORE TAUNA NIGERIA AI ESE IA TOREA

TANOBADA ai taunimanima be dala idauidau ai edia beibi idia loalaidia. North America taudia edia dala bona Africa taudia edia be idia idau vaitani.

Unai tano ta be moni momo gabuna, ma ta be idau. Unai dainai sedira edia beibi loalaidia daladia danu idia idau momokani be ita hoalaia lasi. North America ai idia noho taudia edia dala mani ita tahua guna.

North America Taudia Edia Dala

United States dekenai bona ma gabu haida dekenai, momo ese edia beibi be pram dekenai idia abia loaloa. Bona vanegai laganidia lalonai pram idia haidaudia dainai, gaukaralaia be hekwarahi lasi bona beibi edia mamina be namo. Momo be mai edia kusini namo herea, idia kokia diba bona idia huria diba gaudia, bona ataiai helai gaudia danu.

Pram lalodiai maragidia idia laga-ani diba, edia aena idia hisihisi neganai. Bema beibi ta ia ura mahuta, pram be ena bedi mai ena uili bamona ai ia lao diba. Ia hesiku beibina be pram hamarerea karana amo oi hamainoa diba.

Pram gaukaralaia karana ese tama sina edia maduna ia hamaragia. Sina ta ia gwau: “Gabu idauidau ai beibi huaia be auka, to pram gaukaralaia be auka lasi.” Natu ta be ia maragi neganai huaia be auka lasi, to ena tauanina ena metau ia bada ia lao neganai huaia be auka. Danu, tama sina be idia moale, bema idia diba edia natuna be pram lalonai ia noho namonamo bona unai pram idia doria namonamo diba.

United States lalonai, pram idia karaia namonamo, do idia hamorua haraga diba lasi totona. Namona be bereiki ia auka bona beibi ese ia hamarerea diba lasi gabuna dekenai ia noho. Pram be sibona do ia lokua gaudia latches, idia atoa. Idia naria namonamo, beibi ena imana be reana do idia hakapua tao gaudia do idia atoa garina. Sea beletana ese beibi ia naria diba, dika ia davaria lasi totona.

Pram edia davana be K25 mai kahana amo ela bona K200 eiava K260 bamona. Pram namodia haida edia davana be K400 kahirakahira. Unai pram be mai ena bosea bada herea, medu eiava dina ese pram ia hadikaia lasi, ena uili be gabu idauidau dekenai idia giroa diba, bona idia lokua haraga diba. Bona “joggers pram” idia karaia danu. Tama sina idia heau neganai edia beibi be unai pram lalonai idia doria diba, ena davana be K500 bamona.

Africa Taudia Edia Dala

Africa dekenai, bona Asia ena tano momo dekenai, sina momo ese edia beibi idia kwatua edia doruna dekenai, guna edia sinadia bona tubudia idia karaia bamona. Africa taudia ese unai bamona karana idia gwauraia “Doruna ai beibi huaia karana,” bona unai be dava maragi herea dalana haragana. Idia gaukaralaia gaudia be edia goada bona dabua ta sibona. Dala haragana amo bona namona amo sina ia igo diho, bena beibi be ia atoa namonamo ena doruna dekenai bena dabua amo ia ese beibi ia kwatua ena doruna dekenai.

Beibi be unai bamona idia kwatua neganai haida idia moru, a? Unai ia vara momo lasi. Sinana ese beibi ia lokua neganai, imana ta amo beibi ia dogoatao bona imana ta amo ia kwatua. Idia bada vadaeni beibi be Nigeria hahinena ta ladana Blessing ese ia herevalaia, ia gwau: “Beibi be idia dagedage lasi; edia sinana idia dogoatao auka. Idia moale edia doruna dekenai idia helai neganai. Nega haida idia tai badina be idia ura edia sinana edia doruna dekenai do idia helai. To bema beibi ia marere momo neganai, ena sinana ese ena imana ta eiava rua be sibona ena imana henunai ia dogoatao ela bona dabua ia lokua namonamo.”

Beibi matamatadia edia aiona idia dogoatao namonamo totona, edia sinana ese dabua iharuana ia gaukaralaia, dabua ginigunana ia kwatua hegeregerena ia kwatua. Beibi matamatana eiava ia mahuta vadaeni beibi totona edia imana be dabua amo idia lokua. To idia bada vadaeni beibi be idia moale edia imana idia hamarerea diba neganai.

Lagani hida Africa hahine ese edia beibi be edia doruna dekenai idia huaia? Gunaguna, bese haida hegeregere Yoruba besena Nigeria ai, ese edia beibi idia huaia lagani toi bamona. To hari inai negai beibi be ena sinana ese lagani rua bamona ena doruna ai ia huaia. To bema sinana be beibi ma ta ia abia, beibi matamatana ese unai gabu ia abia.

Beibi be edia doruna ai idia kwatua namonamo dainai, herevana sinadia be edeseniai idia lao​—vadavada ai idia daekau bona idia diho, dala aukana ai idia raka bona motuka idia guia eiava motuka amo idia raka lasi​—to beibi idia moru lasi. Unai bamona huaia dalana be dava bada lasi bona beibi ena lalona ia hanamoa bada. Sinana ese ia tai beibina be ena doruna ai ia atoa; beibi ia mahuta, bona ena sinana be iena gaukara ma ia karaia lou.

Beibi ta ia mahuta noho lalonai bema ena sinana ese ena doruna amo ia kokia bona bedi latanai ia atoa neganai, namona be ia karaia namonamo, badina beibi momo idia moale lasi ta ese ia hanogaia neganai. Beibi ena sinana be ena ohena dekenai ia hekure namonamo bena beibi ia kwatua dabuana be metairametaira ia kokia, bena unai dabua be ena beibi ena hetaru gauna ai ia lao. Nega haida, pilo ta ia atoa beibi vairanai iena doruna ena mamina bamona mamina do ia abia totona.

Beibi be doruna ai huaia karana be mai ena namo ma haida danu. Unai huaia dalana ese sinana ia durua beibi ena hemami ia diba namonamo totona. Bema beibi be ia goada lasi, eiava ia moale lasi, eiava iena tauanina ia siahu, eiava ena napi ia paripari, sinana ese mamina ia abia. Danu, beibi be doruna dekenai huaia karana ena namo ia noho daudau. Buka ta ladana Growth and Development ia gwau: “Tauanina kahirakahira huaia karana ese maino bona lalokau ia havaraia beibi bona sinana huanai, bona unai ese badina namona ia atoa gabeai ma haida ida do ia hetura namonamo diba totona. Unai ia vara ena badina ta be beibi ese sinana ena kudouna regena ia kamonaia, guna ena sinana ena bogana dekenai ia noho neganai ia kamonaia hegeregerena.”

Beibi be unai idia moalelaia. Africa lalonai beibi be do oi itaia, mai edia moale ida edia sinadia edia doruna ai idia helai. Haida ese edia sinadia edia huina, taiana, eiava edia ageva danu idia gadara. Ma haida be edia sinadia be ane idia abia neganai idia danu idia abia.

Oibe, Africa taudia edia beibi huaia dalana be ia idau momokani North America taudia edia beibi huaia dalana amo. To unai dala ruaosi be hegeregere edia mauri daladia idauidau dekenai bona unai dala amo edia badina idia hagugurua.