9 Ladana Namana

ANINA BE DAHAKA?

Emu ladana namona ese do ia hahedinaraia gau haida be, oi laloa bada gaudia, emu abidadama, bona kara. Oibe, emu ladana ese gau ibounai ia hahedinaraia​—emu kara bona toana.

DAHAKA DAINAI EMU LADANA NAMONA BE GAU BADANA?

Emu ladana namona ena anina oi diba neganai, unai ese oi do ia durua emu abidadama dekenai oi gini goada bona oi ura lasi emu turadia ese oi idia biagua.

“Taunimanima momo be sitoa ai idia haginia doli o stetiu bamona. Idia atoa dabua be idia ese idia abia hidi lasi, to haida ese idia abia hidi.”​—Adrian.

“Tama sina be lau dekenai kara maoromaoro badinaia dalana idia hadibaia, herevana lau badinaia be mai ena hekwarahi. Lau diba daika lau tura henia be maoro badina edia kara lau diba, bona idia ida lau noho neganai lau diba dahaka lau karaia be namo.”​—Courtney.

BAIBEL ENA HAKAUA HEREVA: “Inai nega oromana ai idia noho taudia do umui tohotohoa lasi, to emui lalona do umui hamatamataia karana amo emui kara do umui haidaua noho.”​—Roma 12:2.

DAHAKA OI KARAIA DIBA?

Emu goada, emu manoka gaudia, bona oi abia dae gaudia oi laloa bena oi sibona oi nanadaia: ‘Hari lau be edena bamona tauna, bona gabeai lau ura edena bamona tauna ai do lau lao.’ Unai sibona lasi, to inai henanadai oi haerelaia be namo.

Goada: Lau be dahaka lau karaia diba? Dahaka kara lau hahedinaraia diba? (Hegeregere: Hanaihanai taim korikori lau badinaia, a? lau sibona lau biagua, a? lau gaukara goada, a? haida lau kara namo henidia, a?) Edena kara namodia lau karaia?

DALA MA HAIDA: Emu kara namodia oi diba eiava? Emu tama o sina o turana ta oi nanadaia, ‘Oi itaia lau ese dahaka kara namodia lau hahedinaraia be namo, bona dahaka dainai unai bamona oi hereva?’

BAIBEL ENA HAKAUA HEREVA: “Namona be ta ta ese sibona ena kara do ia tahua namonamo, vadaeni ia sibona dekenai do ia moale, bona ma ta ida sibona do ia hahegeregerea lasi.”​—Galatia 6:4.

Manoka: Edena kara lau haidaua be namo? Dahaka ese egu lalona do ia veria bena kara kererena do lau karaia? Edena gaudia dekenai sibona lau biagua be gau badana?

BAIBEL ENA HAKAUA HEREVA: “Bema ita gwau: ‘Ita dekenai kara dika be lasi,’ ita be sibona ita koia noho.”​—1 Ioane 1:8.

Abia dae gaudia: Edena taravatu lau badinaia noho, bona dahaka dainai? Dirava lau abidadama henia, a? Dahaka dainai lau abia dae momokani, Dirava be ia noho? Lau laloa edena kara be maoro lasi, bona dahaka dainai? Lau abia dae momokani dahaka gaudia be vaira negana ai do idia vara?

BAIBEL ENA HAKAUA HEREVA: “Oiemu laloa kehoa bona oiemu diba maoro ese, oiemu mauri do idia naria namonamo.”​—Aonega Herevadia 2:11.