11 Gaukara Goada

ANINA BE DAHAKA?

Idia gaukara goada taudia be idia hesiku lasi. To, mai edia moale ida idia gaukara goada, unai amo edia ura gaudia do idia abia bona ma haida do idia durua​—herevana edia gaukara amo ladana bada do idia abia eiava.

DAHAKA DAINAI GAUKARA GOADA BE GAU BADANA?

Gaukara momo ita karaia be namo, herevana ita ura eiava lasi. Inai tanobada dekenai, momo be edia gaukara dekenai idia hesiku, to oi gaukara goada be mai ena namo.​—Hadibaia Tauna 3:​13.

“Lau dibaia gauna ta be oi gaukara goada neganai, oi moale bona noho namonamo. Unai bamona hemami dainai, egu gaukara lau ura henia. Oi gaukara goada neganai, ladana namona do oi abia danu.”​—Reyon.

BAIBEL ENA HAKAUA HEREVA: “Hekwarahi ibounai ese davana namona idia henia noho.”​—Aonega Herevadia 14:23.

DAHAKA OI KARAIA DIBA?

Gaukara dekenai lalohadai maorona oi abia totona, namona be inai dala oi badinaia.

Emu gaukara namona oi moalelaia. Herevana ruma dekenai gaukara idauidau oi karaia, eiava oi idia henia sikuli ena homwek be ruma dekenai oi hagugurua, eiava moni gaukara oi karaia noho, namona be mai emu lalona o goada ibounai ida oi karaia. Bema gaukara ta oi karaia namonamo diba, vadaeni unai gaukara oi hanamoa momokani​—oi haorea haraga​—daladia oi tahua. Gaukara ta oi karaia namonamo neganai, do oi moale.

BAIBEL ENA HAKAUA HEREVA: “Iena gaukara ia karaia namonamo tauna oi itaia noho, a? Ia ese taunimanima momo ia hereaia noho, bona ia ese king taudia edia vairana dekenai do ia gini.”​—Aonega Herevadia 22:29.

Emu gaukara ena badina oi laloa. Nega momo, emu gaukara idauidau oi hagugurua namonamo neganai, unai ese ma haida ia durua. Hegeregere, ruma ai gaukara idauidau oi karaia namonamo neganai, emu famili memba taudia do oi durua bada.

BAIBEL ENA HAKAUA HEREVA: “Henia kara ena moale be bada, abia kara ena moale be maragi.”​—Kara 20:35.

Gaukara ma haida oi karaia. Gaukara sisina sibona oi karaia be hegeregere lasi, namona be oi hekwarahi gaukara ma haida oi karaia totona. Oibe, emu mauri oi biagua, anina be gaukara momo oi karaia badina oi ura dainai, to namo lasi oi karaia badina ta ese oi ia fosia.​—Mataio 5:​41.

BAIBEL ENA HAKAUA HEREVA: “Lau ura oi sibona emu ura dainai inai kara namona oi karaia, to lau ese oi lau doria dainai lasi.”​—Filemona 14.

Gaukara oi haria namonamo. Idia gaukara goada taudia be idia hesiku lasi, bona idia ura lasi hora momo idia gaukara. To idia ura edia gaukara idia haria namonamo, anina be mai moale ida idia gaukara goada sibona lasi to nega haida idia laga-ani namonamo danu.

BAIBEL ENA HAKAUA HEREVA: “Laga-ani sisina be mai ena namo, to gaukara goadagoada be lai lulua bamona.”​—Hadibaia Tauna 4:6.