Mase Negadiai Daradoko Ia Vara

“Lau bona Sophiaa ai headava bona lagani 39 mai kahana murinai, ia be gorere ta ia abia bena ia mase. Turadia momo be heduru bada idia henia, bona lau sibona be gaukara haida lau karaia. To lagani ta murinai, lau daradoko matamaia. Egu hemami lau biagua be auka. Ena be Sophia ia mase bona lagani toi idia hanaia vadaeni, to nega haida lau tai o daradoko.”​—Kostas.

Oi lalokau henia tauna ta ia mase vadaeni, a? Bema oibe, reana oi abia lalohisihisina be Kostas ena bamona. Emu adavana, varavara ta, eiava turana namona ta ia mase neganai, reana oi lalohisihisi bada herea. Diba bada taudia haida idia gwau unai ese gau ma haida dekenai oi abia kwara hisihisina ia hanaia. Buka ta (The American Journal of Psychiatry) ia gwau, “mase negadiai, momo idia laloa idia lalokau henia tauna be do idia itaia lou lasi ela bona hanaihanai dainai, idia daradoko bada herea.” Reana ia daradoko tauna be inai bamona do ia laloa: ‘Edena negai inai bamona hemami do ia ore? Do lau moale lou, a? Heduru be edeseniai lau abia diba?’

Unai bamona henanadai be inai Noga magasin ese do ia haerelaia! Bema oi lalokau henia tauna ta be vanegai sibona ia mase, vadaeni inai magasin ena atikol iharuana be heduru hereva haida ia gwauraia. Bona ena atikol ma haida be lalohisihisi oi hanaia daladia do idia herevalaia.

Bema ta be mase taudia dainai ia lalohisihisi, ai diba inai magasin ena hereva be oi ia hagoadaia bona durua bada.