HEKWAKWANAI DO IDIA ORE DALANA

Dirava Ena Basileia Henunai “Maino Do Ia Bada Herea”

Kahirakahira ita naria noho gavamani—Dirava ese ia haginia Basileia—ese tanobada ibounai dekenai maino bona lalotamona do ia mailaia. Salamo 72:7 [NWT] ia gwau: “Maino do ia bada herea.” To edena negai unai Basileia ese tanobada ibounai do ia lohiaia matamaia? Edena dala ai unai do ia karaia? Bona edena bamona unai Basileia ena lohia henunai namo oi abia diba?

DIRAVA ENA BASILEIA BE EDENA NEGAI DO IA MAI?

Baibel ese ia perovetalaia toa idauidau idia vara ese ia hahedinaraia Dirava ena Basileia be kahirakahira do ia mai. Unai “toa” idauidau be tanobada ai idia vara, hegeregere tuari, hitolo, gorere, tano mareremarere momo, bona kara dika ia bada.—Mataio 24:3, 7, 12; Luka 21:11; Apokalupo 6:2-8.

Peroveta herevana ma ta ia gwau: “Dina gabediai nega aukadia do idia vara, bona unai ese taunimanima do idia hahekwarahia bada. Badina taunimanima be sibodia do idia laloa bada, moni do idia ura henia bada, . . . tama sina do idia kamonai henia lasi, tanikiu karana do idia hahedinaraia lasi, ma haida do idia badinaia lasi, ruma bese lalonai lalokau be lasi, do idia ura lasi gwauhamata idia karaia, idia be ladana hadikaia taudia, sibodia edia ura do idia biagua lasi, do idia dagedage, kara namodia do idia ura henia lasi, . . . do idia heagi, moale karadia do idia ura henia bada, to Dirava do idia lalokau henia lasi.” (2 Timoteo 3:1-4) Taunimanima haida edia kara be unai bamona. To hari momo be unai kara idia hahedinaraia noho.

Unai peroveta herevadia be lagani 1914 ai idia guguru matamaia. Danu, histori torea taudia, siahu taudia, bona toretore taudia ese unai lagani murinai tanobada ai idia vara senisi idia herevalaia. Hegeregere, Denmark toretore tauna Peter Munch ia gwau: “Lagani 1914 ai tuari ia matamaia neganai, [unai] ese taunimanima edia noho dalana ia haidaua vaitani. Guna, gau ibounai idia namo idia lao. . . . To lagani 1914 ai, hekwakwanai, gari dikadika bona inai heheni negana ia matamaia, bona taunimanima iboudiai idia noho namo lasi.”

To, lai gubana be ia mai bona ia ore hegeregerena, unai gaudia be do idia ore. Unai ese ia hahedinaraia Dirava ena Basileia ese tanobada ibounai do ia lohiaia negana be ia kahirakahira. Danu, Iesu ese nega dokona ena toa ma ta ia gwauraia: “Basileia ena sivarai namona be tanobada ibounai dekenai do idia harorolaia, unai amo bese ibounai ese idia kamonaia diba, unai murinai dokona be do ia ginidae.”—⁠Mataio 24:14.

Unai sivarai namona be Iehova ena Witnes taudia ese idia harorolaia goadagoada. Danu, idia gaukaralaia momo pablikeisen ena ladana be Gima Kohorona Iehova Ena Basileia Ia Harorolaia. Inai magasin be nega momo Dirava ena Basileia ese taunimanima totona bona tanobada ai do ia havaraia gau namodia ia herevalaia.

DIRAVA ENA BASILEIA ESE EDENA DALA AI TANOBADA IBOUNAI DO IA LOHIAIA?

Mai anina bada point foa ese unai do ia haerelaia:

Unai Basileia be inai tanobada ena politikol oreadia ese do idia gunalaia lasi.
Inai tanobada ena politikol gunalaia taudia be do idia ura lasi edia siahu idia haboioa, bona mai dagedage ida Dirava ena Basileia do idia tuari henia.—Salamo 2:2-9.
Dirava ena Basileia ese idia ura taunimanima idia lohiaia politikol basileiadia, do ia hadikaia ore. (Daniela 2:44; Apokalupo 19:17-21) Tanobada ai do ia vara tuari dokona ena ladana be Aramagedono.—Apokalupo 16:14, 16.
Mai ura bada ida Dirava ena Basileia idia badinaia taudia ibounai be Aramagedono amo do idia roho mauri, bona maino tanobada matamatana lalonai do idia noho. Idia be Baibel ese ia gwauraia “hutuma bada” taudia, bona idia be milioni momo.—Apokalupo 7:9, 10, 13, 14.

UNAI BASILEIA ESE DAHAKA DO IA KARAIA?

Iesu be tanobada ai ia noho neganai, Dirava ena Basileia ena King ai do ia lao neganai do ia karaia gaudia haida ia hahedinaraia. Ia ese gorere bona diseibol taudia ia hanamoa. (Mataio 4:23) Taunimanima momo ia ubua. (Mareko 6:35-44) Ia ese havaraia gaudia bona lai ia biagua.—Mareko 4:37-41.

Mai anina bada gauna be, Iesu ese taunimanima dekenai maino bona lalotamona ai idia noho dalana ia hadibaia. Danu, mai manau ida Iesu ena hadibaia herevadia idia badinaia taudia ese kara namodia idia hahedinaraia, bona unai ese idia do ia durua mai moale ida iena Basileia henunai idia noho hanaihanai totona. Diba bada tauna ta ese unai ia hagugurua diba lasi. Iesu ena Ororo Harorona ai ia hadibaia daladia idauidau be, Mataio karoa 5-7 lalonai oi davaria diba. Oi ai hagoadaia unai siri oi duahidia totona. Idia torea herevadia be auka lasi. To ena hereva ese aonega ia henia bona kudouna ia hamarerea diba.

EDENA DALA AI DIRAVA ENA BASILEIA ENA LOHIA DALANA AMO NAMO OI ABIA DIBA?

Dirava ena Basileia henunai oi noho totona, dala ginigunana be diba oi abia. Oibe, Iesu ese ena guriguri lalonai Dirava ia hamaoroa: “Mauri hanaihanai abia totona, namona be idia ese oi, Dirava momokani tamona, bona oi ese oi siaia tauna, Iesu Keriso dekenai diba do idia abia noho.”—Ioane 17:3.

Taunimanima be Iehova Dirava idia dibaia namonamo neganai, dala idauidau ai namo idia abia. Mani inai dala rua oi laloa: Ginigunana be, edia abidadama Dirava dekenai ia goada. Unai abidadama dainai, idia abia dae Dirava ena Basileia be momokani bona iena lohia negana be ia kahirakahira. (Heberu 11:1) Iharuana be, Dirava bona edia dekena taudia idia lalokau henia. Dirava lalokau henia karana ese idia ia durua mai kudouna ibounai ida ia idia badinaia totona. Danu, dekena taudia lalokau henia karana ese idia ia durua Iesu ena hakaua herevana idia badinaia totona. Ia gwau: “Umui ura taunimanima ese umui dekenai idia karaia hegeregerena, idia dekenai danu unai bamona do umui karaia.”—Luka 6:31.

Lalokau tamana ta bamona, iseda Havaraia tauna ia ura mauri namona ita moalelaia. Ia ura Baibel ese ia herevalaia “mauri korikorina” ita abia. (1 Timoteo 6:19) Hari ita noholaia maurina be “mauri korikorina” lasi. Bona taunimanima milioni momo edia mauri be ia auka bona idia hekwarahi bada. To “mauri korikorina” ita abia totona, Dirava ena Basileia ese ena taunimanima totona do ia karaia gau namodia haida mani ita laloa.

MAURI KORIKORINA ENA TOANA

“King [Keriso] ena mauri dinadia ibounai lalonai, iena bese taudia ese kara maoromaoro do idia karaia . . . King ena basileia be mani do ia bada . . . ela bona tanobada ena dokona dekenai.”—Salamo 72:7, 8, 13, 14.
“Tuari be Dirava ese ia hadokoa noho, tanobada kahana ibounai dekenai. Ia ese peva ia makohia noho, bona io be ia ese ia hakwaidua noho.”—⁠Salamo 46:9.
“Koni momo herea, be tano dekenai do ia vara namonamo. Namona be ororo gabudia danu dekenai, uiti bona aniani avadia do idia tubu namonamo.”—Salamo 72:16.
“Idia ese edia ruma do idia haginia, bona unai ruma lalonai do idia noho. Idau taudia ese edia ruma do idia abia lasi. Bona idia ese vain umadia do idia hadoa, vadaeni vain ena anina, uaina do idia inua. Idau taudia ese edia uaina do idia inua lasi. . . . Edia imana gaukara dekenai idia karaia gaudia do idia moalelaia.”—Isaia 65:21, 22.
“Dirava ena palai rumana be taunimanima ida ia noho . . . Ia ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore.”—Apokalupo 21:3, 4.

Taunimanima be Paradaiso ai mauri idia moalelaia — Dirava ena Basileia ena lohia henunai, taunimanima be do idia noho namo, idia gari lasi bona aniani be momo herea