Dirava Badinaia Karana

Baibel ai inai hereva, “Dirava ena lauma ese ia hakaua tauna” ena anina be ta ena lalohadai eiava ena mauri ai Dirava ia badinaia. (1 Korinto 2:15a) Tauanina ena ura ia laloa tauna be sibona ena namo ia laloa bada, to Dirava ena lauma ese ia hakaua taudia be Dirava ena taravatu idia laloa bada.​—Efeso 5:1.

HELARO

BAIBEL ENA HAKAUA HEREVANA: “Bema hekwakwanai neganai oi manoka neganai, oiemu goada be maragimaragi momokani.”​—Aonega Herevadia 24:10.

ANINA BE DAHAKA: Mauri ai idia vara hekwakwanai ita ura haheaukalaia, to lalomanoka karana ese iseda goada ia hamaragia diba. To, helaro ese ita dekenai goada ia henia diba ita haheauka noho totona. Iseda helaro ita laloa neganai, do ita laloparara ita davaria hekwakwanai be do ia noho daudau lasi; momokani, helaro dainai gau namona ia vara diba.

DAHAKA OI KARAIA DIBA? Namona be vaira negai do idia vara gau namodia oi laloa. Ena be dahaka do ia vara eiava do idia vara senisi namodia dainai oi lalohekwarahi noho, namona be oi tahua gauna hegeregerena kara danu oi karaia. Momokani, “dika [idia] vara kava” diba. (Hadibaia Tauna 9:11) To nega haida gau namodia be do idia vara. Baibel ese uma gabu ena haheitalai ia gaukaralaia, ia gwau: “Daba neganai, bona adorahi neganai danu, uhe do oi hadoa. Badina be oi diba lasi, do ia tubu namonamo o lasi. Sedira daba gauna, bona adorahi gauna ruaosi do idia tubu namonamo.”​—Hadibaia Tauna 11:6.

HENANADAI BADADIA EDIA HAERE

BAIBEL ENA HAKAUA HEREVANA: “Diba bona aonega lau dekenai do oi henia . . . Oiemu hereva . . . be momokani.”​—⁠Salamo 119:144, 160.

ANINA BE DAHAKA: Baibel ese taunimanima momo idia henia henanadai idauidau ia haerelaia. Hegeregere, inai bamona henanadai ia haerelaia

• Ita be edeseni amo ita mai?

• Dahaka dainai tanobada ai ita noho?

• Mase taudia dekenai dahaka ia vara?

• Mase be mauri ena dokona, a?

Tanobada hegegemadai taunimanima milioni momo ese Baibel ai unai henanadai bona ma haida edia haere idia tahua namonamo dainai edia mauri ia namo.

DAHAKA OI KARAIA DIBA? Baibel ese ia hadibaia gaudia oi tahua. Iehova ena Witnes tauna ta oi noia, oi ia durua Baibel oi lalopararalaia totona. Emai websait, jw.org o emai hebou ta dekenai oi lao, davana be lasi bona pablik idia mai diba.

BAIBEL ENA HAKAUA HEREVA MA HAIDA

EMU HETURA KARANA DIRAVA IDA LALOA BADA.

“Dirava dibaia totona idia hitolo taudia be idia moale, badina guba Basileia be idia edia.”​—MATAIO 5:3.

BAIBEL ESE IA HEREVALAIA DIRAVANA AMO DIBA ABIA.

“Dirava do idia tahua . . . ia do idia davaria momokani . . . Ia be ita ta ta amo ia noho daudau lasi.”​—KARA 17:27.

BAIBEL OI DUAHIA BONA LALOA DOBU.

‘Lohiabada ena taravatu dekenai idia moale,a bona Ena taravatu idia laloa, dina bona hanuaboi ibounai lalonai. . . . Edia gau- kara ibounai be ena anina ia vara.’​—SALAMO 1:2, 3.