Oi Dekenai Idia Noho Gaudia Oi Moalelaia

Gaukara Goada

“Namona be ia gaukara goada bona iena imana amo gaukara namona ia karaia, unai amo ia dabu tauna dekenai gau ta ia henia diba.”​—EFESO 4:28.

Iseda Havaraia Tauna ese ita ia hagoadaia gaukara dekenai lalohadai maorona ita abia totona. Dahaka dainai? Ia gaukara goada tauna be ia moale badina ia sibona bona iena ruma bese ia durua diba. Bona ia dabu tauna dekenai heduru ia henia diba. Iena bosi ese ia do ia laloa bada danu. Unai dainai, gaukara namona ia karaia tauna ese iena moni gaukara do ia haboioa lasi. Gaukara goada karana ena hahenamo be Baibel ese ia gwauraia, “Dirava ena harihari gauna.”​—Hadibaia Tauna 3:13.

Kara Momokani

“Ai diba emai lalomamina be ia goeva. Bona ai ura mai momokani ida gau ibounai ai karaia.”​—HEBERU 13:18.

Bema ita kara momokani, sibona do ita matauraia, lalomaino do ita abia, bona hanuaboi ai do ita mahuta namonamo. Danu, haida do idia diba ita be kara momokani taudia bona ita do idia matauraia. To koikoi taudia ese unai kara namodia do idia reaia. Danu, edia lalomamina ese idia do ia kota henia, bona edia koikoi karadia be nega ta do ia hedinarai dainai, mai gari ida do idia noho.

Moni Ura Henia Dikadika Lasi

“Namona be emui mauri dalana amo umui hahedinaraia, moni umui ura henia dikadika lasi, to umui dekenai idia noho gaudia be hegeregere.”​—HEBERU 13:5.

Moni be aniani bona iseda dabu gaudia abia totona ita gaukaralaia. To, “moni . . . ura henia dikadika” karana be mai ena dika. Badina unai ese ta ena nega bona goada ia haorea diba. Moni momo abia totona ia hekwarahi dainai, ena headava do ia dika, natudia totona nega be lasi, bona ia gorere diba. (1 Timoteo 6:9, 10) Danu, moni ia ura henia dikadika tauna be kara koikoi ena hahetoho do ia davaria. Aonega tauna ta ia gwau: “Abidadama tauna be hahenamo momo do ia abia, to ia ura kohu momo ia abia haraga tauna be kerere do ia davaria.”​—Aonega Herevadia 28:20.

Edukeisen Namona Abia Hidi

“Aonega bona laloa namonamo karana oi gimaia.”​—AONEGA HEREVADIA 3:21.

Edukeisen namona ese ita ia durua maduna ita huaia namonamo bona tama sina namodia ai ita lao totona. To namo lasi ita laloa edukeisen namona dainai iseda noho do ia namo eiava do ita moale. Namona be ita karaia gaudia ibounai lalonai ita kwalimu totona, Dirava amo ia mai edukeisen ita abia. Baibel ese Dirava ia kamonai henia tauna be inai bamona ia gwauraia: “Ia karaia gaudia ibounai lalonai do ia kwalimu.”​—Salamo 1:1-3.