Mobael Fon Ese Oi Ia Biagua, A? Emu Headava
Tau bona adavana be dala maorona ai fon idia gaukaralaia neganai, edia headava ia hagoadaia diba. Hegeregere, idia ia durua dina ibounai lalonai ta ta idia hereva henia totona.
To, headava taudia haida ese fon idia gaukaralaia kerere dainai . . .
edia herevahereva negana ia hadikaia.
edia moni gaukara be ruma dekenai idia abia mai.
lalohisihisi bona adavana badinaia lasi karana ia vara.
INAI OI DIBA BE NAMO
HEREVAHEREVA NEGANA
Headava tauna Michael ia gwau: “Nega haida lau bona egu adavana ai helai hebou, to ia be ia ‘noho lasi’ bamona, badina ena fon sibona ia raraia, bona ia gwau, ‘Lau sekea lasi ema bona hari.’” Headava tauna ma ta Jonathan ia gwau, unai nega ai “tau bona adavana idia helai hebou, to toana be idia be ta ta amo idia daudau.”
INAI OI LALOA: Emu adavana ida oi kiki lalonai, nega hida fon ia rini, o teks mesiji ia mai bona emui herevahereva ia hadikaia?—EFESO 5:33.
MONI GAUKARA
Haida edia gaukara dainai, hanuaboi ai danu edia fon do idia haere. Haida be unai bamona lasi, to ruma ai idia giroa neganai, moni gaukara idia karaia noho. Headava tauna Lee ia gwau: “Ena be nega lau atoa egu adavana lau bamoa totona, to fon ia rini o teks mesiji ia mai neganai, lau dadaraia be auka.” Headava hahine ma ta Joy ia gwau: “Egu moni gaukara be ruma dekenai dainai, taim ia abia neganai, lau hekwarahi lau hadokoa totona.”
INAI OI LALOA: Emu adavana ese oi ia hereva henia neganai, oi kamonai namonamo o gau ta ese emu kamonai karana ia hadikaia?—LUKA 8:18.
BADINAIA KARANA
Haida idia gwau, social media ai idia atoa gaudia dainai edia adavana ida idia hepapahuahu. Idia nanadaia taudia amo 10 pesen idia gwau, social media ai idia atoa gaudia be edia adavana amo idia hunia.
Unai dainai, haida idia gwau social media be “headava hadikaia” bona “heudahanai havaraia” gauna. Momokani, loea momo idia gwau, unai ese headava momo ia hadikaia noho.
INAI OI LALOA: Fon ai tau o hahine ma ta oi hereva henia, to emu adavana amo oi hunia, a? —AONEGA HEREVADIA 4:23.
INAI OI KARAIA DIBA
ANINA BADA GAUDIA ATOA GUNA
Bema ta ia aniani lasi, do ia gorere. Unai hegeregerena, bema tau o hahine be nega ia atoa lasi ena adavana ia bamoa totona, ena headava lalonai hekwakwanai do ia vara.—Efeso 5:28, 29.
HAKAUA HEREVANA: “Mai anina bada gaudia do umui diba.”—FILIPI 1:10.
Oi bona emu adavana ese do umui badinaia herevadia umui makaia, o fon ese headava do ia hadikaia lasi daladia umui torea bona herevalaia.
Dina ta ta lalonai nega tamona do ita aniani hebou
Hora haida ita makaia fon do ita gaukaralaia lasi
Dina ta ita makaia moale karana ta do ita karaia
Hanuaboi ai fon ita habodoa bona bedi amo ita atoa siri
Dina ta ta ai miniti 15 ita atoa ita herevahereva totona, bona fon ita itaia lasi
Hora ta ita makaia intanet do ita gaukaralaia lasi