Baibel amo Ita Dibaia Gaudia

Iunives be hanaihanai ia noho, a?

Genese 1:1 ia gwau: “Matamana negana ai, Dirava ese guba bona tanobada ia havaraia.”

Lagani 1950 gunanai, saiens taudia momo idia abia dae iunives be hanaihanai ia noho. To, hari saiens taudia momo edia tahua gaukara amo idia laloparara, iseda iunives be mai ena matamana.

Matamanai tanobada ena toana be edena bamona?

Genese 1:2, 9 ese ia hahedinaraia, matamanai tanobada ena “toana be lasi bona gau ta ia noho lasi” bona ranu ese ia koua.

Saiens taudia be unai hereva dekenai idia lalotamona. Biologist Patrick Shih ia gwau, matamanai tanobada ai oksijen be lasi bona tanobada ena toana be idau. Astronomy magasin ia gwau: “Tahua gaukara matamata ese ia hahedinaraia matamanai Tanobada be ranu ese ia koua bona tano ia hedinarai momokani lasi.”

Edena dala ai iseda atmosfia ia idau ia lao?

Genese 1:3-5 ese ia hahedinaraia, atmosfia dekenai diari ia hedinarai neganai, diari sisina sibona be tanobada ai ia vareai. Bona gabeai dina bona hua be tanobada amo idia itaia namonamo diba.​—Genese 1:14-18.

Smithsonian Environmental Research Center ia gwau, matamanai atmosfia dainai diari sisina sibona be tanobada ai ia vareai diba. Ma ia gwau: “Methane gasi ena kwalahu be Tanobada ai ia honu.” Gabeai, “Methane gasi ena kwalahu ia ore bona guba ena kala be bulu ai ia lao.”

Tanobada ai mauri gaudia be edena bamona idia vara matamaia?

Genese 1:20-27 ia gwau, Dirava ese gwarume, manu, tano ai idia noho animal idauidau, bena gabeai taunimanima ia havaraia. Saiens taudia idia abia dae gwarume idia vara matamaia guna, nega daudau murinai tano ai idia noho animal ginigunadia bena gabeai taunimanima idia vara.

Baibel Ia Gwauraia Lasi Gaudia?

Taunimanima haida idia gwau, Baibel ena hereva be saiens taudia idia davaria gaudia amo ia idau. Badina nega momo Baibel ena hereva dekenai lalohadai kererena idia abia.

Baibel ia gwau lasi iunives o tanobada be lagani 6,000 sibona ia noho. To, Baibel ia gwau “matamana negana ai” Dirava ese tanobada ia havaraia. (Genese 1:1) Baibel ese ia vara nega korikorina ia gwauraia lasi.

Baibel ia gwau lasi tanobada ai idia noho mauri gaudia be Dirava ese dina 6 ena hora 24 lalonai ia havaraia. To Baibel ese inai hereva “dina” ia gaukaralaia, nega ena daudau ia herevalaia totona. Genese karoa 1 ia hahedinaraia, planeti bona ena mauri gaudia be Dirava ese “dina” siks lalonai ia karaia. Unai be “Iehovaa Dirava ese tanobada bona guba ia karaia dinana” ida ia hegeregere. (Genese 2:4) Unai dainai Dirava ese mauri gaudia totona tanobada ia hegaegaelaia bona mauri gaudia ia havaraia “dina” siks ena daudau be lagani momo herea.

Baibel ia gwau lasi mauri gaudia be nega daudau lalonai do idia idau lasi. Genese bukana ia gwau animal ibounai be “edia orea ta ta hegeregerena” idia vara. (Genese 1:24, 25) Baibel ai inai hereva “orea ta ta,” be saiens ena hereva ta lasi, to mauri gaudia ta ta ena idau ia hahedinaraia. Unai dainai “orea” ta lalonai mauri gauna ta be mai ena bese idauidau. Unai hereva ese ia hahedinaraia nega daudau lalonai, “orea ta ta” lalonai idia noho mauri gaudia be idia idau idia lao diba.

Dahaka oi laloa?

Ataiai ita herevalaia bamona, Baibel ese iunives ia matamaia dalana, matamanai tanobada ena toana bona mauri gaudia idia vara dalana be auka lasi dalanai ia gwauraia hedinarai. Bema unai bamona, reana Baibel ese unai gaudia ia havaraia Tauna ia gwauraia, a? Encyclopædia Britannica ia gwau, “mauri gaudia be taunimanima edia siahu ia hereaia tauna amo ia mai, unai lalohadai be hari inai negai saiens taudia ese idia davaria gaudia ida ia hegeregere.”b