1 HEKWAKWANAI TANOBADANA AI

1 | Emu Tauanina Oi Naria

DAHAKA DAINAI UNAI BE GAU BADANA

Disasta o hekwakwanai ta ia vara neganai, goada tauna ia hagorerea diba.

Idia vara gaudia dainai taunimanima idia lalohekwarahi bada, bona nega daudau lalonai idia metau neganai, idia gorere diba.
Dika bada idia vara neganai, hospital be idia hegeregere lasi gorere taudia ibounai idia durua namonamo totona, bona nega haida muramura idia ore.
Dika negana ai, moni abia daladia be auka. Unai dainai, taunimanima be idia hegeregere lasi tauanina durua gaudia, hegeregere aniani namodia o muramura idia hoia totona.

Inai Oi Diba be Namo

Oi lalohekwarahi momo bona oi gorere neganai, disisen kererena oi karaia diba. Unai ia vara neganai, emu helt do oi laloa lasi bena unai ese emu gorere ia habadaia diba.
Bema hospital oi lao haraga lasi, emu gorere do ia bada herea bona dika oi davaria diba.
Hekwakwanai negana ai, bema oi goada bona oi gorere lasi, do oi hegeregere disisen maorodia oi karaia totona.
Herevana oi be taga o ogogami tauna, to kara haida oi karaia diba emu tauanina ia goada noho totona.

Hari Oi Karaia

Aonega tauna be do idia vara dika ia laloa bona kara haida ia karaia unai dika ia dadaraia totona. Unai be mai anina bada iseda helt totona. Nega momo gorere oi dadaraia diba bema oi bona emu ruma be goeva. Namona be iseda tauanina ita naria namonamo, bena hospital do ita lao lasi.

“Aiemai tauanina bona emai ruma be ia goeva dainai, hospital bona muramura edia davana dekenai moni ai negea lasi.”—Andreas.a

a Inai magasin lalonai lada haida ai haidaua.

OI GOADA DALANA—Heduru Herevadia

Inai hekwakwanai negana lalonai, emu tauanina ia goada totona inai gaudia oi karaia diba

TAUANINA HAGOEVAIA

Aniani Maorona Ania

Baibel ia gwau: “Aonega tauna ese dika ia itaia bona ia raka siri.” (Aonega Herevadia 22:3) Namona be oi hegaegae bona gorere idia havaraia gaudia oi dadaraia.

Nega ibounai sopu bona ranu amo emu imana oi huria, hegeregere oi aniani gwauraia neganai o toileti oi gaukaralaia murinai.
Nega ibounai muramura amo emu ruma oi hagoevaia, hegeregere nega momo umui dogoatao gabudia o gaudia.
Bema mai dalana, daihanai gorerena idia abia taudia kahirakahira oi lao lasi.

ANIANI MAORONA ANIA

Tauanina Hagoevaia

Baibel ia gwau: “Tau ta ese sibona ena tauanina ia inai henia lasi, to ia ubua bona ia laloa bada.” (Efeso 5:29) Bema iseda tauanina ita laloa bada, ita ania bona inua gaudia do ita naria namonamo.

Ranu momo oi inua.
Au huahua bona uma aniani idauidau oi ania.
Digara, damena bona suga gaudia oi ania o inua momo lasi.
Alkahol oi inua momo lasi bona kuku o drag dikadia oi dadaraia.

“Ai ura lasi ai gorere dainai, ai hekwarahi aniani maorodia ai ania totona. Bema unai ai karaia lasi, emai pei maragina be hospital o muramura davana dekenai do ai haorea. To, ai ura emai moni amo aniani maorodia ai hoia.”—Carlos.

EKSASAIS BONA LAGA-ANI NAMONAMO

Eksasais

Baibel ia gwau: “Laga-ani sisina be mai ena namo, to gaukara goadagoada karana be lai lulua bamona.” (Hadibaia Tauna 4:6) Ita gaukara to namona be ita laga-ani danu.

Oi eksasais be gau badana. Eksasais totona reana hanaihanai gabu ta dekenai oi raka lao bona raka giroa mai. Herevana oi be buruka, tauanina kahana ia dika o mai emu gorere, to oi eksasais neganai, do oi goada noho.
Laga-ani

Oi laga-ani namonamo. Bema oi mahuta namonamo lasi, daudau lasi lalonai, emu tauanina do ia metau bona harana do ia gaukara namonamo lasi. Bona nega daudau murinai, gorere badana do oi davaria.
Hora ta oi makaia bona hanuaboi ai unai hora ai oi mahuta. Namona be dina ta ta ai unai bamona oi karaia bona daba rere ai danu oi makaia horana ai oi noga.
Bedi dekenai TV o elektronik gaudia oi gaukaralaia lasi.
Mahuta horana ai aniani momo oi ania lasi, bona ti, kofi o alkahol oi inua lasi.

“Lau itaia egu tauanina durua totona mahuta be anina bada. Bema hora haida sibona lau mahuta, egu kwarana bona tauanina ibounai idia hisihisi. To, bema hanuaboi horadia ibounai lau mahuta namonamo, lau hegeregere gau ibounai lau karaia totona! Egu tauanina be ia goada bona lau gorere momo lasi.”—Justin.