HEKWAKWANAI TANOBADANA AI

2 | Emu Gaukara Bona Moni Oi Naria

DAHAKA DAINAI UNAI BE GAU BADANA

Taunimanima be idia hekwarahi dina ta ta ai edia dabu gaudia idia abia totona. To madi, tanobada be hekwakwanai amo ia honu dainai, unai idia karaia be auka. Dahaka dainai?

Gabu ta ai hekwakwanai ia vara neganai, unuseniai aniani bona ruma edia dava idia daekau.
Hekwakwanai idia vara dainai, moni gaukara be lasi eiava pei idia hamaragia.
Disasta ese taunimanima edia bisinesi, ruma o kohu ia hadikaia, bona taunimanima be idia ogogami.

Inai Oi Diba be Namo

Moni oi naria namonamo neganai, oi hegaegae diba hekwakwanai oi hanaia totona.
Laloatao moni, seivins o kohu be oi do idia durua lasi.
Moni ese famili lalonai moale bona lalotamona ia hoia diba lasi.

Hari Oi Karaia

Baibel ia gwau: “Ita be mai iseda aniani, dabua bona noho gabuna, unai be hegeregere.” —1 Timoteo 6:8.

Iseda dabu gaudia ita abia neganai, ita moale bona ita dekenai unai be hegeregere bona ura gaudia ma haida ita tahua lasi. Iseda moni be hegeregere lasi neganai, unai ita karaia be mai anina bada.

Oi dekenai idia noho gaudia be hegeregere totona, namona be emu mauri dalana oi haidaua. Bema emu moni be hegeregere lasi, to hanaihanai oi ura dava bada gaudia oi noia, hekwakwanai momo do oi davaria.

OI GOADA DALANA—Heduru Herevadia

Inai hekwakwanai negana ai, emu gaukara bona moni oi naria totona, inai heduru daladia oi badinaia

GAU HAIDA HOIA LASI

Gau haida hoia lasi

Gau matamatadia oi noia lasi, to oi dabu momokani gauna sibona oi hoia. Sibona oi nanadaia: ‘Motuka lau hoihoilaia diba, o? Uma gabu ta do lau karaia, a?’
Gau ta oi do hoia lasi neganai, sibona oi nanadaia: ‘Inai be egu dabu gauna ta, a? Egu moni be hegeregere, a?’
Bema mai dalana, gavamani o taunimanima idia durua oreadia haida amo heduru oi tahua.

“Emai famili ai helai hebou bona emai noho dalana ai laloa. Moale karadia haida ai kensol bona unai gaudia karaia totona ai negea monina ai hamaragia. Danu davana maragi aniani ai hoia matamaia.”—Gift.

BAJET TOREA

Bajet torea

Baibel ia gwau: “Gaukara goadagoada tauna ena palani idia guguru, to idia kara haragaharaga taudia be idia ogogami.” (Aonega Herevadia 21:5) Bajet ese oi do ia durua, unai amo oi hoia gaudia edia davana be emu pei do ia hanaia lasi.

Gau ginigunana be hua ta ena moni oi torea.
Gabeai, hua ta ta ai aniani, paoa bona ruma ena davana totona oi gaukaralaia monina oi torea, bona oi tahua dahaka gaudia dekenai emu moni oi negea kava, bona senisi haida oi karaia.
Bena oi hoia gaudia edia davana be emu pei ida oi hahegeregerea. Bema oi itaia gau haida edia davana be bada, davana maragi gaudia oi hoia diba, o emu bajet amo oi kokia. Unai oi karaia neganai, oi gaukaralaia monina be emu pei do ia hanaia lasi.

“Hua ta ta ai, emai pei bona do ai hoia gaudia edia davana ai torea. Ai ura emejensi bona vaira nega totona moni haida ai seivia. Unai bamona ai karaia neganai, ai laloa momo lasi badina ai diba vadaeni emai pei be edena bamona do ai gaukaralaia.”—Carlos.

ABITOREHAI LASI / MONI SEIVIA

Abitorehai lasi / moni seivia

Palani namona oi karaia emu abitorehai oi haloua totona. Bema mai dalana, abitorehai karana oi dadaraia. To, moni oi seivia emu dabu gaudia oi hoia totona.
Hua ta ta ai moni sisina oi atoa siri, gabeai do oi karaia gaudia eiava oi laloa lasi hekwakwanai ta totona.

GAUKARA GOADA / OI DO IDIA HADOKOA LASI

Baibel ia gwau: “Mai emu goada ida gaukara idauidau oi karaia be mai ena namo.”—Aonega Herevadia 14:23.

Gaukara goada / oi do idia hadokoa lasi

Emu moni gaukara dekenai lalohadai maorona oi hahedinaraia. Ena be emu moni gaukara oi ura henia momokani lasi, to unai gaukara dainai oi be pei oi abia diba.
Oi gaukara goada bona bosi do ia itaia oi be gaukara namonamo tauna. Unai amo emu gaukara do oi haboioa lasi, eiava gabeai do ia auka lasi moni gaukara ma ta oi davaria totona.

“Gaukara idauidau lau abia dae, ena be unai gaukara lau ura henia lasi o ena pei be maragi. Kampani ta ese lau ia abia dae neganai, lau gaukara goada bona gaukara lau karaia namonamo, hegeregere unai be egu bisinesi bamona.”—Dmitriy.

Bema oi be moni gaukara oi tahua noho . . .

Namona be kara ta oi karaia. Oi karaia diba gaukara edia kampani dekenai oi lao, ena be niuspepa dekenai unai gaukara idia atoa lasi. Famili bona turadia oi hadibaia oi be gaukara oi tahua noho.
Do oi davaria gaukara be reana oi ura henia lasi, to dahaka gaukara idia henia oi dekenai, oi abia dae be namo.