HEKWAKWANAI TANOBADANA AI

3 | Emu Lalokau Taudia Oi Gimaia

DAHAKA DAINAI UNAI BE GAU BADANA

Tanobada ai hekwakwanai idia bada idia lao lalonai, taunimanima momo be edia lalokau taudia ida idia noho namonamo lasi. Hegeregere, haida be:

Edia turadia idia bamoa momo lasi.
Headava tau bona adavana be ta ta idia badu henia.
Tama sina be natudia edia lalohisihisi gaudia idia laloa lasi.

Inai Oi Diba be Namo

Nega aukadia lalonai tura namodia ida eda hetura karana ita hagoadaia neganai, unai ese ita ia durua ita gorere momo lasi bona ita laloa maoromaoro totona.
Ena be ita laloparara lasi, to idia vara noho hekwakwanai ese dala idauidau ai iseda famili maurina idia hadikaia diba.
Reana oi laloparara lasi, to emu natu maragidia be niusi dekenai idia vara dika edia sivarai idia itaia o kamonai neganai, gari mamina idia abia.

Hari Oi Karaia

Baibel ia gwau: “Tura korikori be nega ibounai lalokau ia hahedinaraia, bona hekwakwanai negadia ai ia be tadikaka korikori ta bamona oi ia durua.”—Aonega Herevadia 17:17.

Tura namodia be ita idia durua bona sisiba namodia idia henia. Oi ia laloa bada tura namona ta ia noho neganai, unai ese oi ia hagoadaia dina ta ta ena hekwakwanai idauidau oi haheaukalaia totona.

OI GOADA DALANA—Heduru Herevadia

Inai nega aukana lalonai, emu lalokau taudia oi gimaia totona inai dala idauidau oi badinaia

EMU HEADAVA HAGOADAIA

Emu headava hagoadaia

Baibel ia gwau: “Taunimanima rua ese tau tamona idia hereaia, badina . . . bema idia ta ia moru, ena turana ese ia abia isi diba.” (Hadibaia Tauna 4:9, 10) Namo lasi tau bona hahine be tuari peleini rua bamona idia bampa, to namona be pailot rua bamona idia gaukara hebou idia roho lao gabuna ai idia ginidae totona.

Idia vara hekwakwanai dainai disisen umui karaia, to ta ta do umui badu henia lasi. Laloparara bona haheauka karana be gau badana.
Wiki ta ta lalonai, dina ta be emu adavana ida idia vara hekwakwanai umui herevalaia. Umui heai lasi, to hekwakwanai hamaoromaoroa dalana umui herevalaia.
Nega umui atoa umui moalelaia gaudia umui karaia totona.
Mai moale ida guna umui karaia hebou gaudia, reana emui wedin o unai bamona moale negana ta edia laulau umui itaia hebou.

“Tau bona hahine be gau ibounai dekenai do idia lalotamona lasi, to idia be pailot rua bamona idia gaukara hebou diba. Oibe, idia ruaosi ese disisen ta idia karaia bona idia gaukara hebou diba idia hagugurua totona.”—David.

EMU TURADIA HAGOADAIA

Emu turadia hagoadaia

Emu turadia amo heduru oi abia, to oi ese idia dekenai heduru oi henia dalana do oi laloa danu. Ma haida oi hagoadaia neganai, oi sibona oi hagoadaia unai.
Dina ta ta ai emu turadia haida oi rini henia, bona oi sekea bema idia namo.
Reana guna emu turadia haida be oi davaria hekwakwanai idia davaria danu, unai dainai idia oi nanadaia diba edena dala ai unai idia hanaia.

“Nega aukadia be lai gubana bamona. Lai bona medu dainai oi itaia namonamo lasi, to turadia ese oi do idia durua unai amo do oi diba oi be edeseni oi noho bona edena gabu ai oi heau lao diba. Turadia be oi idia laloa bada, bona idia diba oi be idia oi laloa bada danu.” —Nicole.

EMU NATUDIA HAGOADAIA

Emu natudia hagoadaia

Baibel ia gwau: “Taunimanima ibounai be do idia kamonai haraga, to do idia hereva haraga lasi.” (Iamesi 1:19) Matamanai, reana emu natudia be idia ura lasi edia lalohekwarahi idia herevalaia, to oi haheauka neganai, unai ese idia ia durua edia hemami idia gwauraia hedinarai totona.

Namona be oi naria ela bona natuna be ia hegeregere ia lalohekwarahilaia gaudia ia herevalaia totona. Hegeregere, natudia haida be tama sina ida motuka ai idia heau o gabu ta ai idia raka loaloa neganai, ia auka lasi idia laloa gaudia idia herevalaia totona. To, tama sina ida idia helai bona henanadai momo idia henia neganai, do idia hereva lasi.
Namona be emu natudia dekenai gari idia havaraia nius ripoti oi hahedinaraia momo lasi.
Natudia dekenai famili oi gimaia totona oi hegaegaelaia gaudia oi gwauraia hedinarai.
Dika idia vara neganai do umui karaia gaudia umui palanilaia bona natudia danu umui praktis.

“Emu natudia ida oi herevahereva, bona edia hemami idia gwauraia neganai oi kamonai namonamo. Reana edia lalona ai ia noho gari, lalohekwarahi o badu idia hahedinarai lasi. Oi hamaorodia oi danu emu hemami be unai bamona bona oi hanaia dalana oi kikilaia.”—Bethany.