TANOBADA DO IA NAMO LOU
UDA BADADIA
UDA BADADIA be tanobada ena “baragi bona mauri durua gauna bamona” idia gwauraia bona unai be mai badina. Au ese carbon dioxide ia abia, to bema lasi, dika bada ita davaria diba. Oksijen idia halasia danu, unai be mai anina bada ita hahodi totona. Tanobada ena tubutubu gaudia bona animal 80 pesen bamona be uda badadia lalonai idia noho. Bema uda badadia be lasi, do ita mauri lasi.
Uda Badadia Dekenai Dahaka Ia Vara?
Lagani ta ta ai, biru gabudia idia karaia totona, au bilioni momo idia utua noho. Lagani 1940 bamona amo ema bona hari, tanobada ena uda badadia ena kahana badana ia boio.
Uda badadia idia hadikaia neganai, ecosystem ia dika bona ita idia durua gaudia ibounai danu idia boio.
Tanobada be Sibona Ia Hagoevaia Diba
Ena be gabu haida ai au momo idia utua, to au be idia tubu lou diba. Mauri gaudia idia stadilaia taudia idia gwau, idia hoa badina idia utua vadaeni uda badadia be idia tubu lou haraga bona uda badadia ai ia lao lou. Haheitalai haida be inai:
Tahua gaukara idia karaia taudia be, haida ese biru gabuna idia karaia totona idia hagoevaia bona rakatania gabuna idia stadilaia. Not bona Saut America bona West Africa ai, unai bamona gabu 2,200 idia stadilaia neganai, idia davaria, tano be lagani 10 lalonai ia namo lou bona au idia tubu matamaia diba.
Science magasin ena ripoti hegeregerena, tahua gaukara idia karaia taudia idia gwau, reana lagani 100 bamona lalonai tano ai au namodia momo idia tubu diba bona mauri gaudia idauidau do idia vara.
Brazil ai, Saiens taudia be gabu rua idia hahegeregerea, ta be taunimanima idia noho lasi gabuna ai au be sibona idia tubu, bona gabu ma ta ai taunimanima ese au idia hadoa.
National Geographic ripoti ese unai ia herevalaia, ia gwau: “Idia moale, badina idia davaria, taunimanima idia hekwarahi kava au idia hadoa totona.” Lagani 5 lalonai idia stadilaia gabudia ai, ena be au idia hadoa lasi, to “au momo idia tubu.”
Taunimanima be Dahaka Idia Karaia?
Tanobada ibounai ai, taunimanima be gau idauidau idia karaia uda badadia idia gimaia bona idia dika gabudia idia hanamoa lou totona. Unai dainai, United Nations ia gwau lagani 25 lalonai “tanobada ibounai ai, uda badadia utua karana be 50 pesen amo idia hamaragia.”
To, unai be hegeregere lasi iseda uda badadia gimaia totona. Global Forest Watch orea ena ripoti ta ia gwau, “idia hanaia lagani haida lalonai, siahu gabudia ai idia hadikaia uda badadia ena namba be ia senisi lasi.”
Gavamani ena gwaumaoro idia abia lasi logging kampani ese au momo herea idia utua noho bona moni bilioni momo idia karaia, unai dainai siahu gabudia edia uda badadia idia ore idia lao.
Uda badadia idia gimaia tim edia gaukara be do idia itaia, bema au be idia bada vadaeni bona idia hegeregere utua totona, bona palani idia karaia au matamata idia hadoa totona
Baibel Ena Hereva be Dahaka?
“Iehovaa Dirava ese tano amo au idauidau ia hatubua. Edia toana be namo bona idia be namo aniani totona.”—Genese 2:9.
Havaraia Tauna ese uda badadia be sibodia idia hanamoa lou diba dalana ai ia karaia, bona taunimanima be unai dala amo heduru idia abia noho. Dirava ia ura iseda uda badadia bona ecosystem ia gimaia.
Baibel ia hahedinaraia, Dirava ese tanobada ai idia noho gaudia hadikaia karana do ia hadokoa, unai amo tanobada bona mauri gaudia do idia noho. Rau 15 ena atikol ladana “Dirava Ia Gwauhamata Tanobada Do Ia Namo Lou” itaia.
a Iehova be Dirava ena ladana korikorina.—Salamo 83:18.