Famili Matauraia Karana Dekenai Dahaka Ia Vara?

FAMILI ITA MATAURAIA ENA BADINA

Famili taudia ita matauraia neganai, tau, hahine, bona natudia be maino ai do idia noho.

Buka ladana The Seven Principles for Making Marriage Work ia gwau bema tau bona hahine be ta ta idia matauraia, “dina ta ta ai dala badadia bona dala maragidia ai” edia lalokau be ta ta dekenai do idia hahedinaraia.
Tahua gaukara ta ia hahedinaraia hemataurai karana idia hahedinaraia natudia be sibona idia matauraia, edia tama sina ida idia hetura namonamo, bona idia lalohisihisi momo lasi.

EDENA DALA AI FAMILI ITA MATAURAIA DIBA?

Emu famili ida palani ta umui karaia. Ginigunana, namona be famili lalonai ta ta be hemataurai hahedinaraia karana ena anina idia diba. Iharuana be, famili lalonai ibounai ese do idia badinaia karadia bona do idia badinaia lasi karadia oi torea. Ihatoina be, famili ida palani oi herevalaia, unai amo oi bona emu natudia umui diba dahaka do umui karaia.

“Gaukara goadagoada tauna ena palani idia guguru.”—Aonega Herevadia 21:5.

Haheitalai hahedinaraia. Emu famili taudia edia kerere dainai oi gwau henidia, edia lalohadai oi hevasehalaia, eiava oi dekenai idia hereva neganai, edia hereva oi koua o dadaraia, a?

Karaia gauna: Hemataurai karana be emu adavana bona natudia dekenai oi hahedinaraia be namo, ena be unai kara idia hahedinaraia o lasi.

“Umui ta ta dekenai hemataurai hahedinaraia karana do umui gunalaia.”—Roma 12:10.

Ena be haida ida oi lalotamona lasi, to edia lalohadai oi matauraia. Emu lalohadai oi gwauraia neganai, inai bamona hereva oi gwauraia lasi, “oi be hanaihanai” eiava “oi karaia diba lasi.” Unai bamona herevadia ese emu famili edia hemami ia hadikaia diba bona hekwakwanai ia habadaia diba.

“Mai manau ida ia haere tauna ese badu ia koua, to lalona hahisia hereva ese badu ia havaraia.”—Aonega Herevadia 15:1.

Kekeni ta be jw.org ai vidio ia itaia noho.

EDENA DALA AI IEHOVA ENA WITNES TAUDIA BE FAMILI MATAURAIA KARANA IDIA HAHEDINARAIA?

Iehova ena Witnes taudia be famili idia hagoadaia ta ta idia matauraia totona, nega momo atikol, buka, buklet, bona vidio ese unai gaudia idia herevalaia, bona unai oi abia diba davana lasi.

HEADAVA TAUDIA TOTONA: Inai kahana ladana Famili Durua Totona ese tau bona hahine ia durua diba . . .

idia kamonai namonamo totona
ta ta hereva henia lasi karana hadokoa totona
hepapahuahu karana hadokoa totona

(“Famili Durua Totona” ena kahana be jw.org ai oi sekea)

TAMA SINA TOTONA: Inai kahana ladana Famili Durua Totona ese tama sina ia durua edia natudia idia treinia . . .

hereva idia badinaia totona
ruma gaukara durua totona
“plis” bona “tanikiu” herevana idia gwauraia totona

(“Natudia Naria Karana” bona “Matamata Taudia Naria Karana” ena kahana be jw.org ai oi sekea)

Noga! magasin No. 2, 2019, “Leseni 6 Natudia Durua Totona” bona Noga! No. 2, 2018, “Ruma Bese Ia Moale Daladia 12” ena rau 8-11 be jw.org ai oi itaia)

MATAMATA TAUDIA TOTONA: Inai kahana ladana Matamata Taudia, jw.org ai be mai ena atikol, vidio, bona worksheet, unai ese matamata taudia idia durua diba . . .

edia tama sina bona tadidia o kakadia ida idia hebamo namonamo totona
tama sina ida mai hemataurai ida taravatu idia herevalaia
edia tama sina ese idia trast henia totona

(“Matamata Taudia” ena kahana be jw.org ai oi itaia)

Websait jw.org oi gaukaralaia be davana lasi. moni do oi henia lasi, sabskripsen be lasi, eiava emu ladana do oi rejistaia lasi, bona emu infomeisen do ai noia lasi.