Stadi 16
Hereva Badadia Gwauraidia Lou Bona Imana Gaukaralaia (Gestures)
1 Namona be hereva oi henia ena badina be inai: Idia kamonai taudia be unai hereva amo diba do oi henidia, do idia laloatao bona do idia gaukaralaia totona. Bema oi ura do idia laloatao, hereva badadia oi gwauraidia lou be namo. Gwauraidia lou be gau badana, hadibaia karana lalonai.
2 Hereva badadia gwauraidia lou karana ena namo be rua: (1) Taunimanima ia durudia, unai hereva idia laloatao totona. (2) Ia durudia, edia anina idia lalo-pararalaia totona.
3 Hereva badadia gwauraidia lou. Gwauraidia lou daladia ruaosi be inai: Emu hereva lalonai oi gwauraidia lou, eiava emu hereva dokonai oi gwauraidia lou. Hereva lalonai, hereva badana ta oi gwauraia hedinarai murinai, ena anina oi gwauraia lou, bena ia murinai do oi gwauraia herevana badana dekenai oi hakapua, bena unai bamona oi karaia loulou ela bona hereva badadia iboudiai oi gwauraidia vadaeni.
4 Hereva dokonai, hereva badadia oi gwauraidia lou neganai, hereva ena anina ibounai be sentens rua eiava toi lalodiai oi gwauraia diba. Gwauraia lou daladia haida be inai: Hereva hegeregerena ta amo, o siri duahia amo, o henanadai ta amo. Bema pablik tok ta oi henia, emu hereva dokonai, miniti 5 bamona lalodiai, oiemu hereva ena siri badadia bona hereva badadia oi gwauraidia lou. Hereva badadia gwauraidia lou dalana ma ta be inai: Oiemu hereva oi hamatamaia neganai, emu hereva ena hereva badadia oi gwauraidia guna, bena emu hereva ena kahana badana o body lalonai unai hereva badadia ta ta edia anina oi gwauraia hedinarai.
5 Edia anina idia lalo-pararalaia lasi herevadia oi gwauraidia lou. Bema oi laloa oi haroro henidia taudia ese oi gwauraia vadaeni herevana badana ta ena anina idia lalo-pararalaia lasi, namona be unai hereva be dala idauna ta amo oi gwauraia lou, anina do idia abia namonamo totona.
6 Imana gaukaralaia. Hereva oi henia neganai, namona be oiemu imana oi gaukaralaia, hereva badadia hahedinaraidia goevagoeva totona. Oi gaukaralaia diba, gau ta ena oromana hahedinaraia totona, eiava hereva ta ena mamina habadaia totona.
7 Imana gaukaralaia, gau ta ena oromana hahedinaraia totona. Emu hereva lalonai, bema kara ta karaia dalana oi gwauraia, emu imana amo unai oi hahedinaraia, eiava bema gau ta ena oromana oi gwauraia, emu imana amo unai oi hahedinaraia, eiava bema gabu ta oi gwauraia, emu imana amo unai gabu oi poinia. Unai bamona oi karaia be auka lasi. Emu hereva ena autlain lalonai, unai bamona gaudia oi tahudia bena oi makaia, bena hereva oi henia neganai, maka do oi itaia bena emu imana do oi gaukaralaia diba unai gau hahedinaraia totona.
8 Imana gaukaralaia, hereva ta ena mamina habadaia totona. Hereva oi henia neganai, bema unai bamona oi karaia, emu hereva do oi hanamoa. To oi naria namonamo, oiemu imana be dala tamona amo oi gaukaralaia loulou garina. Bema emu imana oi gaukaralaia namonamo, emu hereva ena anina bona ena mamina do idia hedinarai goevagoeva.