Stadi 23
Hereva mai Goada Bona mai Lalo-Namo Ida
1 Namona be oi laloa emu hereva ese idia kamonai taudia do ia durudia momokani, badina be oi hegaegaelaia neganai, oi ese unai hereva amo do oi durudia dalana namona oi lalohadailaia, bona idia durua bada herevadia oi abia hidi dainai. Bema unai bamona oi laloa, do oi hereva henidia diba mai emu goada ida, bena oi do idia hakala henia namonamo.
2 Namona be oi hereva mai emu siahu bona mai emu lalona ibounai ida. Unai amo oi hahedinaraia, oi gwauraia herevadia oi abia dae momokani bona oi goadalaia. Paulo ia gwau, namona be Dirava ena lauma be ita lalonai do ia diaridiari. Bema Iena lauma be oi lalonai ia diaridiari, oi be mai emu goada ida do oi hereva neganai, emu hereva ese do idia kamonai taudia edia kudouna do ia hamareredia, bena oi hamaorolaidia karana do idia karaia. Apolo be unai bamona ia hereva mai ena siahu ida.—Roma 12:11; Kara 18:25.
3 Hereva ta be mai emu siahu ida do oi gwauraia diba totona, namona be oi laloa unai hereva be mai anina bada. Unai dainai oi laloa hegaegae noho, ela bona emu lalona ese ia goadalaia bona oi diba momokani ia ese do idia kamonai taudia edia lalona do ia hagoadaia.
4 Hereva ena anina hegeregerena. Emu hereva ibounai lalonai oi hereva goada lasi, idia kamonai taudia do idia hesiku garina. Hereva badadia oi gwauraidia goadagoada, badina be idia ese oi idia kamonai henia taudia do idia doridia, emu hereva do idia abia dae bona do idia badinaia totona.
5 Ena be hereva badana ta oi gwauraia murinai hereva haida oi gwauraia mai emu goada ida lasi be maoro, to idia oi gwauraia lasi hegeregere oi laloa idia be anina lasi bamona. Danu, hereva ta oi goadalaia koikoi lasi be namo.
6 Hereva mai lalo-namo ida. Bema oi hereva mai emu lalo-namo bona mai emu hebogahisi ida, badina be oi ura oi hereva henidia taudia do oi durudia, emu hereva ena mamina idia abia neganai, idia diba oi be lalokau bona hebogahisi tauna. Paulo ena hereva 1 Tesalonika 2:7, 8 ai edia mamina be unai bamona.
7 Bema emu vairana oi huaia oi badu bamona, oi hereva henidia taudia do idia laloa oi moale henidia lasi. Mai emu lalo-namo bona mai emu momokani ida oi gado-namo henidia be namo. Bema oi gado-namo henidia koikoi, unai ena mamina do idia abia. Oi hereva henidia noho lalonai, idia bogaragidiai ia helai tauna ta, vairana toana namo tauna, be oi raraia sisina, hegeregere ia sibona oi hereva henia bamona, bena nega sisina murinai unai bamona tauna ma ta be unai bamona oi kara henia.
8 Oi hereva noho lalonai, oi hereva henidia taudia bema oi lalodia bona oi ura momokani emu lalohadai do oi henidia, emu hereva ena mamina do ia namo. Gau tamona, bema emu gadona ena regena ia auka, lalo-namo ena mamina oi hahedinarai henidia be auka. Bema unai bamona, namona be emu gadona ena regena oi hanamoa toho nega ibounai.
9 Namona be emu gadona ena regena be oi gwauraia noho herevana ena mamina hegeregerena. Iesu ena kara mani oi laloa: Nega ta, taravatu hadibaia taudia bona Farisea taudia ia gwau henidia neganai, ia hereva mai ena siahu bona mai ena badu ida, to iena hereva lalonai, ena gadona ena regena ia haidaua, bona hereva idauna ta, hebogahisi herevana, be ia gwauraia mai ena lalo-namo ida, ia gwau: “Ierusalema e! . . . Nega momo lau ura oiemu natuna lau haboua, kokoroku hahine ese iena natuna iena hanina dekenai ia koua bamona, to oi ura lasi!” Bena ena gadona ena regena ma ia haidaua lou, mai ena badu ida ia gwau: “Inai, umui emui ruma be do ia noho kava anina lasi.”—Mat. 23:37, 38.
10 Ta ena lalona oi ania toho o ena lalona oi hagoadaia toho neganai, bona lalohisihisi tauna ena lalona oi hanamoa toho neganai danu, mai emu lalo-namo bona mai emu hebogahisi ida oi hereva henia be namo.