Stadi 26

Hereva Dokona Maorona; Hereva Ena Nega

¹ Hereva ena dokona be ena kwarana dekenai ia hegeregere. Emu hereva ena kwarana o sinado be emu hereva ena dokonai oi gwauraia lou eiava lasi be herevana, to gau badana be emu hereva ena dokona ese emu hereva ena kwarana ia hamomokania, bena kamonai taudia ese emu hereva ena dokona herevadia do idia kamonai neganai, ena kwarana do idia laloa lou, bona do idia diba goevagoeva, dahaka be emu hereva dainai do idia karaia be namo.

² Hereva ena dokona ese idia kamonai taudia ia hadibadia dahaka do idia karaia be namo. Hereva ta oi henia ena badina korikorina be inai: Oi ese oi hereva henidia taudia oi hagoadadia toho, kara ta do idia karaia totona, eiava lalohadai ta do idia abia dae totona. Unai dainai, namona be emu hereva ena dokona oi gwauraia mai emu momokani bona mai emu goada ida. Bema sentens kwadogidia amo oi hereva, unai ese emu hereva do ia hagoadaia. Emu hereva ena dokona ai, oi hahedinaraia goevagoeva, badina be dahaka emu hereva do idia badinaia be namo, bona edena dala amo do idia badinaia.

³ Nega momo ruma-ta-ruma-ta haroro gaukarana lalonai iseda hereva edia dokona idia manoka bamona, badina be ruma tauna ita hadibaia namonamo lasi dahaka do ia karaia be namo; ita ura buka ta do ia abia dae, eiava do ia gwau ena lalona ia hegeregere do ita lou henia, to eda ura ita gwauraia hedinarai goevagoeva lasi.

⁴ Haroro Sikuli lalonai, bema emu hereva ena dokona ai oi ese ena badina badadia oi gwauraidia lou sibona, unai be hegeregere lasi. Unai hereva do idia gaukaralaia o do idia badinaia dalana o unai hereva ese do ia hanamodia dalana, be oi hamaorolaidia danu be namo. Nega haida, oi duahia vadaeni Baibel siridia haida oi gwauraidia lou be namo, emu hereva ena badina badadia hahedinaraia lou totona.

⁵ Hereva ena dokona ena lata ia maoro. Dina gauna amo hereva dokona ena lata ita hahetohoa lasi. Herevana ia lata eiava ia kwadogi, bema ia ese ena anina ia havaraia, vadaeni ena lata ia maoro.

⁶ Unai hegeregerena, ena be Hadibaia Tauna ena hereva ena dokona (12⁠:​13, 14) ia kwadogi bona Iesu ena haroro herevana ta ena dokona ia lata (Mat. 7⁠:​24-27), to idia ruaosi idia maoro.

⁷ Namona be emu hereva ena dokona lalonai, emu hereva ena oromana amo oi hahedinaraia goevagoeva emu hereva be kahirakahira do ia doko. Bema oi be Haroro Sikuli tauna matamatana, hereva ena dokona kwadogina bona haragana oi gwauraia be namo.

⁸ Nega. Hereva ena kahana iboudiai edia nega idia maoro be gau badana. Bema oi ese hereva momo oi gwauraia bona emu nega oi hanaia, emu hereva idia kamonai taudia do idia hesiku, bena emu hereva ginigabedia edia anina do idia abia lasi. Emu nega ia ore dainai, reana hereva momo oi herevalaia haragaharaga, bona edia anina ia hedinarai namonamo lasi. To, bema emu hereva be kwadogi herea dainai oi halataia toho, hereva haida do oi herevalaia kava, bena emu hereva do ia hesiriu namonamo lasi.

⁹ Bema ta ese ena nega ia hanaia nega momo, unai amo ia hahedinaraia ia be sibona ia laloa, haida ia lalodia lasi. Bema hebou ta ena program lalonai hereva haida idia noho, hereva henia taudia ese idia ta ta be ena nega ena nega ai idia hadokodia maoromaoro be gau badana. Inai bamona: Bema hebou ta lalonai hereva be ima, bona bema hereva taudia ta ta iboudiai ese edia nega be miniti tamona amo idia hanaia, hebou ena program ibounai ena nega be miniti ima amo do idia halataia, bona unai dainai hebou taudia haida do idia hesiku reana. To bema ta ese ena nega ia hagugurua lasi, reana murinai tauna ia hegaegae lasi, ena hereva be unai neganai do ia gwauraia matamaia.

¹⁰ Haida ese edia nega idia hanaia ena badina badana be, hereva momo herea idia abia hegaegae dainai. Emu hereva oi hegaegaelaia neganai, unai oi laloa be namo. Bema oi hegaegaelaia namonamo, ena badina o point iboudiai do oi gwauraia namo herea, to emu nega do oi hanaia lasi.

¹¹ Bema Sikuli naria tauna ia hahedinaraia hereva ta ena nega ia ore, hereva henia tauna ese ena hereva be sentens tamona amo ia hadokoa be namo. Bena unai dala amo ena hereva ia hagugurua namonamo diba, ena hereva ena lata ia maoro.

¹² Emu hereva oi hegaegaelaia neganai, hereva badadia oi makaia goevagoeva, bena oi herevalaia lalonai, bema oi itaia oiemu nega orena be hegeregere lasi emu hereva oredia do oi herevalaidia, hereva maragidia haida oi rakatanidia bona hereva badadia sibona oi gwauraidia.

¹³ Unai do oi karaia namonamo totona, emu hereva ena nega oi haria, bena miniti hida be emu hereva ena kahana ta ta ai do oi haorea diba be emu hereva ena autlain pepana ena isena dekenai oi torea. Bena, oi herevalaia noho lalonai, emu dina gauna amo oi sekea. Bema kahana ta ena nega oi hanaia vadaeni, hereva haida oi rakatania be namo. Namona be nega oi haria namonamo guna, emu hereva ena matamana, bona ena badina badadia bona ena dokona danu do oi gwauraia namonamo totona.