Abata Negana amo ela Bona Aigupito amo Dirava ese Ia Hamauridia

Taunimanima eit sibona be Abata amo idia roho mauri, to gabeai edia namba ia bada daekau bona tausen momo ia abia. Abata ia vara bena lagani 352 murinai, Aberahamo ia vara. Dirava ese ena gwauhamata Aberahamo dekenai ia hamomokania bona natuna ta ladana Isako ia henia dalana ita dibaia. Bena, Isako ena natuna rua amo, Dirava ese Iakobo ia abia hidi.

Iakobo be mai ena ruma bese badana, natuna memero 12 bona kekeni haida. Iakobo ena natudia 10 ese edia tadina, Iosepa, idia ura henia lasi dainai, Aigupito dekenai idia hoihoilaia, hesiai gaukara ia karaia totona. Gabeai, Iosepa be Aigupito ena lohia tauna badana ai ia lao. Doe badana ia vara neganai, Iosepa ese iena tadikaka ia tohoa, ia ura diba bema edia lalona idia haidaua. Gabeai Iakobo ena ruma bese ibounai, Israela taudia unai, be Aigupito dekenai idia lao. Aberahamo ia vara bena lagani 290 murinai unai ia vara.

Israela taudia be lagani 215 lalonai Aigupito dekenai idia noho. Iosepa ia mase murinai idia be hesiai taudia ai idia lao. Gabeai, Mose ia vara bona Dirava ese Mose ia gaukaralaia Israela taudia be Aigupito amo ia hamauria totona. Inai KAHANA 2 ai lagani 857 lalonai idia vara gaudia edia sivarai do ita herevalaia.