Spai Taudia 12

INAI tatau ese idia huaia huahua mani oi itaia. Inai vain rigi dekenai idia noho huahua be momo herea. Ia metau dainai, tatau rua ese idia huaia. Bona fig bona apolo bamona huahua mani oi itaia. Inai huahua namo hereadia be edeseni amo idia mai? Kanana tanona amo idia mai. Laloaboio lasi, Aberahamo, Isako bona Iakobo be guna Kanana tanona dekenai idia noho. To hitolo bada negana ia vara dainai, Iakobo mai ena ruma bese danu be Aigupito dekenai idia lao. Lagani 216 murinai, Mose ese Israela taudia be Kanana tanona dekenai ia hakaudia lao. Hari idia be taunimanima idia noho lasi gabuna ta ladana Kadesi dekenai idia mai.

Kanana taudia edia kara be dika. Unai dainai, Mose ese spai taudia 12 ia siaia, bona idia ia hamaoroa: ‘Umui tahua namonamo taunimanima hida idia noho unuseniai, bona idia be goada taudia eiava? Itaia namonamo bema tano ia namo aniani idia tubu totona. Bona huahua haida umui mailaia danu.’

Spai taudia be Kadesi dekenai idia giroa neganai, Mose idia hamaoroa: ‘Ia be tano namo herea.’ Edia hereva hamomokania totona, Mose dekenai huahua haida idia hahedinaraia. To spai taudia 10 idia gwau: ‘Unai gabu taudia be bada bona mai goada. Bema tano ita abia toho ita do idia alaia mase.’

Israela taudia be unai hereva idia kamonai neganai, idia gari. Idia gwau: ‘Guna Aigupito dekenai eiava taunimanima idia noho lasi gabuna dekenai ita mase be namo. Tuari dekenai do ita mase, bona iseda hahine bona natudia do idia abia. Namona be hakaua tauna matamata ese Mose ena gabu ia abia bona Aigupito dekenai ita giroa lou!’

To spai taudia rua be Iehova idia abidadama henia, bona taunimanima edia gari idia koua toho. Edia ladadia be Iosua bona Kaleba. Idia gwau: ‘Gari lasi. Iehova be ita ia durua bona tano do ita abia diba.’ To taunimanima be idia kamonai lasi. Idia ura Iosua bona Kaleba idia alaia mase.

Unai dainai Iehova ia badu momokani bona Mose ia hamaoroa: ‘Lagani 20 bona 20 idia hanaia taudia ibounai be Kanana tano dekenai do idia vareai lasi. Aigupito bona taunimanima idia noho lasi tanona dekenai lau karaia hoa karadia idia itaia, to idia be lau idia do abidadama henia lasi. Unai dainai lagani 40 do idia loaloa taunimanima idia noho lasi tanona dekenai ela bona idia mase. Iosua bona Kaleba sibodia be Kanana tanona dekenai do idia vareai.’