Gideona Bona Ena Tatau 300

DAHAKA oi itaia iniseniai? Inai tatau ibounai be Israela ena tuari taudia. Idia tui diho taudia be ranu idia inua noho. Idia kahirakahira ia gini tauna be Hahemaoro Tauna Gideona. Ranu idia inua dalana ia itaia noho.

Inai tatau ese ranu idia inua daladia idauidau mani oi itaia namonamo. Haida edia vairana be ranu dekenai idia atoa diho momokani. To tau ta be ena imana amo ranu ia abia bona ia inua, unai amo idia vara gaudia ia itaia diba. Unai be gau badana, badina Iehova ese Gideona ia hamaoroa, ranu inua neganai idia itaia noho taudia sibona do ia abia hidi, to idia itaia lasi taudia do ia siaidia giroa. Ena badina mani ita itaia.

Israela taudia be hekwakwanai momo idia davaria lou. Badina Iehova ena hereva idia badinaia lasi. Midiana taudia ese idia biagudia bona idia hahisidia noho. Unai dainai Israela taudia be Iehova dekenai idia boiboi bona ia kamonai henidia.

Iehova ese Gideona ia hamaoroa tuari oreana ta do ia abia, unai dainai Gideona ese tuari taudia 32,000 ia haboua. To Israela idia tuari henia taudia be 135,000. To Iehova ese Gideona ia hamaoroa: ‘Oiemu tatau be momo herea.’ Dahaka dainai Iehova be unai bamona ia hereva?

Badina bema Israela taudia idia kwalimu, reana idia laloa sibodia edia goada dekenai idia kwalimu. Reana do idia laloa idia kwalimu totona Iehova ena heduru idia abia be anina lasi. Unai dainai Iehova ese Gideona ia hamaoroa: ‘Gari taudia ibounai oi hamaoroa do idia giroa lou.’ Gideona be unai bamona ia hereva neganai, ena tuari taudia 22,000 idia giroa lou. Tatau 10,000 sibona idia noho unai tuari taudia ibounai 135,000 idia tuari henia totona.

To, kamonai! Iehova ia gwau: ‘Emu tatau be do momo herea.’ Unai dainai Gideona ia hamaoroa namona be inai sinavai ena ranu idia inua guna, bena ranu dekenai edia vairana idia hadihoa momokani taudia ibounai ia siaia giroa. Iehova ia gwau: ‘Inua neganai idia itaia noho taudia 300 umui kwalimu!’

Tuari negana ia ginidae. Gideona ese ena tatau 300 be orea toi dekenai ia haria. Idia ta ta dekenai kibi bona hodu mai edia tosi ia henia. Hanuaboi momokani neganai, idia ibounai be edia inai taudia edia kamepa idia gegea. Bena, nega tamona edia kibi idia hiriria bona hodu idia hamakohia, bona idia boiboi: ‘Iehova ena tuari kaia bona Gideona ena!’ Edia inai taudia idia noga neganai, idia daradara bona idia gari. Idia ibounai idia heau bona Israela taudia idia kwalimu.