Babulonia Dekenai Idia Lao Negana amo ela Bona Ierusalema Ena Magu Idia Haginia Lou

Israela taudia be Babulonia dekenai idia noho neganai, edia abidadama ia tohoa gaudia momo idia davaria. Sataraka, Misaka bona Abetenigo be lahi siahuna lalonai idia negea vareai, to Dirava ese ia hamauridia. Gabeai, Mede bona Parasa taudia ese Babulonia idia halusia murinai, Daniela be laiona ena guri lalonai idia negea, to Dirava ese laiona edia uduna ia koua karana amo ia danu ia gimaia.

Dokonai, Parasa edia king Kurese ese Israela taudia ia ruhaia. Babulonia dekenai dibura taudia bamona idia abidia lao bena lagani 70 idia ore murinai, edia tano dekenai idia giroa. Ierusalema dekenai idia giroa lou neganai, idia karaia gauna ginigunana ta be Iehova ena dubu idia haginia hamatamaia. To, daudau lasi murinai edia inai taudia ese edia gaukara idia koua. Unai dainai Ierusalema dekenai idia giroa bena lagani 22 idia ore murinai, dubu idia karaia haorea.

Gabeai, Esera be dubu hahelagaia totona Ierusalema dekenai ia giroa lou ena sivarai do ita dibaia. Unai be dubu idia haorea bena lagani 47 murinai ia vara. Bena, Esera ena vadivadi negana amo lagani 13 idia ore murinai, Nehemia ese Ierusalema ena magu hanamoa gaukarana ia durua. KAHANA 5 ai lagani 152 lalonai idia vara gaudia edia sivarai do ita herevalaia.