Karoa 10

Peroveta Herevana ta Ia Momokani be Oi Itaia Vadaeni

Nega ta inai oi laloa a: Dahaka dainai hari inai negai gau iboudiai idia idau, lagani 100 idia lao vadaeni neganai hegeregerena lasi? Gau haida be idia namo idia lao vadaeni. Tano momo lalodiai, gorere metaudia idia hanamoa diba, bona taunimanima edia taga ese edia tubudia edia taga ia hanaia momokani. To hanaia laganidia 80 lalodiai tuari dika rohorohodia rua bona dagedage karadia dika rohorohodia idia karaia. Taunimanima edia noho idia hadikaia noho gaudia be inai: Tanobada taudia idia momo daekau haraga; tanobada idia hamiroa bona idia hadikaia; bese idauidau ese tuari gaudia idau hereadia momo idia atoa hegaegae. Dahaka dainai hari inai nega be idau vaitani, nega gunadia hegeregeredia lasi?

1. (Hamatamaia herevana danu) (a) Hari inai nega be edena bamona ia idau, nega gunadia hegeregeredia lasi? (b) Dahaka ese ita ia durua, unai ena badina ita diba totona?

UNAI henanadai be Baibel ena peroveta herevana ta ese ia haerelaia. Unai hereva ia momokani be oi ese oi itaia vadaeni. Unai peroveta herevana, Iesu ese ia gwauraia, ese ia hahedinaraia Dirava ese Baibel ia havaraia bona ita be tanobada ena dokona negana lalonai ita noho hari. Vadaeni, unai hereva be dahaka, bona edena bamona ita diba ena anina be hari ia vara noho?

Iesu ena Peroveta Herevana Badana

2, 3. Iesu ena hahediba taudia ese edena bamona idia nanadaia, bona ena haere be edeseniai ita davaria?

² Baibel ia gwau, Iesu ena mase be ia kahirakahira neganai, ena hahediba taudia ese Ierusalem ena dubu helaga ena ruma badadia idia herevalaia, badina be edia bada idia hoalaia bona idia laloa do idia noho nega daudau. To Iesu ia gwau: “Inai hairai gaudia umui itaia, a? Umui lau hamaoroa momokani, nadi ta nadi ta latanai do ia noho lasi, ibounai do idia moru diho.”​—Mataio 24:​1, 2.

³ Iesu ena hahediba taudia ese iena hereva idia hoalaia dainai, gabeai idia nanadaia, idia gwau: “Mani oi hamaoroa ai dekenai, oiemu hereva gauna edena negai do idia vara? Do oi giroa mai, bona tanobada dokona danu, ena toana be dahaka?” (Mataio 24:3) Iesu ena haere be Mataio karoa 24 bona 25, Mareko karoa 13 bona Luka karoa 21 dekenai idia torea. Tanobada dekenai ia noho neganai ia halasia peroveta herevana badana be unai.

4. Dahaka gau idauidau idia nanadailaia unai?

⁴ Iesu ena hahediba taudia ese gau tamona idia nanadailaia lasi. Inai bamona idia nanadaia guna: “Oiemu hereva gauna edena negai do idia vara?” anina be, Ierusalem bona ena dubu be edena negai do idia hadikaia ore? Ma danu, idia ura idia diba, Iesu be Dirava ena guba Basileiana ena Papapava siahuna ai do ia ginidae bona inai tanobada ena dokona edia toana be dahaka.

5. (a) Iesu ena peroveta herevana be edena negai ia momokani guna, to ena anina be edena negai ia vara guguru? (b) Iesu ese ena hahediba taudia edia henanadai edena bamona ia haerelaia matamaia?

⁵ Iesu ese unai henanadai ruaosi ia haerelaia. Ena hereva momo edia anina be aposetolo edia nega lalonai ia vara, ela bona Roma taudia ese Ierusalem idia hadikaia ore, lagani 70 C.E. lalonai. (Mataio 24:​4-22) To gabeai, iseda nega lalonai, iena peroveta herevana be mai anina bada. Vadaeni, Iesu be dahaka ia gwau? Ena hereva ena matamana, siri 7 bona 8 ai ia torea, be inai: “Bese ta ese do ia toreisi, bese ta do ia tuari henia. Bona basileia ta ese do ia toreisi, basileia ta do ia tuari henia. Gabu idauidau dekenai hitolo bada do ia vara, tano danu do ia mareremarere. To unai be hisihisi nega ena hamatamaia sibona.”

6. Dahaka peroveta herevana ma ta be Iesu ena hereva Mataio 24:​7, 8 ai hegeregerena?

⁶ Iesu ese ia hahedinaraia goevagoeva, guba Pavapavana siahuna ai do ia ginidae neganai, heiriheiri bada be tanobada dekenai do ia vara. Peroveta matahanaina ta Apokalupo bukana lalonai ese unai ia hamomokania. (Apokalupo 6:​1-8) Ia lalonai hosi-gui taudia 4 idia hedinarai. Ginigunana ese kwalimu Pavapavana Iesu Keriso ia laulaulaia. Hosi-gui taudia oredia mai edia hosi ida ese tanobada dekenai idia vara gaudia idia laulaulaia; unai gau, Iesu ia lohia matamaia toana, be inai: tuari, hitolo bada, bona taunimanima hamasedia gaudia idauidau. Vadaeni, unai peroveta herevadia ruaosi hari inai negai idia momokani be ita itaia, a?

Tuari!

7. Apokalupo ena hosi-gui tauna iharuana ese dahaka ia laulaulaia?

⁷ Mani unai hereva ita tahua namonamo. Iesu ia gwau: “Bese ta ese do ia toreisi, bese ta do ia tuari henia. Bona basileia ta ese do ia toreisi, basileia ta do ia tuari henia.” Unai hegeregerena, Apokalupo ena hosi-gui taudia haniosi amo iharuana ese tuari ia laulaulaia. “Hosi kakakakana ta ia mai. Ia dekenai ia guia tauna be siahu idia henia, ia ese tanobada dekena amo maino do ia kokia, taunimanima sibodia ta ta do idia alaia mase totona. Unai tau dekenai tuari kaia badana ta idia henia.” (Apokalupo 6:4) To lagani tausen haida lalodiai idia tuari loulou vadaeni. Dahaka dainai unai hereva be mai anina bada hari inai nega lalonai?

8. Dahaka dainai ita laloa tuari be toana ena kahana badana?

⁸ Mani inai oi laloa: Tuari sibona be Iesu ena lou mai toana lasi. Toana be inai: Iesu ese ia perovetalaia gaudia iboudiai be nega ta lalonai idia vara. To ia gwauraia gauna ginigunana be tuari, unai dainai unai hereva be dala badana amo ia momokani be maoro. Bona, momokani, lagani 1914 ema bona hari, tuari bada hereadia idia vara, tuari gunadia iboudiai idia hanaia momokani.

9, 10. Unai tuari herevadia be edena bamona idia momokani matamaia?

⁹ Ena be unai tuari gunadia lalodiai taunimanima momo idia hadikadia ore mai edia dagedage ida, to unai tuari be vanegai idia karaia tuari bada hereadia ruaosi ida idia hegeregere lasi. Tanobada ibounai tuarina ginigunana dainai taunimanima 14 milion idia mase, unai ese tano momo noholaia taudia edia momo ia hanaia. Momokani, Apokalupo ena hosi-gui tauna iharuana dekenai “siahu idia henia, ia ese tanobada dekena amo maino do ia kokia, taunimanima sibodia ta ta do idia alaia mase totona.”

¹⁰ Peroveta herevana ia gwau “tuari kaia badana ta idia henia” danu. Unai ena anina be inai: Tuari gaudia matamatadia amo taunimanima momo idia aladia mase haraga diba. Unai gau haida be inai: tanika, peleini, poisoni gas, sabmarini, bona ipidi badadia, idia edia katresi be bomu hegeregeredia. Bona tanobada ibounai tuarina ginigunana negana ema bona hari, “tuari kaia badana” ena hamasea siahuna idia habadaia​—idia ese reidio, reida, ipidi idaudia, taunimanima hagoreredia bona hadikadia muramuradia, lahi halasia gaudia, lahi bomudia bona bomu matamatadia idaudia, roketi badadia, niuklia sabmarinidia, peleini idaudia, bona tuari sisimadia bada hereadia idia tuarilaia dainai.

“Hisihisi Nega ena Hamatamaia”

11, 12. Edena dala amo tanobada ibounai tuarina ginigunana be “hisihisi nega ena hamatamaia sibona”?

¹¹ Iesu ena peroveta herevana ena siri ginigunadia edia dokona be inai: “Unai be hisihisi nega ena hamatamaia sibona.” Unai be momokani, tanobada ibounai tuarina ginigunana dekenai. Lagani 1918 ai ia ore murinai, maino ia ore lou haraga. Nega sisina murinai, tuari maragidia be Ethiopia, Libya, Spain, Russia, India, bona ma tano haida lalodiai idia karaia mai edia dagedage bada ida. Bena tanobada ibounai tuarina iharuana, tuari dika rohorohona, be ia vara; ia lalonai taunimanima 50 milion, tuari taudia bona hanua taudia, be idia mase.

¹² Danu, ena be nega ta ta maino idia gwauhamatalaia bona tuari amo idia sipele, to tanobada taudia idia tuari noho. Lagani 1987 ai ripoti ta lalonai idia gwau, lagani 1960 amo ema bona unai lagani, tuari badadia 81 lalodiai taunimanima 12,555,000 idia aladia mase. Lagani 1987 lalonai tuari momo idia karaia, lagani gunadia iboudiai ia hanaia.¹ Danu, lagani ta ta iboudiai, tanobada besedia ese K1,000,000,000,000 idia negea tuari totona; unai ese tanobada ibounai ena moni gaukaralaia dalana ia hagagevaia.² Iesu ena hereva, ‘bese ta bese ta ida bona basileia ta basileia ta ida do idia tuari’ herevana, ena anina be momokani ia vara noho. Tuari hosina kakakakana be tanobada dekenai ia heau noho mai ena dagedage ida. To toana ena kahana iharuana be edena bamona ia vara?

Hitolo Bada!

13. Iesu ese dahaka hisihisi ia perovetalaidia, bona Apokalupo ena hosi-gui tauna ihatoina ese unai edena bamona ia laulaulaia?

¹³ Iesu ia gwau: “Gabu idauidau dekenai hitolo bada do ia vara.” Unai be Apokalupo ena hosi-gui tauna ihatoina herevana hegeregerena: “Lau itaia, hosi koremana ta ia hedinarai. Ia dekenai ia guia tauna ese metau hahetohoa gauna sikele ta iena imana dekenai ia dogoatao. Gado ta, mauri gaudia 4 edia huanai dekena amo lau kamonai, ia gwau, ‘Uiti kilogarama ta sibona be dina ta ena gaukara davana, bona bali kilogarama toi sibona be dina ta ena gaukara davana. To dehoro bona uaina be do umui hadikaia lasi.’ ” (Apokalupo 6:​5, 6) Oibe, aniani dekenai idia dabu momokani!

14. Dahaka doe badadia lagani 1914 murinai idia vara ese Iesu ena peroveta herevana idia hamomokania?

¹⁴ Hari inai negai, tanobada besedia haida be mai edia kohu momo neganai, inai peroveta herevana ia momokani diba, a? Tanobada sivaraina dainai unai ita daradaralaia diba lasi. Idaunega amo ema bona hari, hitolo bada negadia be tuari bona hisihisi badadia ma haida dainai idia vara. Unai hegeregerena, hanaia lagani 80 bamona lalodiai hisihisi badadia momo bona tuari momo idia vara dainai, hitolo bada be tanobada ena kahana idauidau momo dekenai ia vara loulou. Ripoti ta ia gwau, lagani 1914 amo ema bona hari, hitolo bada be nega 60 mai kahana idia vara, inai tano idauidau dekenai: Greece, Netherlands, U.S.S.R., Nigeria, Chad, Chile, Peru, Bangladesh, Bengal, Kampuchea, Ethiopia, bona Japan.³ Unai hitolo bada negadia haida idia doko lasi ela bona lagani haida idia ore, bona idia dainai taunimanima milion momo idia mase.

15, 16. Dahaka hitolo ma ta ese taunimanima momo ia hadikadia momokani?

¹⁵ Unai doe badadia be gabeai idia doko bena idia mauri noho taudia edia hitolo ia ore. To, hari inai negai taunimanima momo be dala idauna amo aniani dekenai idia dabu hanaihanai. Ena be inai hitolo ia ore lasi, to nega momo taunimanima oredia ese idia laloa lasi. Inai dala amo idia hitolo taudia ese nega ibounai aniani sisina sibona o tauanina hagoadaia lasi anianidia idia ania dainai idia tubu daekau namonamo lasi bona edia tauanina idia manoka. Tanobada taudia iboudiai 5 5 amo ta ta be inai bamona idia hitolo, bona lagani ta ta iboudiai taunimanima 13 milion ia lao 18 milion be inai hitolo dainai idia mase.⁴

¹⁶ Anina be, inai bamona hitolo ese dina rua lalodiai ia hamasedia taudia edia momo be atom bomu ese Hiroshima dekenai ia hamasedia taudia edia momo hegeregerena. Momokani, lagani rua rua iboudiai hitolo dainai idia mase taudia edia momo ese tanobada ibounai tuaridia ruaosi lalodiai idia mase tuari taudia edia momo ia hanaia. Momokani, lagani 1914 ema bona hari, ‘gabu idauidau dekenai hitolo bada ia vara’!

Tano ia Mareremarere

17. Nega sisina lagani 1914 murinai, dahaka tano-laga badana ia vara?

¹⁷ Tanobada ibounai tuarina ginigunana ia vara bena hua 5 sibodia murinai, January 13, 1915 ai, Abruzzi, Italy dekenai, tano ia mareremarere neganai, taunimanima 32,610 idia mase. Unai hisihisi badana dainai Iesu ena hereva ita laloa; ia gwau do ia ginidae neganai tuari bona hitolo do idia vara, ma ia gwau: “Gabu idauidau dekenai . . . tano danu do ia mareremarere.” Tuari bona hitolo bada hegeregeredia, Abruzzi dekenai tano ia mareremarere be “hisihisi nega ena hamatamaia sibona.”

18. Iesu ena peroveta herevana tano-laga dekenai be edena bamona ia momokani?

¹⁸ Hanaia laganidia 80 bamona lalodiai tano ia mareremarere loulou, bona bese iboudiai be idia diba unai ese dika bada herea ia havaraia. Tano ia mareremarere dainai, lagani 1920 ai taunimanima 200,000 be China dekenai idia mase; lagani 1923 ai 99,300 be Japan dekenai idia mase; lagani 1935 ai 25,000 be Pakistan dekenai idia mase, bona lagani 1939 ai 32,700 be Turkey dekenai idia mase. Lagani 1970 ai 66,800 be Peru dekenai idia mase. Lagani 1976 ai, 240,000 (haida idia gwau 800,000) be Tangshan, China dekenai idia mase. Bona vanegai, lagani 1988 ai, 25,000 idia mase, tano-laga badana ta be Armenia dekenai ia vara neganai.a Momokani, ‘gabu idauidau dekenai tano ia mareremarere’!⁵

“Ta Ta Dekenai Do Ia Hanaia Gorerena”

19. Dahaka danu be Iesu ese ia perovetalaia bona Apokalupo ena hosi-gui tauna namba 4 ese ia laulaulaia?

¹⁹ Iesu ese gorere danu ia perovetalaia. Iena hereva be Luka ese inai bamona ia torea: “Gabu ibounai dekenai . . . ta ta dekenai do ia hanaia gorerena do idia vara.” (Luka 21:11) Unai danu be Apokalupo ena peroveta matahanaina ena anina hegeregerena. Ia lalonai hosi-gui tauna namba 4 ena ladana be Mase. Ia ese mase ia laulaulaia, “gorere” bona “dagedage gaudia” bona unai bamona gaudia ma haida amo ia vara masena unai.​—Apokalupo 6:8.

20. Dahaka dai-hanai gorere badana ia vara Iesu ena peroveta herevana hegeregerena?

²⁰ Lagani 1918 bona 1919 lalodiai, taunimanima 1,000,000,000 be huahua gorerena ta ladana Spanish Influenza idia abia, bona 20,000,000 idia mase. Unai ese tuari badana lalonai idia mase taudia edia momo ia hanaia.⁶ Ena be doketa ese edia diba idia habadaia loulou, to gorere ese taunimanima idia hadikadia noho, hari inai nega lalonai. Badina ta be inai: Ena be doketa ese gorere momo idia hanamoa diba, to ogogami tanodia ai taunimanima be unai gorere dainai idia mase, badina be unai bese edia moni ia hegeregere lasi unai heduru do idia abia.

21, 22. Taga momo tanodia ai bona ogogami tanodia ai, gorere ese taunimanima edena bamona ia hadikadia?

²¹ Unai hegeregerena, tanobada ibounai lalonai taunimanima 150 milion be maleria idia abia, 200 milion be kururu fiva idia abia, 10 milion be Chagas gorerena idia abia, bona 40 milion be sinavai matakepulu gorerena idia abia. Lagani ta ta iboudiai kukuri ranu gorere dikadia ese memero kekeni maragidia milion momo idia hamasedia.⁷ Lepra gorerena bona T.B. gorerena ese taunimanima momo idia hadikadia noho. Tanobada ena ogogami taudia be hisihisi idia ania noho, badina be ‘gabu ibounai dekenai ta ta dekenai idia hanaia goreredia idia vara’ dainai.

²² To taga taudia ese danu. Huahua gorerena ese moni momo taudia bona ogogami taudia danu ia hagoreredia. Lagani 1957 ai huahua gorerena ese taunimanima 70,000 ia hamasedia United States dekenai. Germany dekenai idia gwau taunimanima 6 6 amo ta ta be kensa gorerena do idia abia.⁸ Mahuta hebou karadia amo ta ta dekenai idia hanai goreredia danu ese taga taudia bona ogogami taudia idia hadikadia. United States dekenai momo ese gonoria idia abia, bona Africa dekenai taunimanima 5 5 amo ta ta ese idia abia.⁹ Tanobada ena gabu momo dekenai, taunimanima momo ese sifilis, klamidia bona herpes idia abia.

23. Dahaka mase gorerena be vanegai ia hedinarai?

²³ Vanegai gorere dikana ma ta ladana AIDS ia hedinarai. Taunimanima ese idia garilaia bada, badina be inai buka ai torea neganai hanamoa muramurana idia do davaria lasi, bona ia hadikadia taudia idia momo daekau noho. Doketa Jonathan Mann, World Health Organisation ena Special Program AIDS totona ena gunalaia tauna, ia gwau: “Ai laloa tanobada ibounai lalonai hari inai negai taunimanima 5 milion ia lao 10 milion ese AIDS gorerena havaraia gaudia idia abia vadaeni.”¹⁰ Ma ripoti ta lalonai idia gwau, miniti ta ta iboudiai AIDS gorerena havaraia gaudia ese taunimanima ta idia hadikaia. Momokani, unai be dai-hanai gorerena ta! To peroveta herevana ma ta, taunimanima be dagedage gaudia amo do idia hamasedia herevana, be edena bamona ia momokani?

“Dagedage Gaudia”

24, 25. (a) Esekiel ese dahaka “dagedage gaudia” ia gwauraidia? (b) Iesu ese edena bamona ia hahedinaraia, ia lou mai vadaeni neganai “dagedage gaudia” be kara dika do idia karaia tanobada dekenai?

²⁴ Nega haida dagedage animaladia be niuspepa ai idia herevalaidia, badina be taunimanima ese edia bese idia hamasedia ore gwauraia dainai. Unai “dagedage gaudia” ese taunimanima idia hadikadia momo lasi. Nega ta ta sibodia taunimanima idia koridia mase, India dekenai taiga ese idia karaia bamona.

²⁵ To Baibel ese dagedage gaudia idaudia ia herevalaia, hari inai negai gari korikori idia havaraia. Peroveta tauna Esekiel ese dagedage taudia be dagedage animaladia ida ia hahegeregeredia, ia gwau: “Ena lohia taudia ia bogaraginai be uda sisiadia bamona; idia alaia gaudia idia darea, rara idia bubua, taunimanima edia mauri idia haorea, kohu be mai edia koikoi ida idia abia totona.” (Esekiel 22:27) Iesu ena peroveta herevana, “kara dikadia danu do idia vara gabu idauidau dekenai,” anina be, ia lou mai vadaeni neganai unai bamona “dagedage gaudia” ese unai kara do idia karaia tanobada dekenai. (Mataio 24:12) Baibel torea tauna Paulo ia gwau: “Nega dokonai . . . taunimanima . . . do idia dagedage, kara namodia do idia ura henia lasi.” (2 Timoteo 3:​1-3) Vadaeni, lagani 1914 amo ema bona hari, unai bamona idia karaia, eiava?

26-28. Dahaka sivarai ese idia hahedinaraia “dagedage gaudia” be tanobada dekenai idia loaloa?

²⁶ Momokani, unai bamona idia karaia. Bema oi be taoni badana ta lalonai oi noho, unai oi diba vadaeni. To bema lasi, inai hereva niuspepa amo ai torea hanai be mani oi laloa. Colombia amo: “Lagani gunanai pulisi be edia ripoti ai idia hahedinaraia, taunimanima 10,000 bamona be haida ese idia hamasedia, bona nega 25,000 raskol taudia mai edia ipidi ese kohu o moni idia henaoa mai edia dagedage ida.” Victoria, Australia amo: “Taravatu Utua Karadia Badadia Idia Momo Daekau Haraga.” United States amo: “New York Dekenai Ala-Ala Karadia Idia Momo Daekau Momokani.”

²⁷ Zimbabwe amo: “Beibi momo herea idia hamasedia.” Brazil amo: “Iniseniai taravatu utua karadia be momo herea bona raskol momo mai edia ipidi be idia loaloa, unai dainai taunimanima ese dagedage karadia sivaraidia idia laloa momo lasi.” New Zealand amo: “Hahine hadikadia karadia bona dagedage karadia idaudia dainai pulisi idia hekwarahi noho.” Spain amo: “Spain dekenai kara dikadia idia momo daekau dainai unai kara idia koua toho.” Italy amo: “Sicily ena Mafia oreana ia goada lou, taunimanima momo idia hamasedia.”

²⁸ Unai bamona ripoti momo be niuspepa ai idia halasia. Momokani, “dagedage gaudia” be tanobada dekenai idia loaloa dainai taunimanima idia gari bada.

Sivarai Namona Idia Harorolaia

29, 30. Iesu ena peroveta herevana hegeregerena, Kerisendom dekenai tomadiho be edena bamona?

²⁹ Iesu ia peroveta, ia gwau do ia lou mai vadaeni neganai, tomadiho karadia do idia habadaia. Ia gwau: “Peroveta koikoi taudia momo danu do idia toreisi, taunimanima momo do idia hakaua kerere.” (Mataio 24:11) Ma ia hahedinaraia Kerisendom taudia momo ese Dirava do idia ura henia lasi. Ia gwau: “Taunimanima momo edia lalokau be do ia keru.”​—Mataio 24:12.

³⁰ Kerisendom lalonai idia vara noho gaudia be ia ese ia gwauraia goevagoeva unai. Gabu iboudiai dekenai dubu oreadia badadia be idia manoka, edia orea taudia ese idia durudia lasi dainai. Guna, Europe ena mirigini kahana tanodia dekenai bona England dekenai, Protestant tomadiho daladia idia goadalaia, to hari inai negai unuseniai tomadiho ia mase gwauraia. Katolik Dubu Oreana be haroro taudia ai ia dabu, bona orea taudia edia heduru ia maragi ia lao. To tomadiho oreadia idaudia haida idia bada idia lao, bona televisen ai idia haroro taudia ese dola milion momo idia gogoa mai edia mataganigani ida.

31. Iesu ese dahaka ia perovetalaia, unai kara amo Keristen momokani taudia ita dibadia?

³¹ To Keristen tomadiho momokanina, Iesu ese ia hamatamaia bona ena aposetolo ese idia harorolaia gauna, be edena bamona? Iesu ia gwau do ia lou mai vadaeni neganai unai tomadiho do ia noho, to taunimanima ese edena bamona do idia dibaia? Ena toana ta be Iesu ese ena peroveta herevana badana lalonai ia gwauraia, ia gwau Keristen momokani taudia ese “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.”​—Mataio 24:14.

32. Edena orea sibona ese Iesu ena peroveta herevana Mataio 24:14 dekenai idia hamomokania?

³² Hari inai nega lalonai, tomadiho oreana ta ladana Iehova ena Witness taudia ese haroro gaukara bada hereana idia karaia noho, Keristen haroro gaukara gunadia iboudiai ia hanaia momokani! (Isaia 43:​10, 12) Guna, lagani 1919 ai, Kerisendom ena tomadiho oreadia badadia ese politik idia laloa bada dainai League of Nations oreana idia harorolaia neganai, Iehova ena Witness taudia idia hegaegae, Basileia ena sivarai namona be tanobada ibounai dekenai do idia harorolaia totona.

33, 34. Basileia ena sivarai namona be tanobada ibounai dekenai edena bamona idia harorolaia?

³³ Unai neganai Witness taudia 10,000 sibodia idia noho, to idia diba unai gaukara do idia karaia be namo. Mai edia goada ida idia haroro matamaia. Idia diba Kerisendom oreadia edia haroro dalana be Baibel ena oda bona aposetolo edia kara hegeregeredia lasi, badina be unai orea lalodiai haida sibodia ese haroro dagidia idia abia. Unai dainai idia iboudiai be haroro taudia ai idia lao bona Dirava ena Basileia harorolaia dalana idia dibalaia.

³⁴ Unai murinai, unai haroro taudia be haida ese idia koudia toho goadagoada. Europe dekenai, gavamani aukadia ese idia koudia toho. United States bona Canada dekenai, idia kota henidia bona aru taudia ese idia dagedage henidia. Tano ma haida dekenai, tomadiho goadalaia dikadika taudia ese idia koudia toho, bona lohia dikadia ese idia dagedage henidia. Hari inai negai, taunimanima edia kamonai lasi karadia bona edia lebulebu karadia dainai idia hekwarahi. To idia haheauka noho, ema bona hari idia milion toi mai kahana be tano 212 dekenai idia gaukara noho. Basileia ena sivarai namona be gabu momo herea dekenai idia harorolaia noho, guna be inai bamona lasi. Momokani, toana ena kahana ta idia hagugurua noho!

Inai Ibounai ena Anina be Dahaka?

35. (a) Peroveta herevadia be hari inai negai idia momokani ese edena bamona ia hamomokania Dirava ese Baibel ia havaraia? (b) Iesu ese ia gwauraia toana ia hedinarai vadaeni ena anina be dahaka, hari inai nega lalonai?

³⁵ Momokani, Iesu ese ia gwauraia toana ia guguru be ita itaia noho. Unai danu ese ia hamomokania Baibel be Dirava ena amo. Taunimanima ta gunaguna ia noho be ia hegeregere lasi, hari inai negai do idia vara gaudia ia perovetalaia. Danu, toana ena anina ia vara ese ia hahedinaraia Iesu Keriso ia lou mai vadaeni bona ita be dokona negana lalonai ita noho. (Mataio 24:3) Vadaeni, Iesu ia lou mai vadaeni anina be dahaka? Bona ia doko gwauraia tanobadana be dahaka? Unai ita diba totona, namona be Baibel ena sinado badana tamona ita tahua namonamo; unai danu ese ia hahedinaraia Dirava ese Baibel ia havaraia. Unai sinado bona hari ia guguru gwauraia dalana be murinai karoa lalonai do ai herevalaia.

[Footnotes]