Dirava

Anina: Atai Herea Diravana, ia sibona ena ladana be Iehova. Iena ladana idauidau Heberu gado ai idia hatoa ese iena goada, ena lohia siahuna, ena hairai, bona ena hereadae idia hahedinaraia. Dirava korikori be idau vaitani, dirava koikoidia hegeregeredia lasi. Idia haida be sibodia na dirava ai idia halaoa; ma haida be taunimanima ese dirava ai idia halaodia bena idia tomadiho henidia.

Dirava ia mauri noho herevana ita abia dae be mai ena badina, a?

Sal. 19:1: “Guba ese Dirava hairaina e gwauraia hedinaraimu; guba ḡaudia ese ia imana ḡaukaradia e hahedinaraiamu.”

Sal. 104:24: “Iehova e, o kara ḡaudia dahaka ini heḡiḡi-boudia; iboudiai na mai aonegamu ida vada o kara, o kara ḡaudia ese tanobada e hahonuamu.”

Roma 1:20: “Dirava ese tanobada ia karaia negana ia mai bona harihari, taunimanima idia kamonai diba Dirava ena siahu be ia doko diba lasi, bona danu idia diba ia sibona be Dirava momokani. Inai bamona idia diba, badina be edia matana dekenai Dirava ese ia karaia gaudia ibounai idia itaia vadaeni.”

New Scientist magasin ia gwau: “Taunimanima idia do laloa noho saiens taudia ese tomadiho idia ‘hakoikoia’ vadaeni. Unai lalohadai dainai taunimanima momo idia laloa saiens taudia idia abia dae lasi Dirava ia mauri noho; Darwin ese ia hamomokania Dirava ia noho lasi; bona unai nega amo saiens taudia ese gau matamatadia idia davaria bona idia karaia dainai, Dirava ia mauri noho herevana be ta ese do ia hamomokania lou diba lasi. Unai lalohadai ia kerere vaitani.”​—⁠May 26, 1977, p. 478.

French Academy of Sciences tauna ta ia gwau: “Guba bona tanobada gaudia iboudiai edia heau dalana be taunimanima ese idia laloa davari lasi eiava aonega siahudia haida ese idia havaraia lasi. . . . Idia heau namonamo dainai, ia hedinarai Ta ese ena aonega amo ia haheaudia namonamo. Unai aonega be Dirava ena.”​—⁠Dieu existe? Oui (Paris, 1979), p. 94, Christian Chabanis ese Pierre-Paul Grassé ena hereva ia gwauraia unai.

Hereva hegeregerena: Kamera o reidio o kompiuta ita itaia neganai, ita diba aonega tauna ta ese ia karaia. Bema ta ia gwau unai gau idia hanaia gaudia​—⁠mata, taia, kwara harana, bona unai bamona gaudia ma haida​—⁠be aonega bada Diravana ese ia havaradia lasi, unai be lalohadai maorona lasi, ani?

Rau 125-7 itaia danu, inai sinado “Gau Iboudiai Havaradia” henunai.

Kara dika bona hisihisi idia vara ese ia hamomokania Dirava be lasi, a?

Mani inai oi laloa: Kaia amo taunimanima idia aladia mase bona tuari neganai peleini amo bomu idia negea diho, to unai ese ia hamomokania lasi kaia bona peleini karaia taudia be lasi. Unai dika ese idia hahedinaraia gauna be inai: Unai gau idia gaukaralaia kerere dainai taunimanima edia lalona idia hahisia.

Gorere momo idia vara badina taunimanima edia mauri daladia be namo lasi bona ranu, hodahoda, bona tano idia hamiroa bona idia hadikaia dainai, ani? Taunimanima edia tuari ese hisihisi bada idia havaraia, ani? Ena be hitolo ese taunimanima milion momo ia hadikadia, to tano haida lalodiai aniani bada ia noho ani, unai dainai unai kerere ena badina ta be mataganigani, ani? Unai gau iboudiai ese idia hahedinaraia lasi Dirava be lasi, to idia hahedinaraia taunimanima be Dirava ese ia henidia aonegana bona tanobada idia gaukaralaidia kerere.

Taunimanima dekenai idia vara gaudia be Dirava ese ia laloa, a?

Oibe! Baibel ia gwau Dirava ese taunimanima ginigunadia ia havaradia neganai idia goevadae. (Gen. 1⁠:​27, 31; Deut. 32:4) To taunimanima ese Dirava ena lalo-namo idia abia noho totona, namona be idia kamonai henia. (Gen. 2⁠:​16, 17) Bema Dirava idia kamonai henia, idia goevadae noho​—⁠idia gorere lasi, hisihisi idia ania lasi, bona idia mase lasi. Dirava ese dala namona ai ia hakaudia bona ena siahu amo ia naridia, dika do idia davaria garina. To taunimanima ese Dirava ena hahekau idia dadaraia; sibodia edia lohia dalana idia abia hidi. Dirava ese ia havaradia lasi idia be sibodia do idia naria totona, unai dainai unai bamona idia karaia toho neganai, sibodia idia hadikaia. (Ier. 10:23; Koh. 8:9; Roma 5:12) To lagani handred momo lalodiai Dirava ese inai bamona taudia ia tahudia: Ia bona ena kara idia ura henia dainai idia ura iena hesiai gaukara do idia karaia. Dirava ese dala ia kehoa idia edia, taunimanima edia kara dika bona edia lohia daladia kereredia dainai idia abia diba lasi gaudia do idia abia totona. (Apok. 21⁠:​3-5) Dirava ese iena Natuna ia siaia, taunimanima be kara dika bona mase amo ia hoidia totona; unai dala amo ia hahedinaraia ia lalokau henidia bada. (Ioane 3:16) Dirava ese dina ta ia gwauraia hidi vadaeni, unai dina ai ia ese tanobada idia hadikaia taudia do ia haoredia, bena kara maoromaoro idia ura henia taudia ese mauri do idia moalelaia, iena palani, matamana neganai ia lalohadailaia gauna, hegeregerena.​—⁠Apok. 11:18; Sal. 37:​10, 11; inai sinado badadia “Hisihisi” bona “Kara Dika” itaia danu.

Dirava be siahu ta sibona lasi

Heb. 9:24: “Keriso ese maoromaoro guba dekenai ia raka vareai. Unuseni Dirava ena vairanai, ita durua totona ia gaukara noho.”

Ioane 4:24: “Dirava be Lauma.”

Ioane 7:28: “Lau ia siaia Diravana be momokani.” (Iesu ena hereva unai.)

1 Kor. 15:44: “Taunimanima edia tauanina idia noho hegeregerena, unai bamona danu guba taudia edia lauma anina idia noho.”

Taunimanima hegeregeredia, Dirava ese lalohisihisi, moale, badu, bona unai bamona gaudia ma haida edia mamina ia abia, a?

Ioane 16:27: “Tamana sibona ese umui ia ura henia, umui ese lau umui ura henia dainai, bona umui hamomokania vadaeni lau be Tamana dekena amo lau mai dainai.”

Isa. 63:9: “Edia hisihisi iboudiai ia ese e hisihisilai . . . Ena lalokau bona ena hebogahisi ai ia ese e rauadia.”

Dirava be mai ena matamana, a?

Sal. 90:2: “Ororo do asie vara, tanobada bona motumotu do so kara, una negana ema bona hari ela bona hanaihanai oi mo Dirava.”

Unai hereva ita abia dae diba, a? Iseda darana ese unai hereva idia lalo-pararalaia momokani diba lasi. To unai dainai ita dadaraia be maoro lasi. Mani inai gau rua oi lalodia: (1) Nega. Ta ese nega ena matamana korikorina ia gwauraia diba lasi. Bona momokani, ena be iseda mauri ia doko, to nega ia doko lasi. Ena be nega ena anina haida ita lalo-pararalaia lasi, to ita gwau lasi nega be lasi. Iseda kara iboudiai be edia nega korikori ai ita karaia. (2) Guba ena padana. Saiens dalana amo guba gaudia idia tahua taudia ese guba ena daudau ena dokona idia davaria lasi. Guba ena daudau herea momokani gabudia idia tahua, to ena dokona idia davaria diba lasi. Ia hedinarai gauna idia gorea lasi; idia momo idia gwau guba ena padana be matamana gabuna lasi bona dokona gabuna lasi. Unai hegeregerena, Dirava ia noho negana be matamana lasi bona dokona lasi.

Gau ma rua: (1) Saiens dalana amo guba gaudia idia tahudia taudia idia gwau, dina ena bogaragina momokani dekenai ena siahu ena bada be 15,000,000° C. Unai siahu ena bada ita lalo-pararalaia diba lasi dainai, unai hereva ita dadaraia, a? Lasi, ani? (2) Tanobada be hisiu oreana bada hereana ladana Milky Way lalonai ia noho; saiens taudia ese Milky Way ena bada idia hahetohoa vadaeni, idia gwau ia bada herea momokani dainai, ena be sekeni tamona lalonai diari be 300,000 kilomita ia lao, to unai hisiu oreana badana ia hanaia lasi ela bona lagani 100,000 idia ore. Unai gabu ena daudau ita lalo-pararalaia momokani diba lasi, ani? To unai hereva ita abia dae badina saiens taudia ese idia hamomokania.

Edena hereva oi abia dae be maoro​—⁠ia mauri noho Diravana mai ena diba ese guba bona tanobada ia havaradia herevana, eiava ia mauri lasi gauna ta amo idia vara kava herevana? Taunimanima haida ese hereva iharuana idia abia dae, badina be bema hereva ginigunana idia abia dae, namona be inai hereva danu idia abia dae​—⁠gau iboudiai ia havaradia Diravana ia noho bona unai Dirava ena kara idia lalo-pararalaia goevagoeva diba lasi. Saiens taudia ese idia mauri gaudia edia kahana maragimaragidia ladana sel lalodiai idia noho gaudia ladana jin edia gaukara dalana idia diba goevagoeva lasi, ani? Bona taunimanima edia kwara harana ena gaukara dalana idia diba goevagoeva lasi danu, ani? To, daika do ia gwau unai gau be lasi? Unai hegeregerena, tanobada bona guba mai edia oromana hereadaena ia havaradia Diravana ita diba goevagoeva lasi be hoa gauna lasi, ani?

Dirava ena ladana ita gwauraia be mai anina bada a?

Roma 10:13: “Dirava ena ladana idia noinoi henia taudia ibounai be mauri do idia davaria.”

Esek. 39:6: “Idia bae diba lau na Iehova.”

Iesu ese ena Tamana ia hamaoroa, ia gwau: “Oiemu ladana danu lau hadibaia vadaeni idia [iena hahediba taudia korikoridia] dekenai, bona do lau hadibaia noho.”​—⁠Ioane 17⁠:26.

Rau 196-7 itaia danu, inai sinado “Iehova” henunai.

Bema ita be mai eda tomadiho, edena Dirava ita tomadiho henia be herevana, a?

1 Kor. 10:20: “Iuda lasi taudia edia boubou gaudia be lauma dikadia dekenai idia henia, Dirava dekenai idia henia lasi.”

2 Kor. 4:4: “Idia abidadama henia diba lasi, badina be inai tanobada ena dirava ese edia lalona ia hadiburaia. Vadaeni Keriso ena hairaina bona iena Sivarai Namona ena diari idia itaia diba lasi. Keriso be Dirava ena toana momokani tauna.” (Unai siri ese Satana Diabolo ia gwauraia “dirava” ta. Ioane Ginigunana 5⁠:19; Apokalupo 12⁠:9 itaia.)

Mat. 7:​22, 23: “Unai dina ia ginidae neganai taunimanima momo do idia hereva lau [Iesu Keriso] dekenai, do idia gwau, ‘Lohiabada e, Lohiabada e, oiemu ladana dekenai guna ai haroro, ani? Oiemu ladana dekenai lauma dika ai lulua bona oiemu ladana dekenai hoa kara momo ai karaia, ani?’ Vadaeni lau ese do lau haere idia dekenai, do lau gwau, ‘Umui be lau diba lasi momokani. Idau gabuna dekenai umui lao, umui dika karaia taudia.’ ” (Ena be ita gwau ita be Keristen taudia, to unai ese ia hamomokania lasi Dirava korikori ese iseda tomadiho ia abia dae.)

Rau 408 itaia danu, inai sinado “Tomadiho” henunai.

Bema Iehova be “Dirava momokani tamona,” Iesu be edena bamona ‘Diravana’?

Iesu ese ena Tamana ia gwauraia “Dirava momokani tamona.” (Ioane 17⁠:⁠3) Iehova sibona ia gwau: “Asi dirava ta, lau mo sibogu.” (Isa. 44⁠:⁠6) Aposetolo Paulo ia gwau Keristen momokani taudia ‘be mai edia Dirava tamona, ia be Tamana.’ (1 Kor. 8⁠:​5, 6) Unai dainai Iehova be idau vaitani; ma ta ena dagi be iena dagi ida ia hegeregere lasi. Kaivakuku, dirava ai idia halaodia taudia, bona Satana be ia ida idia hegeregere lasi. Idia iboudiai be dirava koikoidia.

Buka Helaga ese Iesu ia gwauraia, “Dirava” bona “Siahu-bada Diravana.” (Ioane 1⁠:1; Isa. 9⁠:⁠6) To ia gwauraia lasi Siahu Ibounai Diravana, Iehova ia gwauraia bamona. (Gen. 17⁠:⁠1) Ia gwau Iesu be “Dirava ena hairaina ena diari,” to unai hairai be ena Tamana ena amo ia mai. (Heb. 1⁠:⁠3) Iesu ese ena Tamana ena dagi ia tahua lasi. Ia gwau: “Lohiabada [Iehova] oiemu Dirava dekenai do oi tomadiho henia, ia sibona ena ura do oi karaia.” (Luka 4⁠:⁠8; Deut. 6⁠:13) Iesu be “Dirava bamona ia noho,” bona ena Tamana ia gwau, “Iesu ena ladana hanamoa totona ibounai do idia tui diho,” to unai idia karaia “Tamana Dirava ena ladana do idia abia isi momokani” totona.​—⁠Fil. 2⁠:​5-11; rau 211-5 itaia danu.

Bema Ta Ia Gwau​—⁠

‘Lau laloa Dirava be lasi’

Reana inai bamona oi haere henia diba: ‘Guna danu unai bamona oi laloa a? . . . Unai lalohadai hamomokania herevadia oi tahua guna bena oi abia dae, a?’ Bena reana ma oi gwau: ‘Dirava ia noho eiava lasi henanadaina lau laloa bada dainai lau tahua namonamo. Lau be inai heduru herevadia haida lau davaria: . . . (Rau 100 ai, inai sinado maragina “Dirava ia mauri noho herevana ita abia dae be mai ena badina, a?” itaia, bona rau 125-7 danu, inai sinado “Gau Iboudiai Havaradia” henunai.)’

Eiava inai bamona oi hereva diba: ‘Emu hereva ena anina be dahaka​—⁠oi laloa gau iboudiai havaraia Diravana be lasi a, eiava tomadiho oreadia edia koikoi momo oi itaia dainai edia hahediba herevadia oi abia dae diba lasi, a?’ Bena reana ma oi gwau: ‘Kerisendom ena tomadiho oreadia be idau, Keristen tomadiho momokanina hegeregerena lasi. Momokani, Kerisendom ese taunimanima ia hahisidia vadaeni, tuari ia karaia vadaeni, bona taunimanima be kara maoromaoro dalana ai ia hakaudia lasi, to Keristen tomadihona be unai bamona ia karaia lasi. Dirava ena Hereva, Baibel unai, ese Kerisendom ena kara bona ena hahediba herevadia ia hamomokanidia lasi, to ia gwauraidia dika.’

Ma haere ta: ‘Ma taunimanima haida danu be unai bamona idia hereva lau dekenai. Idia haida idia gwau, bema Dirava ia noho, dahaka dainai hisihisi bona kara dika idia vara? Oi danu be unai bamona oi laloa, a? (Bema oibe, rau 101 dekenai inai sinado maragina “Kara dika bona hisihisi idia vara ese ia hamomokania Dirava be lasi, a?” henunai idia noho herevadia haida oi gwauraia.)’

‘Lau itaia gaudia sibodia lau abidadama henia, bona nega ta Dirava lau itaia lasi’

Reana inai bamona oi haere henia diba: ‘Hari inai negai taunimanima momo edia lalohadai be unai bamona. Unai lalohadai be mai ena badina. Hari inai negai taunimanima momo ese edia matana amo idia itaia diba gaudia idia laloa bada. To oi ese idia vara momokani gaudia oi laloa, ani?’ Bena reana ma oi gwau: (1) ‘Gau haida idia noho, iseda matana amo ita itaia diba lasi to ita diba idia noho badina gau haida ese edia noho idia hamomokania, ani? Mani hodahoda oi laloa: Ena be ita itaia diba lasi, to lai ia toa neganai iseda kopina dekenai ena mamina ita abia, bona ita hahodi vareai neganai mamina ita abia iseda baragi ia hahonua. Ena mamina ita abia dainai, ita gwau hodahoda ia noho, ani?’ (2) ‘Gau ta ena bonana ita itaia diba lasi, to iseda udu baubauna ese idia bonaia. Rege ita itaia diba lasi, to iseda taiana ese idia kamonaia. Anina be, ita abia dae ita itaia diba lasi gaudia haida idia noho, badina be unai ita hamomokania diba, ani?’ (3) ‘Vadaeni, gau haida ese idia hamomokania ita itaia diba lasi Diravana ia noho, eiava? (Rau 100-101 dekenai inai sinado maragina “Dirava ia mauri noho herevana ita abia dae be mai ena badina, a?” henunai idia noho herevadia oi gwauraidia.)’

‘Lau sibona mai egu lalohadai Dirava dekenai’

Reana inai bamona oi haere henia diba: ‘Lau moale badina oi ese Dirava oi laloa bona oi abidadama henia. Mani lau oi hamaoroa, Oiemu lalohadai Dirava dekenai be dahaka?’ Bena reana ma oi gwau: ‘Momokani oi diba gau badana be ita abia dae herevadia be Dirava ese ia gwauraia herevadia ida ita hahegeregeredia. Dirava ia gwauraia herevana ta Baibel lalonai lau hahedinaraia oi dekenai be hegeregere, a? (Sal. 83⁠:18)’