Tanobada Ena Aonega

Anina: Inai aonega idia tahua taudia idia abia dae lasi Dirava ia mauri noho, to idia ese guba bona tanobada edia anina ibounai lalohadailaia daladia hatamonadia dalana be taunimanima idia hadibalaidia toho, bona laloa namonamo taudia ai idia halaodia toho. Hereva momokani idia tahua noho lalonai, idia sibodia idia laloa davari gaudia idia laloa bada, edia matana amo idia itaia gaudia idia laloa maragi.

Ita ese diba momokani bona aonega momokani edena bamona ita davaria diba?

Her. 1:7; Sal. 111:10: “Iehova igari-henina na lalo-parara matamana . . . [bona] aonega imatamana.” (Bema guba bona tanobada bona edia anina ibounai be lalo-parara Diravana ese ia havaraia lasi to siahu kava ese ia havaraia, unai gau iboudiai dala tamona amo lalohadailaia dalana be lasi, ani? Idia vara kava gaudia tahua namonamo karana amo aonega korikori davaria dalana be lasi, ani? Guba bona tanobada eiava mauri ena anina idia lalo-pararalaia toho taudia, bema Dirava bona ena palani idia laloa nege, edia lalona dekenai idia hekwakwanai loulou. Idia dibaia gaudia edia anina idia laloa kerere, bona idia gogoa herevadia momokanidia idia gaukaralaia kerere. Dirava abidadama henia dalana idia reaia dainai, diba maoromaoro abia dalana idia reaia danu, bona lalohadai maorodia idia davaria diba lasi.)

Her. 2:​4-7: “Boma tahua, silver na heto; boma tahua goada, e hehunimu kohudia namodia na heheto; bena Iehova igari-henina ba diba, bona Dirava idibana ba davaria. Badina be Iehova ese aonega e henimu, ia uduna amo aonega bona lalo-parara na e maimu; ia ese aonega namona e habouamu, kara maromaoro taudia edia.” (Lalo-parara be inai dala ai idia tahua taudia be Iehova ese ena Buka Helaga bona ena orea amo ia durudia. Namona be idia ese dala maorona ai edia lalona idia gaukaralaia, mai edia ura bada bona mai edia goada ida.)

Hereva momokani be Dirava dekenai idia tahua taudia edia helaro be mai ena badina korikori, eiava?

2 Tim. 3:16; Ioane 17:17: “Buka Helaga ena hereva ibounai be Dirava ena Lauma ese ia havaraia.” “[Iesu ese ena Tamana guba dekenai ia noho ia hereva henia, ia gwau:] Oiemu hereva be hereva momokani.” (Guba bona tanobada ia havaraia Diravana ese edia anina ia lalo-pararalaia, ani? Baibel lalonai ia ese unai ibounai ita ia hadibalaia lasi, to iena ura hegeregerena Baibel lalonai idia torea herevadia be taunimanima edia lalohadai kavakavadia lasi; idia be hereva momokani. Ia ese danu iena palani tanobada totona bona taunimanima totona bona unai palani ena anina do ia havaraia dalana danu be Baibel lalonai ia gwauraia hedinarai. Iena siahu bada herea, iena aonega hereadaena, ena hahemaoro goevagoeva, bona ena lalokau bada herea dainai, ena palani ena anina be dala hereadaena amo do ia hagugurua. Unai dainai ita diba momokani ena palani herevana ita abia dae be maoro; unai hereva be hereva momokani.)

Taunimanima edia aonega herevadia be edena dala amo idia vara?

Gau haida idia diba lasi taudia ese idia halasidia: Baibel ia gwau: “Taunimanima ena raka na ia sibona ese basine gwauraia hidi.” (Ier. 10⁠:23) Idia vara vadaeni gaudia edia sivarai ese idia hahedinaraia unai hereva ena anina laloa lasi karana ese namo ia havaraia lasi. Nega ta, “Iehova ese Iobu e haere henia, koe-hirihiri lalona amo, eto: Ina na daika ese hereva asi anidia amo hahealo herevadia e hadiburadiamu? Emu rami ba hekasilaia, tau karakara na heto; baina nanadaimu, bena ba haere henigu. Lau ese tanobada badidia na atodia negana ai oi na edeseni ai? Bema mai dibamu, vada ba hamaorogu.” (Iobu 38⁠:​1-4) (Taunimanima idia hegeregere lasi gau iboudiai do idia diba. Danu, idia mauri daudau lasi, bona idia momo be bese tamona sibona ena kara idia manadalaia bona tano tamona dekenai idia noho. Unai dainai edia diba be mai ena hetoana, bona nega ibounai gau matamatadia idia davaria, ena be unai gau be mai edia anina edia mauri lalonai, to idia do lalohadailaidia goevagoeva lasi. Edia diba be unai bamona ia hegeregere momokani lasi dainai, edia aonega herevadia danu be idia hegeregere momokani lasi.)

Goevadae lasi taudia ese edia anina idia habadaia: “Ita ibounai ita kara dika vadaeni, bona Dirava ena hairaina ita abia be hegeregere lasi.” (Roma 3⁠:23) “Tau ta vairanai dala ita-itana na maoro, a dokona na mase e lao heniamu dalana.” (Her. 14⁠:12) (Taunimanima be unai bamona idia goevadae lasi dainai, edia aonega herevadia momo ese idia hahedinaraia idia be sibodia edia namo idia tahua. Idia be unai bamona idia karaia dainai, nega sisina moale idia davaria reana, to gabeai lalohisihisi momo idia davaria danu.)

Lauma dikadia edia lalo-ani be idia lalodiai ia hedinarai: “Satani ese tanobada taudia ibounai ia gunalaia noho.” (1 Ioane 5⁠:19) “Iena ladana be Diabolo bona Satani. Ia be tanobada taudia ibounai ia koia noho gauna.” (Apok. 12⁠:⁠9) “Unai neganai inai tanobada ena kara dika dalana umui raka. Umui ese lauma dikadia edia biaguna umui kamonai henia. Inai lauma ese Dirava idia kamonai henia lasi taudia edia lalona dekenai harihari ia gaukara noho.” (Ef. 2⁠:⁠2) (Inai lauma ena siahu be taunimanima edia aonega herevadia lalodiai ia hedinarai; unai hereva amo taunimanima edia lalona idia ania, Dirava ena taravatu maorodia do idia utua. Bese idauidau edia sivarai ese idia hahedinaraia hegeregerena, nega momo taunimanima edia aonega herevadia bona edia palani ese lalohisihisi idia havaraia taunimanima momo dekenai.)

Dahaka dainai Iesu Keriso ena hahediba herevadia stadilaia karana ese taunimanima edia aonega herevadia stadilaia karana ia hereaia?

Kol. 1:​15-17: “Dirava be ita itaia diba lasi. To Dirava ena Natuna [Iesu Keriso] be Dirava ena toana hegeregerena. Ia be vara guna Natuna, ia be Dirava ese ia karaia gaudia ibounai edia biaguna momokani. Badina be ia dekena amo Dirava ese gau ibounai ia karaia, guba dekenai bona tanobada dekenai. . . . Dirava ese Keriso dekena amo gau ibounai ia karaia, do idia be Keriso ena totona. Gau ibounai idia do noho lasi neganai Keriso be ia noho. Iena siahu dekena amo gau ibounai edia gabu edia gabu dekenai idia noho, ia ese idia ia naria noho.” (Iesu be Dirava badibadinai ia noho dainai, ia hegeregere ita ia durua Dirava ita diba maoromaoro totona. Danu, Dirava ese ia ena amo gau iboudiai ia havaraia dainai, Iesu be guba bona tanobada edia anina ibounai ia diba. Tanobada ena aonega taudia ta be unai bamona lasi.)

Kol. 1:​19, 20: “Dirava ena ura be inai: sibona ena mauri ibounai be iena Natuna [Iesu Keriso] lalonai do ia noho. Unai dainai, iena Natuna dekena amo Dirava ese maino karaia dalana ta ia laloa. Inai maino be ia bona tanobada taudia bona guba taudia edia huanai. Keriso ena rarana satauro dekenai ia bubua dekena amo Dirava ese ibounai danu maino ia karaia, bona ia dekenai idia mai dalana ia ese ia kehoa vadaeni.” (Unai hegeregerena, Dirava ena lalohadai be, Iesu Keriso ena amo ia ese gau iboudiai do ia kara henidia, ia be idia ida do idia maino karaia totona. Danu, Daniel 7⁠:​13, 14 ena hereva hegeregerena, Dirava ese Iesu siahu ia henia tanobada ibounai do ia lohiaia totona. Unai dainai, nega vairai do ita mauri totona, namona be Iesu ita diba bona ena hereva ita badinaia.)

Kol. 2:8: “Umui naria namonamo, tau ta ese taunimanima edia aonega hereva kava dekena amo umui ia koia garina. Inai bamona hereva be sene taudia edia kara, bona tanobada idia gunalaia lauma dikadia dekena amo idia mai, Keriso dekena amo lasi.” (Iesu Keriso ena dagi be bada herea; Dirava mo sibona ese ia hereaia; unai dainai, bema tau ta ese taunimanima edia aonega herevadia koikoidia ia abia hidi bona ia ura lasi Iesu Keriso ena hahediba tauna ai do ia lao aonega korikori abia totona, madi ia kerere bada unai!)

Taunimanima edia “aonega,” idia sibodia idia laloa davari gaudia, be Dirava ese edena bamona ia laloa?

1 Kor. 1:​19-25: “Buka Helaga lalonai ia torea vadaeni, ia gwau, ‘Lau be aonega taudia edia aonega do lau haorea, bona diba bada taudia edia diba do lau negea.’ Unai dainai, aonega taudia be edeseni? Diba bada taudia edeseni idia noho? Inai tanobada ena dala idia herevalaia diba momo taudia be edeseni? Dirava ese ia hedinaraia inai tanobada ena aonega be kavakava gauna! Oibe, Dirava ena aonega be bada herea, inai bamona: Tanobada taudia be sibona edia aonega dekena amo Dirava idia davaria diba lasi. To ai ese ai harorolaia hereva kavakava [tanobada taudia ese unai bamona idia gwauraia] dekena amo, abidadama henia taudia ibounai be Dirava ese do ia hamauria. . . . Oibe, Dirava ena kavakava [tanobada taudia ese unai bamona idia laloa] ese taunimanima edia aonega ia hanaia noho, bona Dirava ena manoka ese taunimanima edia goada ia hanaia noho.” (Dirava ese inai tanobada ena aonega unai bamona ia laloa be maoro. Iena palani be Baibel lalonai ia gwauraia hedinarai goevagoeva, bona Baibel momo herea be tanobada ibounai lalonai idia hariharilaia vadaeni. Ia ese ena witness taudia ia siaidia, Baibel ena hereva idia kamonai taudia iboudiai hadibalaidia totona. Bema tau ta ia laloa iena aonega ese Dirava ena aonega ia hanaia, unai tau ia kavakava momokani!)