Gado Idaudia ai Hereva Karana

Anina: Aposetolo edia negai Dirava ese lauma helaga amo Keristen ekalesia taudia haida ia hasiahudia, gado idaudia ai do idia haroro bona Dirava do idia hanamoa totona.

Baibel ia gwau Dirava ena lauma helaga idia abia taudia iboudiai be ‘idau momokani gadodia ai do idia hereva’ diba, a?

1 Kor. 14⁠:⁠26: “Umui ta ta be mai emui gaukara. Ta be ane do ia abia, ta be hadibaia hereva do ia henia. . . . Ma ta be idau momokani gadodia do ia gwauraia.” (Korinto Ginigunana 12⁠:​13, 30 itaia danu.)

1 Kor. 14:5: “Lau ura be umui ibounai ese idau momokani gadodia umui hereva diba, to lau ura bada umui ese Dirava ena hereva umui gwauraia, badina be idau momokani gadodia ia hereva tauna, bema iena hereva anina ia gwauraia lasi, ekalesia taudia edena bamona ia durua diba? Lasi, ani?”

Ta ia tahua lasi gadona idauna ta ai bema ia hereva mai ena siahu ida, unai ese ia hamomokania lauma helaga ia abia, a?

‘Idau momokani gadodia ai hereva’ siahuna be Dirava korikori mo sibona amo ia mai, eiava ma ta amo ia mai diba danu, a?

1 Ioane 4⁠:1: “Bema taunimanima idia gwau, ‘Lau be Lauma Helaga lau abia vadaeni,’ do umui naria namonamo. Idia ibounai do umui hamomokania lasi. To do umui dibaia guna, do umui davaria, Dirava ena Lauma idia abia momokani, o lasi.” (Mataio 7⁠:​21-23; 2 Korinto 11⁠:​14, 15 itaia danu.)

Hari inai negai ‘idau momokani gadodia ai idia hereva’ taudia haida be inai tomadiho oreadia lalodiai: Pentekostel, Baptis, Roman Katolik, Anglikan, Metodis, Luteran, bona Presbitirian. Iesu ia gwau lauma helaga ese ‘hereva momokani ibounai dekenai ena hahediba taudia do ia hakaua.’ (Ioane 16⁠:13) Unai tomadiho oreadia idauidau ta ta edia memba taudia idia laloa lauma helaga ese tomadiho oreadia oredia lalodiai ‘idau momokani gadodia ai idia hereva’ taudia danu be ‘hereva momokani ibounai dekenai’ ia hakaudia, a? Idia lalo-tamona lasi dainai unai bamona idia laloa diba lasi, ani? Vadaeni, dahaka lauma ese ia hasiahudia dainai ‘idau momokani gadodia ai idia hereva’?

Fountain Trust oreana bona Church of England Evangelical Council ruaosi ese hereva ta idia halasia hebou, idia gwau: “Ai diba unai bamona hoa karana be lauma dikadia, demoni, edia siahu dainai ia vara diba.” (Gospel and Spirit, April 1977, published by the Fountain Trust and the Church of England Evangelical Council, p. 12) Buka ta ladana Religious Movements in Contemporary America (edited by Irving I. Zaretsky and Mark P. Leone, quoting L. P. Gerlach) ia gwau, Haiti dekenai Pentekostel bona Voodoo tomadiho oreadia taudia danu be ‘idau momokani gadodia ai idia hereva.’​—⁠(Princeton, N.J.; 1974), p. 693; 2 Tesalonika 2:​9, 10 itaia danu.

Hari inai negai ‘idau momokani gadodia ai hereva’ karana be aposetolo edia negai idia noho Keristen taudia edia kara hegeregerena, a?

Aposetolo edia negai, ‘idau momokani gadodia ai hereva’ karana bona lauma helaga ena harihari gaudia oredia danu, ese idia hamomokania Dirava ese ena hahenamo Iuda tomadiho oreana amo ia kokia vadaeni bona Keristen kongregesen matamatana ia henia vadaeni. (Heb. 2⁠:​2-4) Iena ura unai gau dekenai be aposetolo edia negai ia hagugurua dainai, iseda nega lalonai ia hamomokania loulou be mai anina lasi, ani?

Aposetolo edia negai, ‘idau momokani gadodia ai hereva’ karana ese bese iboudiai haroro henidia gaukarana ia durua bada; Iesu ese ia murinai idia raka taudia ia haganidia unai gaukara do idia karaia. (Kara 1:8; 2:​1-11; Mat. 28:19) Hari inai negai taunimanima ese ‘idau momokani gadodia ai hereva’ siahuna be unai dala ai idia gaukaralaia, a?

Aposetolo edia negai, Keristen taudia be ‘idau momokani gadodia ai idia hereva’ negadiai, edia hereva be mai anina unai gado idia diba taudia dekenai. (Kara 2⁠:​4, 8) To hari inai negai, ‘idau momokani gadodia ai idia hereva’ taudia momo be mai siahu ida idia hereva negadiai, ta ese edia hereva ena anina ia lalo-pararalaia diba lasi, ani?

Baibel ese ia hahedinaraia, aposetolo edia negai taunimanima rua o toi mo sibodia be ‘idau momokani gadodia ai idia hereva’ diba kongregesen ena hebou ta lalonai; ‘edia nega, edia nega dekenai idia hereva,’ bona bema gado hahegeregerea tauna be lasi, idia hereva be taravatu. (1 Kor. 14⁠:​27, 28) Hari inai negai unai bamona idia karaia, a?

Rau 258-9 itaia danu, inai sinado “Lauma” henunai.

Lauma helaga ese mai edia siahu idauna taudia ia hakaudia Baibel ese ia gwauraia lasi karadia do idia karaia totona, a?

2 Tim. 3:​16, 17: “Buka Helaga ena hereva ibounai be Dirava ena Lauma ese ia havaraia. Bona inai hereva be mai ena siahu, hereva momokani ita dekenai do ia hadibaia. Ia be mai ena siahu danu iseda kara dika do ia hedinaraia, iseda kerere do ia hamaoromaoroa, bona mauri dala maoromaoro ita dekenai do ia hadibaia. Unai hereva momokani dainai Dirava ena tau ena goada be hegeregere momokani, vadaeni kara namodia ibounai do ia karaia diba mai kwalimu danu.” (Bema ta ia gwau Dirava ese hereva ta ia hadibaia, to bema unai hereva be idau, Iesu bona ena aposetolo be Dirava ena lauma amo idia gwauraia herevadia hegeregeredia lasi, unai hereva idauidau be lauma tamona ese ia havaradia, a?)

Gal. 1:8: “Bema ai ese, o guba ena aneru ta ese sivarai idauna, guna ai haroro gauna bamona lasi, ai harorolaia neganai, Dirava ese ai bona idia do ia hadikaia ore be namo.”

Tomadiho oreadia, ‘idau momokani gadodia ai hereva’ karana idia abia dae oreadia, edia taunimanima edia mauri daladia ese idia hahedinaraia Dirava ena lauma be idia dekenai ia noho, a?

Lauma ena huahua, manau bona tauanina biagua karana, idia hahedinaraia badabada a? Edia tomadiho heboudia dekediai unai kara idia hahedinaraia, a?​—⁠Gal. 5⁠:​22, 23.

Idia be “tanobada ena lasi” momokani, a? Unai dainai Dirava ena Basileia idia badinaia momokani a, eiava tanobada ena politikol karadia lalodiai idia vareai, a? Tuari negadiai rara amo idia goeva, a? Edia orea be mai ladana namona badina tanobada ena kara mirodia amo idia siri, a?​—⁠Ioane 17⁠:16; Isa. 2⁠:4; 1 Tes. 4⁠:​3-8.

Hari inai negai, Keristen korikori taudia edia toana be ‘idau momokani gadodia ai hereva’ karana, a?

Ioane 13:35: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.”

1 Kor. 13:​1, 8: “Bema taunimanima edia gado idauidau lau hereva diba, aneru edia gado danu, to lauegu lalokau be lasi neganai, lauegu hereva be auri idia botaia, o gaba idia toua kava bamona. Lalokau be do ia doko lasi. Peroveta hereva be do idia ore. Idau momokani gadodia danu do idia doko.”

Iesu ia gwau lauma helaga ese iena orea taudia do ia hasiahudia bena ia do idia gwauraia hedinarai ela bona tanobada hegegemadai. (Kara 1⁠:⁠8) Ia haganidia ‘bese ibounai be diba tahua taudia ai do idia halaoa.’ (Mat. 28⁠:19) Ma ia peroveta, ia gwau: “Basileia ena Sivarai Namona be tanobada ibounai dekenai do idia harorolaia.” (Mat. 24⁠:14) Hari inai negai, edena orea taudia ta ta iboudiai ese unai gaukara idia karaia? Iesu ia hereva hegeregerena, unai gaukara idia karaia taudia ese idia hahedinaraia lauma helaga idia abia, ani?

‘Idau momokani gadodia ai hereva’ karana do idia karaia ela bona ‘goevadae momokani’ gauna do ia mai, a?

Korinto Ginigunana 13⁠:8 ese lauma helaga ena harihari gaudia​—⁠peroveta herevadia, gado idaudia, bona aonega​—⁠ia herevalaidia. 1Kor 13 Siri 9 ese unai harihari gaudia rua, aonega bona peroveta herevadia, ia herevalaidia, ia gwau: “Unai peroveta bona aonega dalana be kahana sibona ita diba.” Bena 1Kor 13 siri 10 ia gwau: “To gabeai diba goeva[dae] momokani ia mai neganai, unai kahana sibona ita diba gaudia be do idia ore.” Inai hereva ‘goevadae’ be Greek gado herevana teʹlei·on amo idia hahanaia. Unai Greek gado herevana ena anina be lo, o ibounai, o goevadae. Mani oi itaia, 1Kor 13 siri 9 ia gwau lasi lauma helaga ena harihari gauna, gado idaudia, be goevadae lasi o “kahana sibona.” “Peroveta” bona “aonega” be unai bamona ia gwauraia. Anina be, ena be Keristen taudia ginigunadia ese unai harihari gaudia idia abidia, to edia diba Dirava ena palani dekenai be kahana sibona, ena palani ibounai idia diba lasi. To peroveta herevadia edia anina do idia vara neganai, Dirava ena palani do ia guguru neganai, ‘goevadae’ gauna do ia mai. Unai dainai, unai siri ese ‘gado idaudia momokani ai hereva’ karana negana ena daudau ia herevalaia lasi.

To Baibel ese ia hahedinaraia edena daudau Keristen taudia be ‘gado idaudia momokani ai hereva’ siahuna do idia gaukaralaia. Baibel ena sivarai hegeregerena, unai harihari gauna bona lauma ena harihari gaudia ma haida be taunimanima ese Iesu Keriso ena aposetolo edia amo idia abia, idia dekediai idia noho neganai, eiava aposetolo ese edia imadia idia latadiai idia atoa kau neganai. (Kara 2:​4, 14, 17; 10:​44-46; 19:6; bona Kara 8:​14-18 itaia danu.) Unai dainai, aposetolo idia mase murinai bona unai harihari gaudia idia abia taudia idia mase neganai, Dirava ena lauma amo idia abia harihari gaudia idia ore. Unai be Dirava ese unai harihari gaudia ia henidia ena badina bamona, Heberu 2⁠:​2-4 ese ia gwauraia hegeregerena.

Mareko 16⁠:​17, 18 ese ia hahedinaraia ‘gado matamata idauidau ai hereva’ karana be abidadama taudia edia toana ta, ani?

Unai siri ese ‘gado matamata idauidau ai hereva’ karana sibona idia herevalaia lasi, to gaigai dikadia abia isi bona mase muramurana inua karadia idia herevalaia danu. ‘Idau momokani gadodia ai idia hereva’ taudia iboudiai idia gwau taunimanima ese unai kara danu idia karaia be namo, a?

Baibel idia tahua namonamo taudia haida ese unai siri idia abia dae lasi Baibel ena hereva korikori hegeregeredia; edia kara ena badina do oi diba totona, rau 143-4 itaia, inai sinado “Gorere Hanamoa Karadia” henunai.

Bema Ta Ia Gwau​—⁠

‘Oi laloa abidadama taudia be lauma helaga idia abia dainai gado idaudia ai idia hereva diba, a?’

Reana inai bamona oi haere henia diba: ‘Ai Iehova ena Witness taudia be gado idauidau momo ai ai hereva, to “taunimanima idia diba lasi gadodia” ai ai hereva lasi. Mani lau oi hamaoroa, oi laloa hari inai negai “idau momokani gadodia ai hereva” karana be aposetolo edia negai idia karaia karana hegeregerena, eiava?’ Bena reana ma oi gwau: ‘Inai buka lalonai hereva namodia haida lau davaridia, idia ese ita idia durua unai ita dibaia totona. (Bema oi ura, rau 121-2 dekenai idia noho herevadia oi gwauraidia.)’

Eiava inai bamona oi hereva diba: ‘Ai laloa aposetolo edia negai idia noho Keristen taudia be “idau momokani gadodia ai idia hereva” bona unai negai unai kara ese anina namona ia havaraia. Oi diba dahaka anina ia havaraia, a?’ Bena reana ma oi gwau: (1) ‘Unai kara be toa ta, ia amo Dirava ese ia hahedinaraia iena hahenamo be Iuda tomadiho oreana amo ia kokia bona Keristen kongregesen matamatana ia henia hanai. (Heb. 2⁠:​2-4)’ (2) ‘Unai kara amo nega kwadogina lalonai sivarai namona be tanobada hegegemadai idia harorolaia. (Kara 1⁠:⁠8)’