Karoa 4

Dahaka Dainai Tamagu bona Sinagu Idia Parara?

“Lauegu tamana ese ai ia rakatania negana lau laloatao. Unai neganai ai diba namonamo lasi dahaka ia vara. Sinagu ese moni gaukara ia karaia matamaia, bena nega ibounai ai sibona ai noho. . . . Ai laloa momo badina ai diba lasi ia danu ese ai ia rakatania vadaeni eiava. . . . ”​—⁠Kekeni ta ena hereva unai, ena tamana sinana ese edia headava idia hadokoa.

TA ENA tamana sinana ese edia headava idia hadokoa neganai, reana ena lalona ia hisihisi bada. Unai bamona taudia momo idia hemarai, idia badu, idia lalo-hekwarahi, idia sibodia do idia noho garina idia gari, idia laloa idia kerere, idia lalo-metau, bona idia laloa edia tamana o sinana idia haboioa vaitani​—⁠bona reana idia ura edia tamana bona sinana edia kerere ena davana do idia henidia danu.

Bema emu tamana sinana be vanegai sibona idia parara, reana oi danu be unai oi mamia noho. Dirava ia ura oiemu tamana sinana ese oi idia naria. (Efeso 6⁠:​1-3) To, emu tamana o sinana, oi lalokau henia tauna, ese oi ia rakatania vadaeni. Mero ta ladana Paul ena mauri laganidia be 7 neganai, ena tamana sinana idia parara. Mai ena lalohisihisi ida ia gwau: “Lauegu tamana lau laloa bada bona lau ura ia ida lau noho, to kota ena hereva dainai Sinagu ese ai ia abia.”

Tama Sina Idia Parara ena Badina

Tama sina momo ese edia hekwakwanai idia hunidia namonamo. Kekeni ta ladana Lynn ia maragi neganai, ena tamana sinana ese edia headava idia hadokoa; ia gwau: “Lauegu tamana sinana idia heai be lau diba lasi. Lau laloa idia noho namonamo.” Ena be tama sina haida idia heai, to idia parara neganai reana edia natudia idia hoa!

Tama sina momo idia parara badina headava lalonai ta ia heudahanai dainai. Dirava ia gwau, bema ta ena adavana ia heudahanai ia hadihoa diba. (Mataio 19⁠:9) Idia parara ena badina ma ta be inai: ‘Heai, dagedage, bona badu’ dainai heatu ia vara, bena ta ia gari bona ia laloa, bema ena adavana ida do idia noho, ia bona ena natudia ese dika do idia davaria diba.​—⁠Efeso 4⁠:31.

Momokani, tau bona hahine haida ese edia headava idia hadokoa kava. Edia hekwakwanai idia hamaoromaoroa toho lasi, to sibodia edia namo idia tahua dainai, idia gwau ‘idia moale lasi’ eiava ‘edia adavadia idia lalokau henidia lasi.’ Unai bamona kara ese Dirava ia habadua, badina be ia ese ‘adavana negea karana ia inai henia.’ (Malaki 2⁠:16) Iesu ia hahedinaraia, haida ese edia headava do idia hadokoa badina edia adavadia be Keristen taudia ai idia lao dainai.​—⁠Mataio 10⁠:​34-36.

Ena be reana oiemu tamana sinana idia ura lasi edia headava hadokoa karana idia gwauraia hedinarai, eiava oi nanadailaidia neganai idia herevalaia momo lasi, to unai ese ia hahedinaraia lasi oi idia lalokau henia lasi. Idia lalohisihisi dainai, reana idia ura lasi do idia herevalaia. (Hereva Lada-isidia 24⁠:10) Danu, reana edia kerere gwauraia hedinarai be idia hemarailaia.

Inai Oi Karaia Diba

Emu lalo-hekwarahi be emu tamana sinana ida do umui herevalaia negana maorona oi tahua. (Hereva Lada-isidia 25⁠:11) Oi hamaorodia oi lalohisihisi bona oi daradara edia headava idia hadokoa dainai. Reana edia haere amo emu lalona do idia hanamoa. To bema lasi, oi lalo-metau lasi. Iesu ese hereva haida na iena hahediba taudia ia hamaorolaidia lasi, badina ia laloa idia hegeregere lasi do idia abia dae, ani? (Ioane 16⁠:12) Oiemu tamana sinana be mai edia maoro edia hereva haida do idia hunidia, ani?

Danu, inai mani oi laloa: Herevana dahaka dainai edia headava idia hadokoa, to unai be idia ruaosi huanai; oi dainai idia hadokoa lasi! Ripoti ta ese ia hahedinaraia edia headava idia hadokoa taudia momo idia gwau edia headava idia hadikaia taudia be inai: edia adavadia, edia gaukara biagudia, edia varavara, bona edia turadia. Idia ta lasi ese ena natudia ia samanidia. Ena be oiemu tamana sinana ese edia headava idia hadokoa, to edia lalohadai oi dekenai idia haidaua lasi.

Gabeai Emu Lalona Do Ia Namo Lou

Baibel ia gwau, “Hanamoa be mai ena nega.” (Kohelete 3⁠:3) Bema oiemu tauanina ia bero o oiemu turia ta ia kwaidu, do ia namo lou lasi ela bona pura haida o hua haida do idia ore. Unai hegeregerena, oiemu lalohisihisi do ia ore haraga lasi.

Inai kerere idia tahua taudia rua ese idia davaria, edia headava idia hadokoa taudia edia gari bona edia lalohisihisi be lagani rua bamona murinai sisina sisina idia ore eiava idia ore vaitani. Ma diba momo taudia haida idia gwau, edia headava idia hadokoa taudia be lagani toi murinai unai kara ena dika idia laloa momo lasi. Reana oi laloa lagani toi be nega daudau, to gau momo do idia vara guna bena gabeai oiemu mauri do ia namo lou diba.

Gau ta be inai: ruma bese ena mauri dalana hanamoa lou karana. Oiemu tamana sinana edia lalona do idia namo lou haraga lasi, to gabeai, do idia namo lou neganai, reana oi do idia durua diba. Oiemu mauri dalana do ia namo lou neganai, oiemu lalona do ia namo lou.

To, Solomon ena sisiba be inai: “Oi gwau lasi: ‘Dahaka dainai nega gunadia ese inai nega idia hereaia?’ Badina be aonega amo unai oi nanadailaia lasi.” (Kohelete 7⁠:10) Bema nega gunana sibona oi laloa loulou, reana hari inai nega do oi laloa namonamo lasi. Oiemu tamana sinana ese edia headava idia do hadokoa lasi neganai, emui mauri dalana be edena bamona? Annette ia gwau: “Heai be momo herea​—⁠idia boiboi bona hereva dikadia idia gwauraia heheni.” Hari, oiemu ruma bese be maino ai ia noho, a?

‘Lau Haboudia Lou Diba’

Memero kekeni haida idia laloa edia tamadia bona sinadia do idia haboudia lou diba. Ena be adavadia matamatadia idia abidia vadaeni, to reana unai lalohadai idia do dogoatao.

To, ena be oi abia dae lasi emu tamana sinana ese edia headava idia hadokoa vadaeni, to unai ese do ia haboudia lou lasi. Ena be oi tai, o oi noidia, o dala idauidau oi tahua do oi haboudia lou totona, to reana do oi kwalimu lasi. Unai dainai, unai dala oi lalohadailaia loulou lasi be namo, badina unai amo emu lalona oi hahisia, ani? (Hereva Lada-isidia 13⁠:12) Solomon ia gwau: “Haboioa be mai ena nega.” (Kohelete 3⁠:6) Vadaeni, namona be oi abia dae emu tamana sinana ese edia headava idia hadokoa vadaeni bona do idia noho hebou lou lasi. Bema unai oi abia dae, gabeai emu lalohisihisi do ia doko.

Oi Badu Henidia Hanaihanai Lasi

Reana oiemu tamana sinana oi badu henidia be maoro, badina emu mauri idia hadikaia dainai. Tauhau ta be mai ena badu ida ia gwau: “Lauegu tamana sinana ese sibodia edia namo idia laloa. Idia ese ai idia laloa lasi bona idia laloa lasi edia kara ese ai edena bamona do ia hadikaia. Idia ta ta be sibodia edia palani idia karaia.” Reana emu tamana sinana danu be unai bamona idia kara kerere, to bema oi badu henidia hanaihanai, sibomu emu lalona do oi hadikaia, ani?

Baibel ena sisiba be inai: “Heai, dagedage, badu do umui koua. . . . Umui ibounai ta ta do umui durua, bona ibounai ta ta do umui bogahisihisi henia. Bona ibounai ta ta [emui] kara dika do umui gwauatao.” (Efeso 4⁠:​31, 32) Emu lalona ia hahisia dikadika tauna ena kara be edena bamona oi gwauatao diba? Namona be oi laloa oiemu tamana sinana be idia goevadae lasi. Oibe, tama sina danu ‘idia kara dika bona Dirava ena hairaina idia abia be hegeregere lasi.’ (Roma 3⁠:23) Bema unai oi lalo-pararalaia, oiemu tamana sinana do oi badu henidia hanaihanai lasi.

Oiemu Lalona ena Mamina Oi Gwauraia Hedinarai

Ai henanadai henia tauhauna ta ia gwau: “Lauegu lalona ena mamina, lauegu tamana sinana ese edia headava idia hadokoa dainai lau abia mamina, be nega ta lau herevalaia lasi.” Matamanai, ena lalona ena anina ia gwauraia hedinarai lasi, to gabeai, metairametaira ia gwauraia hedinarai​—⁠ena tamana sinana edia headava hadokoa karana ia herevalaia neganai ia tai. Nega daudau lalonai ena lalona ena mamina ia hunia vadaeni, to ia gwauraia hedinarai murinai, ia gwau: “Lau herevalaia neganai unai ese lau ia durua bada.”

Bema oiemu lalona ena anina be taunimanima dekediai oi gwauraia hedinarai, reana heduru do oi abia. Oiemu lalona ena anina, oi garilaia gaudia bona oiemu lalo-hekwarahi, be oiemu tamana sinana dekediai oi gwauraidia hedinarai. (Hereva Lada-isidia 23⁠:26 itaia.) Lauma dalana ai idia goada Keristen taudia danu ese oi idia durua diba. Mero ta ladana Keith ena tamana sinana ese edia headava idia hadokoa neganai, ena ruma bese taudia ese idia durua lasi, to idau gabuna amo heduru ia abia. Keith ia gwau: “Keristen kongregesen taudia ese lau idia durua bada, ruma bese namona ena kara bamona.”

Gau badana be inai, emu Tamana guba dekenai oi noia diba, “guriguri kamonaia Diravana” unai. (Salamo 65⁠:2) Mero ta ladana Paul ia gwau, ena tamana sinana edia headava hadokoa karana ia abia dae totona ia durua bada gauna be inai: “Lau guriguri hanaihanai bona nega ibounai lau laloa Iehova be momokani ia noho.”

Emu Mauri ena Anina Oi Tahua Noho

Emu tamana sinana ese edia headava idia hadokoa murinai, reana emu mauri dalana do ia idau, to do oi moale diba. Baibel ia gwau: “Gaukara lalonai do umui lahedo lasi.” (Roma 12⁠:11) Oi lalohisihisi o oi badu dainai oi noho kava lasi, to oi gaukara. Sikuli ena gaukara oi goadalaia. Oi ura henia karana ma ta oi karaia. ‘Lohiabada ena gaukara oi karaia goadagoada.’​—⁠1 Korinto 15⁠:58.

Bema oi gaukara goadagoada bona bema emu lalona ia goada, nega taina daudau murinai, oiemu tamana sinana edia headava hadokoa karana do oi laloa momo lasi.

Inai Henanadai Herevalaia

◻ Tama bona sina idia parara ena badina haida be dahaka?

◻ Dahaka dainai oiemu tamana sinana ese idia herevalaia be auka reana? Bema idia ura lasi herevalaia, dahaka oi karaia diba?

◻ Dahaka dainai nega gunana laloa loulou bona emu tamana sinana haboudia lou dalana tahua be anina lasi?

◻ Emu tamana sinana ese edia headava idia hadokoa murinai, dahaka oi karaia diba emu lalohisihisi hanaia totona?

◻ Bema oiemu tamana bona sinana oi badu henidia, dahaka oi karaia diba unai badu haorea totona?

[Box on page 36, 37]

‘Egu Mauri Do Ia Hadikaia, A?’

Edia tamadia sinadia ese edia headava idia hadokoa murinai, memero kekeni haida ese sibodia edia mauri idia hadikaia. Haida be sikuli amo idia doko kava. Ma haida idia gwau-edeede edia badu hahedinaraia totona​—⁠edia tamadia sinadia edia kerere ena davana idia henidia gwauraia unai. Denny ia gwau: “Egu tamana sinana ese edia headava idia hadokoa murinai lau moale lasi bona lau lalohisihisi. Sikuli ai hekwakwanai lau davaridia bona lagani ta ai eksam dekenai lau kwalimu lasi. Unai murinai . . . lauegu kalasi taudia ese lau idia kirikirilaia bona nega momo lau be idia ida lau heatu.”

Ta ia kara dika rohoroho neganai, ena tamana sinana ese ia idia laloa momo reana. To unai kara ese namo ia havaraia lasi, unai hekwakwanai do ia habadaia sibona, ani? Momokani, ta ia kara dika neganai, ia be sibona ia panisia. (Galatia 6⁠:7) Inai mani oi laloa: Emu tamana bona sinana danu idia lalohisihisi, bona ena be oi laloa oi idia laloa lasi, to unai be oi idia badu henia dainai lasi. Denny ena sinana ia gwau: “Momokani, lauegu natudia lau naridia namonamo lasi. Egu headava ia doko murinai, lauegu lalona ia dika momokani dainai lau durudia diba lasi.”

Baibel ena sisiba Heberu 12⁠:13 ai be inai: “Emui aena edia raka dala do umui hamaoromaoroa. Unai dekena amo aena dika taudia edia bero do idia habadaia lasi, to do idia namo lou momokani.” Ena be ta ena tamana sinana ese sisiba idia henia lasi, to bema unai dainai ia kara dika, ia gwau diba lasi unai be edia kerere. (Iakobo 4⁠:17) Namona be emu kara oi naria namonamo bona sibomu emu tauanina oi biagua.​—⁠1 Korinto 9⁠:27.

Emu lalona oi hadaia haraga lasi ruma do oi rakatania. “Lalo-parara tauna ese ia rakalaia dalana be ia raraia tao.” (Hereva Lada-isidia 14⁠:15) Bema oiemu tamana sinana edia hekwakwanai dainai idia hegeregere lasi oiemu hereva do idia kamonai, oiemu turana ta, ena mauri laganidia be momo tauna, ida umui herevalaia be namo, ani?

Oiemu vaira dinadia oi do laloa momo reana. Oiemu tamana sinana edia headava ia dika dainai, reana oi laloa gabeai do oi headava neganai oiemu headava danu do ia dika. Bema oi bona emu adavana ese Dirava ena Hereva do umui badinaia, emui headava do ia namo, to bema do umui badinaia lasi, do ia dika.

Reana oi lalo-hekwarahilaidia gaudia be inai: aniani, dabua, mahuta gabuna, bona moni. Tama sina momo idia parara neganai, edia natudia do idia naridia noho dalana idia karaia. Hahine haida ese moni gaukarana idia karaia. To, buka ta ladana Surviving the Breakup ia gwau: “Guna, tau ese ena moni amo ruma bese tamona ia naria, to hari, ruma bese rua ia naridia, unai dainai ruma bese taudia edia mauri dalana do ia dika ia lao.”

Unai dainai, reana inai oi haheaukalaia be namo: Guna oi ura henidia gaudia haida, hegeregere dabua matamatadia, be hari oi abidia diba lasi. To Baibel ia gwau: “Gau ta tanobada dekenai ita abia mai lasi, bona gau ta danu do ita abia lao lasi. Unai dainai bema ita be mai iseda aniani bona dabua neganai, moni dekenai ita laloa momo lasi be namo.” (1 Timoteo 6⁠:​7, 8) Reana oiemu ruma bese oi durua diba, emui moni naria namonamo dalana do umui davaria totona. Inai mani oi laloa: “Dirava be tamana lasi memerodia edia tamana.” (Salamo 68⁠:5) Namona be oi diba momokani, ia ese oi dabulaia gaudia ia laloa.

Ieremia ia gwau: “Tau ta ese ena eregabe neganai maduna ia huaia, unai danu namo.” (Rohe-ahu Bukana 3⁠:27) Momokani, ta ese ena tamana sinana ia itaia edia headava idia hadokoa be “namo” lasi. To unai dika amo namo do oi davaria dalana ia noho.

Inai kara ia tahua hahinena ta ia gwau: “Hoa gauna be inai, [edia headava idia hadokoa taudia edia natudia] edia lalona idia goada idia lao bona edia diba ia bada ia lao, edia ruma bese idia parara murinai. . . . Edia tamadia sinadia edia kara idia laloa namonamo, bena edia lalona idia hadaia dahaka do idia karaia edia vaira negana lalonai. Dala idia tahua, edia tamadia sinadia edia kerere do idia tohotohoa lasi totona.”

Momokani, emu tamana sinana ese edia headava idia hadokoa dainai emu mauri idia hadikaia. To, oi sibomu emu kara hegeregerena, unai dika be do oi habadaia o do oi hamaragia.

[Picture on page 35]

Oiemu tamana sinana ese edia headava idia hadokoa gwauraia neganai, unai ese emu lalona ia hahisia bada diba

[Picture on page 38]

Bema emu mauri gunana oi laloa momo, unai ese emu lalona do ia hametaua reana