Karoa 11

Lauegu Dabua ese Egu Lalohadai Korikori Idia Hahedinaraia, A?

KEKENI ta ladana Peggy be mai ena tai ida ena tamana sinana dekenai ia gwau: “Ia kwadogi momokani lasi! Umui be buruka taudia idia laloa bamona umui laloa!” Bena ia be ena daiutu lalonai ia heau vareai. Ena deresi ena lata idia heailaia unai. Reana oiemu sinana, oiemu tisa, eiava oiemu gaukara biaguna ese oiemu dabua ta, oi ura henia dabuana, ia gwauraia dika neganai, umui be unai bamona umui hepapahuahulaia.

Momokani, taunimanima be mai edia ura idauidau dabua edia toana dekenai, bona unai be kerere lasi. To, ta ta ena ura ena ura hegeregeredia dabua idia karaia diba be maoro, a?

Emu Dabua ena Toana Dainai Oi Idia Hanamoa, A?

Kekeni ta ladana Pam ia gwau: “Oiemu dabua ese oiemu kara bona oiemu ura idia hahedinaraia.” Oibe, taunimanima ese oiemu dabua idia itaia neganai idia diba oi be edena bamona tauna. Ta ena dabua ena toana dainai, reana taunimanima ese ia do idia gwauraia kara maoromaoro tauna eiava gwau-edeede tauna. Memero kekeni haida ese edia dabua idia darea, o sitailo idauna ta idia karaia, o dava bada dabuadia idia karaia, edia mauri dalana hahedinaraia totona. Kekeni haida be sitailo ta idia karaia memero edia lalona veria totona, eiava idia laloa unai sitailo idia karaia neganai taunimanima do idia laloa edia mauri laganidia be bada. Memero haida danu be unai bamona idia karaia.

Unai dainai ita diba dahaka dainai memero kekeni momo ese edia dabua idia laloa bada. Buka ta ladana Dress for Success torea tauna, John T. Molloy ia gwau: “Ita hedavari henidia taudia ese iseda dabua idia laloa, bena unai hegeregerena ita idia abia dae eiava ita idia dadaraia.”

Unai dainai oiemu tamana sinana ese oiemu dabua idia laloa momo! Idia ura taunimanima ese oiemu dabua do idia itaia neganai do idia laloa oi be taunimanima namona ta. Vadaeni, oiemu dabua dainai taunimanima ese oi unai bamona idia laloa, a? Dabua oi abia hidi neganai, dahaka oi laloa?

“Lauegu Turadia edia Ura Hegeregerena Lau Karaia”

Memero kekeni momo idia laloa, edia dabua edia toana amo idia hahedinaraia idia be mai edia ura-kwalimu. To oi do matamata dainai, oiemu ura bona kara be idia idau noho. Ena be oi ura oiemu dabua edia toana amo emu lalohadai oi hahedinaraia, to reana oi diba namonamo lasi emu lalohadai korikorina be dahaka bona edena bamona do oi hahedinaraia be namo. Unai hegeregerena, memero kekeni haida be dabua idaudia idia karaia sibodia edia ura hahedinaraia totona, to unai amo idia hahedinaraia idia be taunimanima badadia bamona idia laloa lasi, bona edia tamadia sinadia idia hahemaraidia danu.

Memero kekeni ma haida be edia turadia edia dabua karaia dalana idia tohotohoa; idia laloa unai dala amo do idia idau lasi. Momokani, ma haida edia kara tohotohoa karana be reana ia kerere lasi. (1 Korinto 9⁠:22 itaia.) To, Keristen merona ia ura taunimanima do idia gwau iena toana be murimuri memerodia edia toana hegeregerena, a? Kara maoromaoro oi rakatania emu turadia edia lalo-namo abia totona be aonega karana, a? Kekeni ta ia gwau: “Lauegu turadia edia kara lau tohotohoa, lau do idia gwauraia dika garina.” To, bema taunimanima ta ese ma ta ena ura ia karaia hanaihanai, ia be edena bamona tauna? Baibel ia gwau: “Umui diba lasi, a? Bema umui ese emui tauanina umui henia tau ta dekenai bona iena hereva umui kamonai henia neganai, umui be iena hesiai gaukara umui karaia noho taudia.”​—⁠Roma 6⁠:16.

Memero kekeni be sibodia edia orea taudia edia ura idia badinaia momokani dainai, idia be edia hesiai taudia hegeregeredia ai idia lao. Edia hereva inai gau dekenai idia tahua: dabua be edena bamona do idia karaia, edena bamona do idia herevahereva, dahaka do idia karaia, dahaka do idia laloa, bona edena hereva do idia abia dae.​—⁠Adolescence: Transition From Childhood to Maturity.

To oiemu turadia edia diba be hegeregere, unai sisiba oi do idia henia, a? (Mataio 15⁠:14 itaia.) Oi hegeregerena, idia edia lalona be tau badana ena lalona hegeregerena lasi, ani? Bema oi diba edia lalohadai be maoro lasi eiava emu tamana sinana edia ura hegeregerena lasi, unai lalohadai oi abia dae be aonega karana lasi, ani?

Sitailo Idia Haidaua Loulou

Memero kekeni ma haida ese sitailo matamatadia idia tohotohodia. To unai sitailo idia idau loulou! Hari dina ai sitailo ta idia gwauraia namo herea, bena kerukeru vanegai do idia gwauraia sitailo gunana ta. Unai dala amo bisinesi taudia, sitailo matamatadia idia laloa davari taudia bona dabua idia turia taudia unai, ese moni bada idia davaria, badina taunimanima idia ura sitailo matamatadia sibodia do idia karaia.

Reana oi henanadai, oi gwau: ‘Sitailo matamatana lau karaia be kerere, a?’ Reana lasi. Gunaguna, Dirava ena hesiai taudia ese dabua idia karaia edia hanua taudia edia sitailo hegeregerena. Unai hegeregerena, Baibel ia gwau Tamara ena “dabua be dabua latana, imana lata gauna; badina be nega gunadia ai hanua pavapavana ena natudia ulatodia rami-hebou be unai bamona dabua idia karaia.”​—⁠2 Samuel 13⁠:18.

To sitailo ura henia karana ese ta ena mauri ia biagua be maoro, a? Kekeni ta ia gwau: ‘Kekeni iboudiai ese idia karaia deresina be sitoa lalonai lau itaia neganai, lau gwau, “Sinagu e, unai deresi oi hoia lauegu,” bena ia gwau, “Lasi, unai bamona deresi do lau turia oiemu.” To lau gwau, “Oi diba lasi. Lau ura unai deresi.” ’ Sitailo matamatadia idia laloa davari taudia ese oi idia biagua neganai, oi sibomu emu lalohadai korikorina oi hahedinaraia diba lasi, ani? Vadaeni, dahaka dainai edia lalo-ani herevadia oi abia dae?

Roma 12⁠:2 ia gwau: “Inai tanobada taudia edia kara bamona do umui karaia lasi, to Dirava ese emui lalona do ia hagiroa, . . . Unai dekena amo Dirava ena ura be do umui diba momokani. Do umui diba edena kara be namo, edena kara Dirava ia ura henia.” Vadaeni, dabua oi abia hidi neganai, “Dirava ena ura” be dahaka?

“Mai Manau bona mai Hemataurai Danu”

Timoteo Ginigunana 2⁠:9 ia gwau, namona be Keristen taudia ese “mai manau bona mai hemataurai danu dabua do idia kwatua.” Unai dainai namona be edia dabua edia toana be namo bona idia goeva. Ta be mai “hemataurai” ida dabua ia kwatua, anina be opesi lalonai ia gaukara neganai ena dabua be hegeregere unai gabu dekenai, eiava kone ai ia digudigu neganai ena dabua be hegeregere unai gabu dekenai.

Unai dainai Iehova ena Witness memerodia bona kekenidia be Keristen heboudia dekenai idia lao neganai bona haroro gaukara idia karaia neganai, namona be edia dabua edia toana be Dirava ena hesiai taudia edia dabua edia toana hegeregerena. Korinto Iharuana 6⁠:​3, 4 lalonai Paulo ia gwau: “Kara ta ai karaia lasi, tau ta ena mauri hadikaia totona. Oibe, tau ta ai hadikaia lasi, do idia gwau aiemai gaukara be dika garina. To aiemai kara ibounai dekena amo ai hedinaraia ai be Dirava ena hesiai taudia.”

Hemataurai ena anina ma ta be, ma haida edia lalona ita laloa. Aposetolo Paulo ia gwau Keristen tauna ese kara ta ia karaia gwauraia neganai, namona be ia naria namonamo, sibona ena lalona bona ma ta ena lalona danu do ia hahekwakwanaia garina. (1 Korinto 10⁠:29) Vadaeni, namona be oiemu tamana sinana edia lalona oi laloa bada, ani?

Dabua Namodia Karaia Karana ena Namo

Baibel ese Kwini Eseta ena sivarai ia gwauraia. Nega ta Eseta ia ura ena adavana, hanua pavapavana, vairanai do ia hedinarai, ia boiria lasi neganai. Unai kara dainai idia hamasea diba! To Eseta ese Dirava ena heduru ia noia. Danu, ena toana ia laloa​—⁠“ena dagi dabuadia ia karaia,” badina be unai be dina badana ia dekenai! Vadaeni, “hanua pavapavana ese Kwini Eseta na magu ai ia gini ia itaia, bena ia lalo-namo henia.”​—⁠Eseta 5⁠:​1, 2.

Moni gaukarana oi tahua neganai, bema mai emu hemataurai ida dabua namona oi karaia, reana gaukara biaguna ese oi do ia moalelaia. Diba hahinena ta ladana Vicki L. Baum ia gwau, moni gaukarana idia tahua hahinedia haida idia laloa kerere. Idia laloa gaukara idia tahua neganai tatau edia matana veria dabuadia idia karaia be namo. To unai bamona idia karaia neganai, reana gaukara biaguna ese ia matauraidia momokani diba lasi. Baum ia gwau, dabua hekahihekahidia o lebulebu dabuadia idia karaia be namo lasi.

Memero danu ese moni gaukarana idia tahua neganai, mai edia hemataurai ida dabua idia karaia be namo. John T. Molloy ia gwau, bisinesi taudia ese “edia huina idia duaria namonamo bona edia tamaka idia polisia. Bona idia laloa tatau oredia danu be unai bamona idia karaia be namo.”

Bema lebulebu dabuadia oi karaia, reana taunimanima ese oi do idia laloa kerere. Buka ta ladana Psychology Today ia gwau, bema kekeni ese dabua hekahihekahina ia karaia, eiava bema rata koua gauna ia karaia lasi, eiava bema ena dabua ese ena rata ia hunia lasi, tatau do idia laloa ia be unai amo ia veridia toho do idia sihari henia totona. Tauhau ta ia gwau: “Ulato be edia dabua karaia dalana lau itaia neganai, lau lalodia maoromaoro be auka.” Mai emu hemataurai ida dabua oi karaia neganai, reana taunimanima ese oiemu lalona do idia dibaia. Bema oi diba lasi dabua ta be dabua namona eiava lasi, emu tamana sinana oi nanadailaidia.

Oiemu Lalona Oi Hahairaia

Aposetolo Petro ese Keristen hahinedia ia hamaorodia, ia gwau: “Namona be emui hairai korikori be emui lalona dekenai ia noho. Herahera namodia, . . . hegeregere laloa manau, bona dagedage lasi, emui lalona dekenai do umui atoa. . . . Idia be namo bada herea Dirava ena vairanai” bona taunimanima vairadiai danu! (1 Petero 3⁠:4) Dabua mai edia sitailo ese oiemu bamodia haida idia hahoadia reana, to unai dabua ese emu turadia korikoridia ai idia halaodia diba lasi. Tura korikoridia davaridia totona, namona be emu lalona oi hahairaia. (2 Korinto 4⁠:16) Ena lalona be mai hairaina tauna be taunimanima ese idia ura henia; ena dabua be sitailo gaudia lasi be herevana.

Namona be oi laloa edena dabua ena toana be namo oi dekenai, bena dabua mai edia toana namona sibona oi karaia. Lebulebu dabuadia oi karaia lasi. Sitailo matamatana oi karaia haraga lasi, bona oi naria lasi ela bona taunimanima iboudiai ese unai sitailo idia karaia vadaeni bena oi karaia. Dabua namodia, nega daudau ai do oi karaia diba dabuadia, oi hoidia be namo. Namona be oiemu dabua dainai taunimanima ese oi do idia laloa kerere lasi, to unai dabua ese oiemu lalohadai korikorina do idia hahedinaraia be namo!

Inai Henanadai Herevalaia

◻ Dabua ese dahaka idia hahedinaraia?

◻ Dahaka dainai memero kekeni haida ese dabua idaudia idia karaia?

◻ Dabua oi abia hidi neganai, emu bamodia edia ura oi laloa bada eiava?

◻ Bema oi ura sitailo matamatadia sibodia do oi karaia, dahaka dika do oi davaria diba?

◻ Dahaka dainai sitailo ta be “hemataurai” gauna ita gwauraia diba?

[Blurb on page 94]

‘Oiemu dabua ese emu kara bona emu lalohadai idia hahedinaraia’

[Picture on page 91]

Tama sina momo be edia natudia edia dabua dainai idia ida idia heai. Anina be lalohadai matamatadia idia abia dae diba lasi a?

[Picture on page 92]

Memero kekeni momo idia ura edia dabua karaia dalana amo idia hahedinaraia idia be idau

[Pictures on page 93]

Dabua oi abia hidi namonamo. Emu dabua ese emu lalona idia hahedinaraia!