Karoa 23

Headava Do Lasi Neganai Mahuta Hebou be Maoro, A?

‘BEMA mero ta bona kekeni ta idia ura heheni, idia mahuta hebou be maoro, a? Eiava namona be idia naria ela bona idia headava, a?’ ‘Ta ese lau ia do mahuta henia lasi; unai be lauegu dika ta dainai, a?’ Memero kekeni momo edia henanadai be unai.

To, lagani 1981 lalonai orea ta (Alan Guttmacher Institute) ese inai ripoti ia halasia: “Edia mauri laganidia be 13 ia lao 19 taudia ta ta sibodia be mahuta hebou karana idia karaia lasi. Memero 10 10 amo 8 8 be mahuta hebou karana idia karaia, bona kekeni 10 10 amo 7 7 ese.”

Reana do oi gwau, ‘Unai be dika lasi.’ Taunimanima edia ura korikorina be ma ta ena lalokau ena mamina do idia abia. Oi be matamata neganai, unai ura ia goada herea. Danu, emu bamodia ese emu lalona idia ania toho. Reana oi idia hamaoroa, bema mahuta hebou karana oi karaia moale do oi davaria, bona ta oi ura henia momokani neganai, vaia taunimanima edia kara hegeregerena oi ura do oi mahuta henia. Reana haida idia gwau, oi be ta ida umui mahuta hebou neganai, oi hamomokania oi be taunimanima badana ta ai oi lao vadaeni. Oi ura lasi do idia laloa oi be idau, unai dainai reana oi laloa unai bamona oi karaia be namo.

Ena be taunimanima momo edia lalohadai be unai bamona, to memero kekeni haida idia ura lasi idia mahuta hebou. Haneulato ta ladana Esther ena sivarai mani oi laloa: Doketa ese ia sekea neganai, ia nanadaia, ia gwau: “Dahaka oi gaukaralaia natuna havaraia dalana koua totona?” Esther ese ia haere henia, ia gwau: “Gau ta lau gaukaralaia lasi.” Doketa ia gwau: “Be, oi ura do oi rogorogo, a? Bema gau ta oi gaukaralaia lasi, do oi rogorogo diba.” Esther ia gwau: “Lau be mero ta ida ai mahuta hebou lasi!”

Ena doketa ia hoa maragi lasi. Ia gwau: “Oiemu kara lau hoalaia. Mauri laganidia 13 idia abia kekenidia be lau dekenai idia mai, idia be memero ida idia mahuta hebou vadaeni. Oi be idau vaitani.”

Dahaka dainai Esther be “idau vaitani”? Badina be inai sisiba Baibel lalonai ia badinaia: “Tauanina ia noho be lebulebu karaia totona lasi . . . Heudahanai karadia umui rakatania.” (1 Korinto 6⁠:​13, 18) Oibe, ia diba bema mero ta ida ia mahuta hebou, Dirava ia kara dika henia unai! “Dirava ena ura be inai: . . . heudahanai karadia do umui rakatania momokani.” (1 Tesalonika 4⁠:⁠3) Vadaeni, dahaka dainai Baibel ese headava karana ia taravatulaia, idia do headava lasi taudia dekenai?

Mahuta Hebou Karana Murinai Idia Vara Gaudia

Baibel negadiai danu, taunimanima haida be idia do headava lasi neganai headava karadia idia karaia. Lebulebu hahinena ta ese tauhau ta ena lalona be inai bamona ia ania reana; ia gwau: “Oi mai, do ita mahuta hebou ela bona daba; do ita ura heheni mai eda moale ida.” (Hereva Lada-isidia 7⁠:18) To Baibel ia gwau, hari dina ita idia hamoalea gaudia ese kerukeru iseda lalona do idia hahisia diba. Solomon ia gwau: “Hani be lebulebu hahinena ena bibinana amo ia hebubu, bona ena hereva digarana ese dehoro digarana ia hereaia; to dokona ai ia be idita, muramura iditana bamona; bona mai ganona, isena ruaosi idia segedia kaiana bamona.”​—⁠Hereva Lada-isidia 5⁠:​3, 4.

Mahuta hebou karana murinai ia vara diba gauna ta be pokese gorerena. Bema lagani haida murinai ta ia davaria unai kara amo ia abia gorerena dainai natuna ia havaraia diba lasi o ena tauanina ia dika momokani, ena lalona ia hisihisi bada, ani? Hereva Lada-isidia 5⁠:11 ia gwau: “Ela bona emu mauri dokona ai do oi ganagana, gorere ese emu hidio bona emu tauanina do ia haoredia neganai.” Mahuta hebou karadia dainai natu idia vara kava (rau 184-5 itaia), kekeni edia bogana lalonai idia noho natudia idia hamasedia, bona memero kekeni edia lalona idia hegeregere lasi neganai idia headava​—⁠unai kara toiosi dainai hisihisi ia vara. Oibe, ia mahuta hebou kava merona o kekenina ese “sibona ena tauanina ia hadikaia noho.”​—⁠1 Korinto 6⁠:⁠18.

Doketa Richard Lee ese unai dika ia itaia dainai ia gwau: ‘Memero bona kekeni dekenai ita heagi, ita gwau: Ita ese natuna havaraia dalana ita koua diba bona pokese goreredia ita hanamodia diba. To, natuna havaraia kava karana bona pokese goreredia koudia dalana maorona ita hadibadia lasi​—⁠dalana korikori be kara maoromaoro, mahuta hebou kava lasi karana unai.’

Edia Kerere Idia Laloa bona Idia Lalohisihisi

Memero kekeni momo idia davaria, mahuta hebou kava karana amo lalohisihisi bada idia davaria. Edia kerere idia laloa bona idia hemarailaia. Tauhau ta ladana Dennis ia gwau: “[Mahuta hebou karana ese] lau ia hamoalea lasi​—⁠lauegu lalona ia namo lasi bona lalokau lau davaria lasi, idia gwauhamatalaia bamona. To idau, lauegu kara kererena dainai egu lalona ese lau ia botaia. Lauegu tauanina lau biagua lasi dainai lau hemarai bada.” Haneulato ta ia gwau: “Ai mahuta hebou murinai lauegu lalona ena mamina be dika herea. Lau laloa lau be anina lasi bona lau miro. Lau ia mahuta henia merona ese egu mamina ia hanamoa lasi. Ia gwau, ‘Dahaka dainai lau oi koua lasi?’ ”

Doketa Jay Segal ia gwau, taunimanima momo be unai bamona idia lalohisihisi, idia mahuta hebou kava murinai. Iunivesiti dekenai idia lao taudia 2,436 edia mahuta hebou karadia ia tahua murinai, ia gwau: ‘Uhau bona ulato toi toi amo rua rua idia gwau, idia mahuta hebou negana ginigunana ai unai kara idia moalelaia lasi.’ To headava taudia be idau; ena be tau ta mai ena adavana ida be reana nega haida edia mahuta hebou karana dekenai hekwakwanai idia davaria, to idia lalokau heheni bona headava gwauhamatana idia karaia dainai, unai hekwakwanai idia hanamoa diba.

Mahuta Hebou Kava ena Davana Dikana

Memero kekeni haida idia laloa mahuta hebou kava karana be kerere lasi, unai dainai edia tauanina edia ura hegeregerena taunimanima idauidau idia mahuta henidia. Memero kekeni edia mahuta hebou kava karadia ia tahua tauna ladana Robert Sorensen, ia gwau edia dika ena davana idia abia. Ma ia gwau: “[Idia mahuta hebou kava memerodia bona kekenidia] ai henanadai henidia neganai, idia momo idia gwau . . . idia laloa edia kara amo anina namona idia havaraia lasi bona moale idia davaria lasi.” Sorensen idia hamaoroa, hari inai negai edia mauri dalana dainai edia diba idia gaukaralaia namonamo lasi, bona idia be sibodia idia laloa maragi.

Hereva Lada-isidia 5⁠:9 ena hereva be momokani. Ia gwau lebulebu taudia ese “edia ladana namona idia haboioa bena haida ese idia abia.”

Idia Mahuta Hebou Murinai

Mero ta be kekeni ta ida idia mahuta hebou murinai, reana mero ese kekeni ia ura henia lasi guna ia ura henia bamona; bona kekeni ia laloa mero ese ia mahuta henia, sibona ena ura ia hahegeregerea totona. Baibel ena sivarai ta mani oi laloa. Tauhau ta ladana Amnon ese haneulato rami-hebouna ladana Tamara ia ura henia dikadika. To ia mahuta henia murinai, “Amnon ese ia inai henia dikadika.”​—⁠2 Samuel 13⁠:⁠15.

Kekeni ta ladana Maria ena sivarai be unai hegeregerena. Mero ta ese ia mahuta henia murinai ia gwau: “Lau be sibogu lau inai henia (lau manoka dainai), bona egu turana danu lau inai henia. Guna ai laloa bema ai mahuta hebou neganai emai hetura karana do ai habadaia, to lasi, ai hadokoa unai. Lau ura lasi unai mero do lau itaia lou.” Oibe, idia mahuta hebou taudia ese idia karaia vadaeni karana idia haidaua diba lasi!

Ruma bese edia mauri dalana tahua tauna ta ladana Paul H. Landis ia gwau: ‘Idia do headava lasi neganai idia mahuta hebou taudia be unai kara amo nega kwadogina lalonai edia hetura karana idia habadaia reana, to gabeai anina idauna ia havaraia.’ Momokani, unai bamona taudia momo be gabeai idia parara! Badina be dahaka? Badina be mahuta hebou kava karana ese mama ia havaraia, bona idia abidadama heheni diba lasi. Mero ta ia gwau: “Kekeni ida idia mahuta hebou murinai, memero haida idia laloa, ‘unai kekeni be lau ida ia mahuta hebou; vadaeni, reana guna ia be ma ta ida ia mahuta hebou danu.’ Lau be unai bamona lau laloa. . . . Lau mama bada bona lau daradara bada, bona lau abidadama henia lasi.”

Lalokau korikori be idau vaitani, ‘ia mama lasi, . . . haida hadikaia ia ura lasi, sibona ena gau ia tahua lasi.’ (1 Korinto 13⁠:​4, 5) Nega daudau ia noho hetura karana ia havaraia lalokauna be hegahusi kava amo ia vara lasi.

Kara Goeva ena Davana Namona be Maino bona Hemataurai

Bema memero kekeni idia mahuta hebou lasi, dika amo idia siri, bona hahenamo idia davaria danu. Baibel ese haneulato ta ena sivarai ia gwauraia, ia gwau ena be ena turana ia lalokau henia bada, to idia mahuta hebou lasi. Unai dainai haneulato ia gwau: “Lau be magu, egu ratana be kohoro bamona.” Ta ese ia mahuta henia totona ena lalona ia ania toho neganai, ia be kehoa haraga ‘iduarana’ ta bamona lasi. Idia hanaia diba lasi maguna aukana mai ena kohoro bamona ia gini, mai ena kara maoromaoro ida! Ena kara dainai idia gwauraia “goeva” be maoro, bona ia gwau diba, ena maoheni vairanai ia be “maino ia davaria kekenina bamona.” Ena lalona ia maino dainai, idia ruaosi idia moale hebou diba.​—⁠Solomon ena Ane 6⁠:​9, 10; 8⁠:​9, 10.

Ai gwauraia vadaeni haneulato rami-hebouna ladana Esther danu ese unai bamona maino bona moale ia davaria. Ia gwau: “Lauegu kara dainai lau moale. Lau ida idia gaukara hebou taudia ese lau idia kirikirilaia neganai, lau laloa egu rami-hebou dagina be dava bada nadina bamona, badina unai nadi be momo lasi, rami-hebou ulatodia be momo lasi hegeregerena.” Danu, Esther bamona kekenidia bona memerodia edia lalona ese idia samanidia loulou lasi. Keristen merona badana ta ladana Stefan ia gwau: “Iehova Dirava vairanai ta ena lalona ia goeva be gau namo hereana.”

Memero kekeni haida idia henanadai, idia gwau: “Bema mero ta bona kekeni ta idia mahuta hebou lasi, edena bamona do idia dibaia heheni?”

Noho Daudau Hetura Karana Havaraia Dalana

Mahuta hebou karana ese noho daudau hetura karana ia havaraia diba lasi; bona kisi henia karana bona unai bamona karadia ma haida danu ese idia havaraia diba lasi. Haneulato ta ladana Ann ia gwau: “Lau dekenai ia vara gauna dainai, lau diba bema mero o kekeni ia kara haraga ena turana ena kopina dauatoho totona, kerere do ia vara diba.” Mero bona kekeni idia kisi bona idia rosia heheni neganai, mai anina gaudia idia herevalaia lasi. Reana idia ruaosi idia lalo-tamona lasi badina be edia lalohadai be idau dainai, to unai idia laloa lasi, ela bona idia headava murinai unai lalohadai idauidau idia hedinarai lou. Ann ese ma tauhau ta​—⁠gabeai ia adavaia tauna unai​—⁠ia tura henia matamaia neganai, ena kara ia naria namonamo. Ann ia gwau: “Ai helai hebou neganai emai hekwakwanai bona emai palani ai herevalaidia. Unai amo lau diba do lau adavaia tauna be edena bamona tauna. Ai headava murinai, emai mauri ai moalelaia bada.”

Ann bona ena turana ese edia tauanina idia biagua be auka, a? Ann ia gwau: “Oibe! Lauegu kara korikori be, lalokau bada lau hahedinaraia lau ura henia taudia dekenai. To unai kara amo do idia vara hekwakwanaidia ai herevalaidia bena ai heduru heheni. Ai ruaosi ai ura dikadika Dirava do ai hamoalea bona emai headava hadikaia karana ta do ai karaia lasi.”

To bema tauhau ta o haneulato ta ese headava karana ia manadalaia, unai ese do ia durua do ia headava neganai, a? Lasi, to unai bamona idia karaia taudia momo be idia headava neganai, headava karana idia moalelaia momokani lasi! Idia do headava lasi neganai bema idia mahuta hebou, tauanina hamoalea karana idia laloa bada. Idia hemataurai heheni lasi badina be edia tauanina idia biagua lasi. Sibodia edia ura tahua karana idia manadalaia murinai idia hadokoa be auka, bena reana gabeai edia hetura karana do idia hadikaia momokani.

To, headava lalonai danu namona be tau bona hahine ese edia ura bona edia tauanina idia biagua, edia hetura karana do idia goadalaia totona. Namona be idia laloa ‘headava kara do idia henia’ be namo bada, do idia abia be namo sisina. (1 Korinto 7⁠:​3, 4) Bema oi kara goevagoeva noho, unai ese oi ia durua emu tauanina oi biagua totona. Bona oi ia hadibaia, sibomu emu namo oi tahua guna be namo lasi, to emu adavana ena namo oi tahua guna be namo. Mani inai danu oi laloa: Tau bona hahine be headava lalonai do idia moale hebou dalana be headava karana sibona amo lasi. Taunimanima edia kara ia tahua tauna ladana Seymour Fisher ia gwau, hahine ese headava karana ia moalelaia totona, namona be ena adavana ena lalokau ena mamina ia abia dainai ia abidadama henia diba, bona ena adavana ese ena lalohadai ia lalo-pararalaia be namo.

Ripoti ta ese ia hahedinaraia, hahine 177 edia headava idia nanadailaidia neganai, idia do headava lasi neganai mahuta hebou karana idia karaia hahinedia foa foa amo toi toi idia gwau, idia headava matamata neganai pura ginigunadia ruaosi lalodiai headava karana dekenai hekwakwanai idia davaria. Danu, nega daudau lalonai headava karana dekenai hekwakwanai idia davaria hahinedia be “guna idia do headava lasi neganai idia mahuta hebou loulou.” Ripoti haida ese idia hahedinaraia, idia do headava lasi neganai idia mahuta hebou taudia momo be idia headava murinai idia heudahanai! Baibel ena hereva be momokani, ia gwau: “Heudahanai . . . ese lalohadai maorona [ia] abia oho.”​—⁠Hosea 4⁠:⁠11.

Unai dainai, ‘oi hadoa gaudia hegeregeredia sibodia do oi abidia.’ (Galatia 6⁠:​7, 8, NW) Lebulebu ese daradara bona noho dikana ia havaraia. To, bema hari emu tauanina oi biagua, do oi headava murinai emu adavana ida do umui badinaia heheni bona do umui noho namo. Ai gwauraia vadaeni haneulatona Esther be lagani haida lalodiai ia headava vadaeni bona ena headava ia moalelaia. Ena tau ia gwau: “Lau moale dikadika ruma dekenai lau giroa lou bona egu adavana lau itaia neganai, badina lau diba lau be ia sibona ena bona ia be lau sibogu egu. Ai abidadama heheni momokani.”

Headava karana idia karaia lasi ela bona idia headava maoromaoro taudia ese lalo-maino idia davaria, badina idia diba edia kara ese Dirava ia hamoalea. To, hari inai negai kara goevagoeva badinaia be auka herea. Vadaeni, dahaka ese oi do ia durua diba do oi kara goevagoeva noho totona? Unai do oi diba totona, karoa gabena mani oi duahia.

Inai Henanadai Herevalaia

◻ Oi diba memerodia bona kekenidia hida idia mahuta hebou vadaeni? Unai ese emu lalona ia hahekwakwanaia, a?

◻ Mahuta hebou karana dainai idia vara gau dikadia haida be dahaka dahaka? Unai dika idia davaria memerodia bona kekenidia haida oi diba, a?

◻ Kekeni do idia rogorogo lasi totona, natuna havaraia dalana koua karana ta idia karaia be maoro, a?

◻ Dahaka dainai haida idia mahuta hebou murinai idia moale lasi bona edia kerere idia lalohisihisilaia?

◻ Oi laloa mero bona kekeni bema idia mahuta hebou, unai ese ia durudia idia lalokau heheni totona, a? Dahaka dainai unai bamona oi haere?

◻ Tauhau bona haneulato idia turana karaia neganai, edena dala maoromaorona amo idia diba heheni diba?

◻ Bema memero o kekeni be headava karana idia karaia lasi ela bona idia headava murinai, dahaka hahenamo idia davaria diba?

[Blurb on page 182]

“Edia mauri laganidia be 13 ia lao 19 taudia ta ta sibodia be mahuta hebou karana idia karaia lasi.”​—⁠The Alan Guttmacher Institute

[Blurb on page 187]

“Lau ia hamoalea lasi⁠—⁠lauegu lalona ia namo lasi bona lalokau ena mamina lau abia lasi”

[Blurb on page 190]

Idia mahuta hebou taudia ese idia karaia vadaeni karana idia haidaua diba lasi!

[Box/Picture on page 184, 185]

‘Lau Dekenai Do Ia Vara Diba Lasi!’​—⁠Idia Rogorogo Kava Kekenidia edia Hekwakwanai

Buka ta ia gwau: “Lagani ta ta iboudiai, edia mauri laganidia be 13 ia lao 19 kekenidia 10 10 amo ta ta idia rogorogo kava, bona unai namba ia bada ia lao. Bema unai bamona taudia ese edia kara idia haidaua lasi, idia 10 10 amo 4 4 do idia rogorogo kava.” Magasin ta ia gwau inai bamona kekenidia idia rogorogo kava: “Kohu momo taudia amo ela bona ogogami taudia edia natudia . . . Bese idauidau kekenidia, tomadiho idauidau kekenidia, hanua kekenidia bona taoni kekenidia danu.”

Kekeni haida sibodia idia ura do idia rogorogo. Frank Furstenberg, Jr. ese ia torea sivaraina ia hahedinaraia, rogorogo kekenidia 400 ia nanadailaidia neganai, “idia momo idia gwau, ‘Guna lau laloa inai kerere be lau dekenai do ia vara diba lasi.’ ”

Kekeni haida idia diba, ena be edia turadia haida be edia sihari memerodia ida idia mahuta hebou to idia rogorogo lasi; unai dainai idia laloa bema idia be sibodia edia sihari memerodia ida idia mahuta hebou do idia rogorogo lasi. Furstenberg be ma ia gwau: “Kekeni haida idia gwau idia laloa do idia rogorogo ‘haraga’ diba lasi. Ma haida idia laloa bema ‘nega ta ta sibona’ idia mahuta hebou do idia rogorogo diba lasi . . . Bema nega sisina daudau lalonai bogana idia abia lasi, edia mahuta hebou karadia idia habadaia.”

To, hereva momokani be inai: Kekeni ta be mero ta ida idia mahuta hebou neganai, bogana ia abia diba. (Kekeni 544 edia kara idia tahua neganai, idia davaria ‘idia faiv faiv amo ta ta be idia mahuta hebou matamata murinai hua 6 idia do ore lasi neganai, bogana idia abia vadaeni.’) Idia momo be natuna ia abia kava hahinena ta ladana Robin bamona; idia ura lasi natuna havaraia dalana koua muramurana idia inua, unai muramura ese do ia hagoreredia garina. Robin ia gwau: “Bema natuna havaraia dalana koua muramurana lau abia, lau hahedinaraia lau diba lauegu kara be kerere. Unai bamona lau karaia diba lasi. Unai dainai lauegu kara lau laloa lasi bona lau laloa bema lau laki bogana do lau abia lasi.”

Natuna idia havaraia kava hahinedia momo be unai bamona idia laloa. Furstenberg ena ripoti ese ia hahedinaraia “kekeni rua rua amo ta ta idia gwau, idia laloa namona be idia naria ela bona idia headava murinai bena headava karana idia karaia . . . To, edia hereva bona edia kara be idau vaitani . . . Lalohadai maorona idia gwauraia, to kara idauna idia karaia.” Idia lalo-rua dainai “unai kekeni ese edia kara dainai idia vara gaudia idia laloa maoromaoro diba lasi.”

Ena be kekeni ta ese natuna havaraia dalana koua gauna ta do ia gaukaralaia, to do ia rogorogo diba. Buka ta ladana Kids Having Kids ia gwau: “Unai koua gaudia iboudiai be nega haida idia hegeregere lasi. . . . Ena be kekeni be nega ibounai unai koua gaudia do idia gaukaralaia . . . to [U.S. dekenai] lagani ta ta iboudiai kekeni 500,000 ese bogana do idia abia.” Unai buka ese natuna ia havaraia kava hahinena ta, ena mauri laganidia be 16 hahinena, ena hereva ia gwauraia; ia gwau: “Nega ibounai [natuna havaraia dalana koua muramurana] lau inua. Dina ta lau reaia lasi.”

Baibel ia gwau: “Umui laloa kerere lasi, Dirava ita koia diba lasi. Taunimanima idia hadoa gaudia hegeregeredia sibodia do idia abidia.” (Galatia 6⁠:⁠7, NW) Unai hegeregerena, memero ida idia mahuta hebou kava kekenidia ese bogana idia abia. To gau namona be inai: Mahuta hebou kava taudia oredia hegeregeredia, idia helalo-kerehai diba bona Dirava dekenai idia giroa diba, King David ia karaia bamona. David ese Dirava ia noia, ia gwau: “Lauegu kara kerere amo lau oi huria namonamo; bona lauegu kara dika amo lau oi hagoevaia.” (Salamo 51⁠:⁠2) Unai bamona idia helalo-kerehai hahinedia be Dirava ese do ia durudia, edia natudia be “Lohiabada ena hadibaia hereva” idia hadibadia toho neganai.​—⁠Efeso 6⁠:⁠4.

To, dala namo hereana be inai: Oi be ta ida umui mahuta hebou kava lasi! Ena be haida idia gwau dika do oi davaria lasi, to edia koikoi herevana oi abia dae lasi.

[Picture on page 183]

Idia mahuta hebou murinai, memero kekeni momo idia hemarai bona idia laloa idia mahuta henidia taudia ese sibodia edia ura idia tahua

[Picture on page 186]

Mahuta hebou kava taudia momo ese pokese goreredia idia davaria

[Picture on page 188]

Mero be kekeni ida idia kisi momo o idia rosia heheni momo neganai, edia tauanina idia biagua be auka

[Picture on page 189]

Edia headava lalonai do idia moale totona, ruaosi edia tauanina karadia sibodia idia laloa be hegeregere lasi