Karoa 100

Parabole​—Hesiai Taudia Siliva Monidia Idia Naria

IESU be Sakaio ena ruma ai ia do noho. Ierusalem dekenai ia lao gwauraia, bona ena hahediba taudia idia laloa Ierusalem dekenai do idia ginidae neganai, Iesu be taunimanima vairadiai do ia gwau ia be Mesia, bona ena Basileia do ia haginia. Unai lalohadai kererena hamaoromaoroa totona parabole ta ia henidia, ia hahedinaraia Basileia be do daudau.

Ia gwau: “Lohia ta hanua daudau dekenai ia lao, ena basileia dekenai king dagina do ia abia, vadaeni inai murinai do ia giroa mai.” Iesu be unai “lohia,” bona guba be unai ‘hanua daudauna.’ Unuseniai do ia ginidae neganai, ena Tamana ese pavapava ena siahu do ia henia.

Ia lao gwauraia neganai, unai lohia ese ena hesiai taudia 10 ia boiridia, siliva monidia ta ta amo ia henidia, ia gwau: “Do umui hoihoilaia ela bona do lau giroa mai.” Unai parabole ia guguru negana ginigunana ai, unai hesiai taudia 10 edia anina be Iesu ena hahediba taudia ginigunadia, to gabeai edia anina be, guba Basileia lalonai Iesu ida do idia noho taudia iboudiai.

Unai siliva monidia ta be biru tauna ena gaukara davana, hua toi edia bamona. Vadaeni dahaka idia laulaulaia? Bona hesiai taudia ese idia amo dahaka hoihoi gaukarana idia karaia be namo?

Unai siliva monidia ese idia laulaulaia gaudia be inai: Lauma helaga amo ia horodia taudia ia henidia kohudia namodia; Iesu be mase amo ia toreisi lou bona ena hahediba taudia dekediai ia hedinarai murinai ia henidia, bena idia gaukaralaia, taunimanima ma haida be guba Basileiana taudia ai idia halaodia totona. Idia gaukaralaia ela bona Iesu ese Basileia ena Pavapava dagina ia abia bena ia lou mai.

Iesu ma ia gwau: “To inai lohia ena hanua taudia ese idia badu dikadika henia, vadaeni hesiai taudia haida iena murina dekenai idia siaia, do idia gwau, ‘Ai be ai ura lasi ia be aiemai basileia ena king dagina do ia abia.’ ” Hanua taudia be Iuda taudia; Iesu be guba dekenai ia lao murinai, ena hahediba taudia idia dagedage henidia, unai amo idia hahedinaraia idia ura lasi ia be edia king ai do ia lao. Edia kara be unai hanua taudia edia kara bamona, hesiai taudia haida lohia murinai idia siaidia taudia unai.

Hesiai taudia 10 ese edia moni edena bamona idia gaukaralaia? Iesu ia gwau: “Basileia ia abia, vadaeni ia giroa lou, moni ia henia taudia dekenai ia boiria, edia hoihoi dekenai idia davaria gaudia do ia diba gwauraia. Ginigunana ia mai, ia gwau, ‘Lohiabada e, oiemu 20 kina dekena amo 200 kina lau davaria vadaeni.’ Ia hanamoa ia dekenai, ia gwau, ‘Namo herea, oi be hesiai tauna namona. Gau maragina oi naria namonamo dainai, hanua 10 edia lohia tauna do oi lao.’ Iharuana danu ia mai, ia gwau, ‘Lohiabada e, oiemu 20 kina dekena amo 100 kina lau davaria vadaeni.’ Vadaeni ia gwau, ‘Hanua 5 edia lohia tauna do oi lao.’ ”

Kina 200 ia davaria tauna ese aposetolo bona hahediba taudia ma haida ia laulaulaidia, Dirava ese Pentekoste 33 C.E. amo ema bona hari ia abidia hidi taudia. Kina 100 ia davaria tauna danu ese hahediba taudia haida ia laulaulaidia, idia danu be unai nega lalonai idia noho bona edia goada bona edia diba hegeregeredia edia lohia ena kohu tanobada dekenai idia habadaia. Unai taudia idauidau ese sivarai namona idia harorolaia goadagoada dainai, lalo-namo taudia momo be Keristen taudia ai idia lao. Hesiai taudia 9 idia gaukara goadagoada bona edia moni idia habadaia.

Bena Iesu ia gwau: “Ta ma ia mai, ia gwau, ‘Lohiabada e, oiemu 20 kina be inai, dabua dekenai lau kumia, lau naria. Badina be oi dekenai lau gari, oi be hereva auka tauna, oi atoa diho lasi gauna oi abia isi, oi hadoa lasi gauna oi utua.’ To lohia ia gwau, ‘Oi be hesiai tauna dikana. Oi sibona emu hereva dekena amo do lau kota henia oi. Oi be oi diba lau be hereva auka tauna, lau atoa diho lasi gauna lau abia isi bona lau hadoa lasi gauna lau utua. Unai dainai edena bamona egu moni be banika taudia dekenai oi abia lao lasi, vadaeni do lau giroa mai neganai, do lau abia lou, mai ena atoa kau moni sisina danu?’ Vadaeni iena badibadinai idia gini taudia dekenai ia hereva henia, ia gwau, ‘Ia dekena amo ena 20 kina umui kokia, 200 kina ia abia tauna dekenai do umui henia.’ ”

Unai hesiai tauna dikana ena moni idia kokia ena anina be, ena dala idia koua bena guba Basileiana lalonai do ia lohia diba lasi, hanua 10 eiava hanua 5 do ia lohiadia lasi unai. Inai danu mani oi laloa: Lohia ese unai hesiai tauna ia gwauraia dika, kara dika ia karaia dainai lasi, to badina be ia gaukara lasi ena biaguna ena basileia kohuna habadaia totona.

Hesiai tauna dikana ena moni be hesiai tauna ginigunana idia henia neganai, haida idia maumau, idia gwau: “Lohiabada e, ia be mai ena 200 kina vadaeni.” To Iesu ia haere, ia gwau: “Lau hamaoroa umui dekenai, mai ena gau tauna be gau momo do idia henia, to ena gau be lasi tauna be ia dekenai sisina ia noho gauna be do idia abia. To lau dekenai idia badu henia taudia, be idia ura lasi do lau lohia idia dekenai taudia, umui mailaia, egu vairana dekenai idia do umui alaia mase.” Luka 19:​11-27; Mataio 28:​19, 20.

▪ Dahaka dainai Iesu ese siliva monidia edia parabole ia gwauraia?

▪ Lohia ese daika ia laulaulaia, bona edena hanua daudauna dekenai ia lao?

▪ Hesiai taudia be daidia, bona siliva monidia ese dahaka idia laulaulaia?

▪ Hanua taudia be daidia, bona edia badu be edena bamona idia hahedinaraia?

▪ Dahaka dainai hesiai tauna ta ia gwauraia dika, bona ena moni idia kokia anina be dahaka?