Lauma Dikadia ese Dirava Gwau-Edeede Henia Karana Idia Habadaia

To dahaka dainai Satani bona ena lauma dikadia ese taunimanima idia koia toho? Badina be idia ura ita be idia ida do ita gwau-edeede. Idia ura idia do ita tomadiho henidia. Idia ura edia koikoi herevadia do ita abia dae bona Dirava ese ia ura henia lasi karadia do ita karaia. Unai kara momo be taunimanima ese mase taudia dainai idia karaia karadia.

Taunimanima be edia lalokau taudia edia mase idia lalohisihisilaia, bona vaia edia lalohisihisi idia hahedinaraia. Ena turana Lasaro ia mase murinai, Iesu “ia tai.”​—⁠Ioane 11:35.

Tanobada hegegemadai, taunimanima be kara idauidau momo mase dainai idia karaia. Unai kara momo ese Baibel ena taravatu idia utua lasi. To kara haida idia karaia, badina be idia laloa mase taudia be idia mauri noho bona mauri taudia idia itaia diba. Mase taudia idia taitailaia badabada bona guria karadia idauidau idia karaia, mase taudia edia lauma do idia habadua garina. To mase taudia be “gau ta idia diba lasi” dainai, unai kara idia karaia taudia ese Satani ena koikoi idia durua.​—⁠Hadibaia Tauna 9:5.

Kara ma haida idia karaia, badina be idia laloa mase taudia ese mauri taudia edia heduru do idia abia be namo, bona bema idia durua lasi do idia hadikadia. Tano haida dekenai, tau ta ia mase murinai idia naria ela bona dina 40 eiava lagani ta ia ore, bena boubou karadia idia karaia. Idia laloa unai amo mase tauna do idia durua, lauma edia gabu dekenai do ia ‘hanai’ totona. Idia momo ese aniani bona inuinu gaudia idia atoa mase taudia totona.

Unai kara be kerere, badina be Satani ese mase taudia ia koia herevadia idia durua dainai. Lauma dikadia edia hahediba herevadia dainai idia karaia karadia bema ita karaia, Iehova ese ita do ia moale henia, a? Lasi vaitani!​—⁠2 Korinto 6:14-18.

Dirava momokanina ena hesiai taudia ese Satani ena koikoi herevadia hamomokania karadia idia karaia lasi. Idia ese mauri taudia idia durua toho bona edia lalona idia hagoadaia toho. Idia diba ta ia mase murinai Iehova sibona ese ia durua diba.​—⁠Iobu 14:14, 15.

Dirava ese Ia Taravatulaia Karadia

Taunimanima haida ese dala idauidau amo lauma dikadia edia heduru idia tahua lalonai, kara idauidau idia karaia.

Baibel ese unai kara idauidau ibounai ia gwauraia dika, ia gwau: “Meamea kara do umui karaia lasi, puripuri bona vada danu do umui karaia lasi. Puripuri gaudia danu do umui gaukaralaia lasi, bona mase taudia edia laumadia dekenai do umui nanadaia lasi, bona idia danu do umui herevahereva lasi. Lohiabada, emui Dirava ese unai bamona kara bodaga idia karaia taudia ia badu henia noho.”​—⁠Deuteronomi 18:10-12.

Dahaka dainai Iehova ese unai kara ia taravatua auka?

Do ita noho namonamo totona, Iehova ese ita ia hadibaia, lauma dikadia edia kara ibounai do ita dadaraia be namo. Ia ese taunimanima ia lalokau henidia bona ia hebogahisi henidia, bona ia diba lauma dikadia ida idia gaukara hebou taudia ese dika do idia davaria.

Brazil dekenai, rohe hahinena ta ladana Nilda be unai bamona. Lauma dikadia ese ia idia hahisia bada. Ia gwau: “Lauma ese . . . lau idia rohea bona idia biagua. Lau maserea loulou, bona lau kava dainai lau idia koua, kava gabuna dekenai. Lagani momo lalodiai, lauma dikadia ese lau idia hahisia bada dainai lauegu lalona ia hekwarahi. Mahuta muramurana bona kekero muramurana lau inua bona kuku lau ania hanaihanai.”

Gabeai, Iehova bona ena Witnes taudia ese idia durua neganai, Nilda ese lauma dikadia edia siahu amo ia roho mauri, bona hari ia noho namonamo. Ia gwau: “Namona be ita ibounai ese lauma [dikadia] edia siahu ita dadaraia hanaihanai.”