Iehova Hesiai Henia, Satani Lasi

Ita ibounai ese iseda raka dalana ita abia hidi diba​—⁠Iehova do ita hesiai henia, eiava Satani bona ena lauma dikadia do ita hesiai henidia. Unai dala ruaosi be nega tamona ita rakalaidia diba lasi. Iehova hesiai henia karana be aonega bada karana!

Iehova be Namo

Lauma dikadia ese taunimanima hadikaia bona koia karadia idia moalelaia, to Iehova be unai bamona lasi. Ia ese taunimanima ia lalokau henidia, tama ta ese ena natudia ia lalokau henidia hegeregerena. Ia be “gau namodia ibounai, bona harihari gaudia namodia momokani ibounai” henia Diravana. (Iamesi 1:17) Ia ese taunimanima idia hanamoa gaudia ibounai ia henia.​—⁠Efeso 2:4-7.

Mani Dirava ena Natuna, Iesu, ese tanobada dekenai ia karaia karadia oi laloa. Mu taudia ia hanamodia bena idia hereva diba, bona matakepulu taudia edia matana ia kehoa. Lepera taudia bona aena dika taudia ia hanamodia. Lauma dikadia ia luludia bona gorere idauidau ibounai ia hanamoa. Dirava ena siahu amo, Iesu ese danu mase taudia ia hatoredia isi lou.​—⁠Mataio 9:32-35; 15:30, 31; Luka 7:11-15.

Dirava ese koikoi herevadia amo ita ia koia lasi, to nega ibounai hereva momokani ia gwauraia.​—⁠Numera 23:19.

Kara Mirodia amo Oi Siri

Magera rumana ese lao ta ia dogoatao hegeregerena, sene hereva koikoidia ese taunimanima milioni momo idia dogoatao. Mase taudia bona lauma dikadia idia gari henidia. Hadikaia herevadia bona meamea gaudia idia lalo-hekwarahilaia. Satani ena koikoi herevadia dainai idia abia dae herevadia bona idia karaia karadia ese ia guidia. To unai gaudia ese Dirava ena hesiai taudia ia tarapudia lasi.

Iehova ena siahu ese Satani ena ia hanaia momokani. Bema Iehova oi hesiai henia, lauma dikadia amo oi do ia gimaia. (Iamesi 4:7) Meamea herevadia ese oi do idia hadikaia diba lasi. Nigeria dekenai, meamea taudia mai siahudia ese meamea amo Iehova ena Witnes tauna ta idia hamasea toho, badina be edia hanua ia rakatania lasi dainai. Idia kwalimu lasi neganai, idia ta ia gari, Witnes tauna dekenai ia lao, ia noia do ia hebogahisi henia.

Bema lauma dikadia ese oi idia hahekwarahia, namona be Iehova ena ladana dekenai oi boiboi, bena oi do ia naria. (Aonega Herevadia 18:10) To Dirava ese oi do ia naria totona, namona be lauma dikadia tomadiho henia karadia bona babalau karadia ibounai oi negea guna. Gunaguna, Dirava tomadiho henia taudia Efeso dekenai be unai bamona idia karaia. Edia babalau buka idia gogodia bena idia gabua. (Kara 19:19, 20) Dirava ena hesiai taudia hari inai negai be unai bamona idia karaia be namo. Babalau gaudia, ‘hegima’ varovarodia, bona toni, babalau bukadia, bona unai bamona gaudia iboudiai oi negedia be namo.

Tomadiho Momokani Oi Badinaia

Bema oi ura Dirava do oi hamoalea, tomadiho koikoi oi rakatania bona kara dika oi hadokoa sibona be hegeregere lasi. Namona be emu kara amo tomadiho momokani oi badinaia. Baibel ese unai kara ia gwauraia hedinarai:

Iehova Ena Witnes Taudia Oi Bamodia

Satani bona lauma dikadia be mai edia taunimanima tanobada dekenai, hereva kereredia idia gwauraia bona kara kereredia idia karaia taudia unai. To Iehova danu be mai ena orea taudia, Iehova ena Witnes taudia unai. (Isaia 43:10) Tanobada ibounai lalonai Witnes taudia 6 milioni mai kahana idia noho. Idia iboudiai ese kara namodia idia karaia toho, bona taunimanima dekenai hereva momokani idia hadibaia. Tano momo lalonai, Kingdom Hall dekenai do oi davaria diba; unuseniai oi do idia abia dae mai edia moale ida.

Taunimanima idia durudia, Dirava idia hesiai henia totona. Baibel ena anina be oi dekenai do idia hadibaia emu ruma lalonai; oi do idia durua davana lasi, Iehova be dala maorona ai do oi tomadiho henia totona. Iehova ena Witnes taudia ese hereva momokani gwauraia hedinarai karana idia moalelaia, badina be taunimanima bona Iehova Dirava idia lalokau henidia dainai.