Kahana 10
Dirava Ena Tanobada Matamatana Namo Hereana
1, 2. Aramagedono tuarina murinai dahaka do ia vara?
DIRAVA ese Aramagedono tuarina amo tanobada do ia hagoevaia murinai, nega matamatana namo hereana do ia ginidae. Roho mauri taudia be idia hamomokania vadaeni Dirava ena lohia siahuna idia badinaia; unai dainai tanobada matamatana lalonai do ia hakaudia vareai. Unai nega lalonai taunimanima do ia hanamodia bada!
2 Dirava ena Basileia ese do ia hakaudia noho lalonai, roho mauri taudia ese paradaiso do idia karaia. Edia goada do idia gaukaralaia, mauri taudia iboudiai edia namo habadaia totona. Tanobada be gabu hairaina ai do idia halaoa, bona maino ai do idia noholaia mai edia moale ida.
Kara Dika Do Ia Ore
3. Edena dala amo taunimanima do ia ruhadia?
3 Unai ibounai do ia vara diba, badina be Dirava ese Satana ena tanobada do ia haorea guna. Taunimanima hapararadia bona koidia gaudia, tomadiho koikoidia bona kastom kereredia bona gavamani idauidau unai, be do idia noho lasi. Mani oi laloa: Dirava ese Satana ena tanobada ena siahu dikana ibounai do ia haorea vaitani! Unai dala amo taunimanima do ia ruhadia momokani!
4. Edena dala matamatana amo do ia hadibadia?
4 Taunimanima edia lohia daladia dikadia do idia ore, bena Dirava ese taunimanima do ia hadibadia. “Emu natudia mamaruanedia iboudiai be Iehova ese do ia hadibadia.” (Isaia 54:13) Lagani ta ta iboudiai do ia hadibadia, ela bona “tanobada be Iehova diba maoro karana amo do ia honudae, davara ia honudae bamona.” (Isaia 11:9) “Tanobada noholaia taudia” ese kara dika do idia dibaia lou lasi, to “kara maoromaoro do idia dibaia.” (Isaia 26:9) Idia iboudiai ese lalohadai maoromaorodia do idia lalodia bona kara maoromaorodia do idia karadia.—Kara 17:31; Filipi 4:8.
5. Dahaka be kara dika bona kara dika taudia iboudiai dekediai do ia vara?
5 Ala-ala, dagedage, reipi, henaohanao, bona raskol karadia iboudiai do idia ore. Ta ese hisi do ia ania lasi, haida edia kara dikadia dainai. Hereva Lada-isidia 10:30 ia gwau: “Kara maoromaoro tauna be ta ese do ia hahekwakwanaia lasi, ela bona hanaihanai; to kara dika taudia be tanobada ai do idia noho lasi.”
Mauri Goevadaena
6, 7. (a) Basileia ese dahaka dika do ia haorea? (b) Gunaguna Iesu ese unai edena bamona ia hahedinaraia?
6 Tanobada matamatana lalonai, Basileia ese gwau-edeede karana ginigunana ena anina dikana do ia haorea. Gorere bona buruka do ia haoredia. To hari inai nega lalonai goada taudia danu idia buruka idia lao, bena edia matadia idia valahu-valahu, edia isedia idia dika, edia taiadia idia kudima, edia kopidia idia makuku bona edia kudoudia idia manoka, ela bona dokonai idia mase.
7 To unai hisihisi idauidau, iseda tubudia roboadia edia amo ita abidia gaudia, be kahirakahira do idia ore. Iesu be tanobada ai ia noho neganai ia karaia karadia be mani oi lalodia. Baibel ia gwau: “Taunimanima hutuma ia dekenai idia lao. . . . Gorere idauidau taudia momo herea idia abia lao, Iesu ena aena badinai idia atoa. Vadaeni Iesu ese idia ia hanamoa. Unai dainai, taunimanima momo idia hoa, badina be idia itaia, hereva diba lasi taudia idia hereva, imana dika taudia idia goada, aena dika taudia idia raka, matakepulu taudia idia itaia diba.”—Mataio 15:30, 31.
8, 9. Taunimanima edia tauanidia do idia goevadae lou neganai, dahaka moale do idia davaria?
8 Tanobada matamatana lalonai iseda gorere iboudiai do idia ore neganai, do ita moale bada! Gorere do ita hisilaia lou lasi. “Ta do ia gwau lasi: ‘Lau gorere.’ ” “Unai neganai matakepulu taudia edia matadia do idia papa, bona taia kudima taudia edia taiadia do idia hekeho. Unai neganai aena dika tauna do ia daekau dia bamona, bona mu tauna ena malana do ia boiboi mai moale ida.”—Isaia 33:24; 35:5, 6.
9 Daba daba iboudiai do oi toreisi negadiai do oi moale, badina be mamina do oi abia, emu tauanina ia goada. Taunimanima burukadia be do idia diba, edia matamata negana ena goada idia abia lou vadaeni bona do idia goevadae, matamana neganai Adam bona Eva idia goevadae hegeregerena. Baibel ena gwauhamata be inai: “Ena hidiona do ia matamata lou, . . . ena tauhau negana ena goada dinadia do ia lou henidia.” (Iobu 33:25) Ita ese mata-galasi, itotohi, uilisea, bona muramura do ita negedia mai eda moale bada ida! Hospital, doketa, bona dentis do ita tahudia lou lasi.
10. Dirava ese mase edena bamona do ia kara henia?
10 Unai bamona maurina namona do idia abia taudia do idia ura lasi do idia mase. Bona Adam bona Eva edia amo idia abia dikana bona masena edia siahu idia dekediai do ia ore. “Keriso ese gau ibounai do ia biagua, ela bona Dirava ese . . . mase danu do ia haorea.” “Dirava ena harihari gauna davana lasi be mauri hanaihanai.”—1 Korinto 15:25, 26; Roma 6:23; ma danu Isaia 25:8 itaia.
11. Apokalupo ese tanobada matamatana ena hahenamo edena bamona ia gwauraidia?
11 Lalokau Diravana ese taunimanima na Paradaiso lalonai do ia hanamodia dalana be Baibel ena buka dokona ese ia gwauraia, ia gwau: “[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”—Apokalupo 21:3, 4.
Mase Taudia Do Idia Lou Mai
12. Iesu ese edena bamona ia hahedinaraia Dirava ese siahu ia henia mase taudia do ia hatoredia isi?
12 Iesu ese gorere taudia bona aena dika taudia ia hanamodia. Unai sibona lasi, to ia ese danu mase taudia ia hatoredia isi lou. Unai amo ia ese hatoredia isi siahuna ia hahedinaraia, Dirava ese ia henia siahuna unai. Nega ta, tau ta ena natuna kekenina ia mase murinai, Iesu be ena ruma dekenai ia lao, bena mase kekenina ia hereva henia, ia gwau: “Kekeni e, oi toreisi,” ‘bena kekeni ia toreisi.’ Unai idia itaia taudia “idia hoa dikadika” bona idia moale dikadika.—Mareko 5:41, 42; ma danu Luka 7:11-16; Ioane 11:1-45 itadia.
13. Edena bamona taudia do ia hatoredia isi lou?
13 Tanobada matamatana lalonai, “mase taudia dohore idia toreisi lou, kara maoromaoro taudia, bona kara maoromaoro lasi taudia danu.” (Kara 24:15) Iesu ese do ia hatoredia isi lou. Ia be guna ia gwau: “Toreisi lou be lau inai, mauri danu be lau. Lau dekenai ia abidadama henia tauna, ia be do ia mase, to do ia mauri lou.” (Ioane 11:25) Ma ia gwau: “Mase guria gabu dekenai idia noho taudia [Dirava ese ia lalodia tao taudia] ibounai ese iena [Keriso ena] gadona do idia kamonai. Vadaeni . . . do idia toreisi.”—Ioane 5:28, 29.
14. Mase do ia ore dainai, dahaka danu do idia ore?
14 Mase taudia do idia mauri lou bona edia lalokau taudia ida do idia hedavari lou neganai, moale bada be tanobada hegegemadai do ia vara. Unai neganai mase sivaraidia be niuspepa ai do idia halasidia lasi, to toreisi lou taudia sivaraidia do idia halasidia reana, guna idia lalokau henidia taudia hamoaledia totona. Mase lalolaia karadia bona gara gabudia do idia ore!
Tanobada Do Ia Maino Momokani
15. Mika ena peroveta herevana be edena bamona do ia momokani vaitani?
15 Maino korikori do ia vara. Tuari, bona tuari havaradia taudia, bona tuari gaudia karadia karana danu, be do idia ore. Badina be bese ta ta ese sibodia edia namo sibodia edia namo do idia tahua lasi. Unai neganai “bese ta ese tuari kaiana do ia abia isi lasi, bese ta tuari henia totona, bona tuari daladia do idia dibalaidia lou lasi.”—Mika 4:3.
16. Dirava ese tuari daladia edena bamona do ia koudia?
16 Momokani, unai hereva ita hoalaia, badina be tanobada besedia idia tuari loulou ema bona hari. To unai ena badina be taunimanima bona lauma dikadia ese idia biagudia dainai. Tanobada matamatana lalonai, Basileia ese do ia lohiadia neganai, inai do ia vara: “Umui mai, Iehova ena gaukara umui itaia . . . Tuari ia hadokodia ela bona tanobada dokona. Peva ia hamakohidia bona io ia hakwaidudia; kariota na lahi ai ia aradia.”—Salamo 46:8, 9.
17, 18. Taunimanima bona animal be edena bamona do idia kara heheni?
17 Taunimanima be animal ida maino ai do idia noho, Eden ai idia noho bamona. (Genese 1:28; 2:19) Dirava ia gwau: “Unai dina ai lau ese gwauhamata ta uda boromadia bona atai manudia bona tano ai idia rau gaudia dainai do lau karaia, . . . bena maino ai do lau hahekuredia.”—Hosea 2:18.
18 Unai maino ena anina be ede badana? “Uda sisiana be mamoe natuna ida do idia noho, bona lepadi be nani natuna ida do idia hekure; boromakau natuna bona leona bona ubu-ubu gauna be do idia noho hebou, bona mero maragina ta ese do ia hakaudia.” Animal ese taunimanima o animal idaudia do idia dagedage henidia lou lasi. Leona danu “ese rei kakoro do ia ania, boromakau bamona”!—Isaia 11:6-9; 65:25.
Tanobada be Paradaiso ai Do Ia Lao
19. Tanobada be dahaka ai do idia halaoa?
19 Taunimanima ese tanobada ibounai be paradaiso ai do idia halaoa bona do idia noholaia. Unai dainai Iesu ese kamonai tauna ta ia gwauhamata henia diba, ia gwau: “Ita ruaosi Paradaisa dekenai do ita ginidae.” Baibel ia gwau: “Tano gagaena bona tano kaukauna do idia moale . . . Badina be tano gagaena ai ranu do ia lohilohi dae, bona tano kaukauna ai sinavai do idia aru.”—Luka 23:43; Isaia 35:1, 6.
20. Dahaka dainai hitolo ese taunimanima do ia hadikadia lou lasi?
20 Dirava ena Basileia henunai, hitolo ese taunimanima milion milion do ia hadikadia lou lasi. “Aniani reidia be tano ai do idia vara momomomo; ororo edia doridia ai aniani momo herea do ia vara.” “Huahua audia ese edia huahua do idia havaraia, bona tano ese ena anina do ia havaraia, bona tano taudia be edia tano ai do idia noho namonamo.”—Salamo 72:16; Esekiel 34:27.
21. Unai neganai, ogogami, skwota setelmen, bona raskol do idia noho a?
21 Unai neganai, ogogami, ruma lasi taudia, skwota setelmen, bona raskol be lasi. “Ruma do idia haginidia bena do idia noholaidia; vine umadia do idia hadodia, bena edia anina do idia ania. Dia idia ese do idia haginidia, bena idauna ta ese do ia noholaidia, bona dia idia ese do idia hadohado, bena idauna ta ese do ia ania.” “Ta ta ena vine auna ena vine auna bona ena fig auna ena fig auna henudiai do idia helai, bona tau ta ese do ia hagaridia lasi.”—Isaia 65:21, 22; Mika 4:4.
22. Baibel ese Dirava ena Basileia ena hahenamo edena bamona ia gwauraidia?
22 Paradaiso lalonai taunimanima ese unai hahenamo iboudiai bona ma haida danu do idia abidia. Salamo 145:16 ia gwau: “Oi [Dirava] emu imana oi kehoa, mauri gaudia iboudiai edia ura gaudia oi henidia.” Baibel ena peroveta herevadia haida be inai: “Manau taudia ese tano do idia abia, bona maino bada do idia moalelaia dikadika. . . . Kara maoromaoro taudia ese tanobada do idia abia, do idia noholaia hanaihanai.”—Salamo 37:11, 29.
Nega Gunana ena Anina Do Ia Haorea
23. Ita ania vadaeni hisihisina ibounai ena anina be Dirava ena Basileia ese edena bamona do ia haorea?
23 Hanaia laganidia 6,000 lalodiai taunimanima ese dika idauidau idia davaria, to Dirava ena Basileia ese unai dika ibounai do ia haorea. Edia moale ese edia hisihisi gunadia iboudiai do ia hanaidia. Dina dina iboudiai lalohadai namodia do idia lalodia bona kara namodia do idia karadia, unai dainai edia hisihisi gunadia do idia lalodia boio.
24, 25. (a) Isaia ese dahaka ia perovetalaia? (b) Dahaka dainai ita diba iseda hisihisi gunadia do ita lalodia boio?
24 Lalokau Diravana ia gwau: “Lau ese guba matamatana [guba gavamanina matamatana taunimanima atai ai] bona tanobada matamatana [kara maoromaoro besena] lau karadia inai; gau gunadia do idia lalodia lou lasi, do idia lalodia boio. To umui moale; lau karaia gauna umui moalelaia hanaihanai.” “Tanobada ibounai ia laga-ani vadaeni, ena hekwarahi ia ore vadaeni. Taunimanima idia boiboi mai edia moale ida.”—Isaia 14:7; 65:17, 18.
25 Iena Basileia amo, Dirava ese nega gunana daudauna ena anina dikana do ia haorea. Hahenamo momo ita do ia henia hanaihanai; unai amo do ia hahedinaraia ita ia laloa bada. Unai hahenamo ese iseda mauri gunana lalonai ita ania hisihisina ena davana do idia hanaia momokani. Guna ita hisihisilaidia gaudia be metairametaira do ita lalodia boio.
26. Dahaka dainai Dirava ese iseda hisihisi gunadia edia davana be ita do ia henia?
26 Unai dala amo Dirava ese inai tanobada lalonai ita ania hisihisina ena davana be ita do ia henia. Ia diba ita vara negana amo ita goevadae lasi be iseda kerere lasi, badina be unai kerere be iseda tubudia roboadia edia amo ita abia. Satana ese ia biagua tanobadana lalonai ita vara be iseda kerere lasi, badina be, bema Adam bona Eva ese Dirava idia badinaia, ita be paradaiso lalonai ita vara. Unai dainai Dirava ese nega gunana ena dika ena davana do ia karaia, bona ita do ia henia gaudia ese unai do idia hanaia.
27. Edena peroveta herevadia be tanobada matamatana lalonai do idia momokani?
27 Tanobada matamatana lalonai, taunimanima ese ura-kwalimu do idia abia. Roma 8:21 ia gwau: “Dirava ese dina ta iena karaia gaudia be do ia ruhadia dika ena bodaga dekena amo, vadaeni Dirava ena natuna edia hairai do idia abia, ma Dirava ese edia dala do ia kehoa, vadaeni kwalimu momokani do idia abia.” Inai guriguri herevana, “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona,” ena anina do ia vara guguru. (Mataio 6:10) Paradaiso tanobadana ena namo be guba ena namo hegeregerena ai do ia lao.
[Pictures on page 23]
Tanobada matamatana ai, burukadia be edia matamata negana ena goada do idia lou henia
[Picture on page 24]
Tanobada matamatana ai, gorere iboudiai do idia ore
[Picture on page 25]
Tanobada matamatana ai, mase taudia do idia toreisi lou
[Picture on page 26]
“Tuari daladia do idia dibalaidia lou lasi”
[Pictures on page 27]
Paradaiso lalonai, taunimanima bona animal be maino ai do idia noho
[Picture on page 27]
‘Dirava ese ena imana do ia kehoa, mauri gaudia iboudiai edia ura gaudia do ia henidia’
[Picture on page 28]
Dirava ena Basileia ena hahenamo ese iseda hisihisi iboudiai edia davana do ia hereaia